Ərdoğan: “Trampın sülhə dair mövqeyini bölüşürəm”
Ölkə.az xəbər verir ki, bunu Türkiyə Prezidenti Rəcəb Tayyib Ərdoğan NATO Zirvə görüşündə çıxışı zamanı deyib.
“Şübhəsiz ki, ölkəmizin ən böyük uğuru müdafiə sənayesindəki irəliləyişidir. İstehsal və ixrac gücünə görə dünyanın ilk 10 ölkəsi arasında yer almışıq. Alyans daxilində bizə ayrılan 361 hədəfin demək olar ki, hamısına üç il ərzində, vaxtından əvvəl nail olacağıq. Alyansımızın ən təcili ehtiyacı olan hava və raketdən müdafiə tələbatını ödəmək üçün polad günbəz layihəmiz üçün əlavə 24 milyard dollar büdcə ayırdıq”, - dövlət başçısı vurğulayıb.
Onun sözlərinə görə, Türkiyə Avropada ən böyük quru qoşunlarına malikdir və ehtiyac duyulduqda bu ordunun imkanlarını Alyansa təqdim etməyə çalışırlar.
“NATO 3.0 məqsədimizə ən qısa zamanda çatmaq üçün iki məqama xüsusi diqqət çəkmək istərdim: Birincisi, müttəfiqlər arasında, xüsusən də müdafiə sənayesində əməkdaşlığa qoyulan məhdudiyyətlərin aradan qaldırılması. İkincisi, Avropa müttəfiqləri olaraq, qitənin müdafiəsində daha böyük məsuliyyət daşıyarkən, Alyansın bütövlüyünü və transatlantik münasibətləri zəiflədə biləcək tədbirlərdən də çəkinməliyik. Birliyin təhlükəsizlik səylərində maksimum fayda yalnız NATO ilə lazımsız təkrarlamaların qarşısını almaqla əldə edilə bilər”, - Türkiyə lideri söyləyib.
Rusiya-Ukrayna müharibəsinə toxunan R.T.Ərdoğan deyib ki, Kiyevi dəstəkləyərkən, həmçinin Moskvanı sülhə doğru istiqamətləndirmək üçün ünsiyyət kanallarından istifadə edirlər. “Mən ABŞ Prezidenti Donald Trampın Ukrayna müharibəsində sülhə dair mövqeyini bölüşürəm və Kiyevin prioritet ehtiyaclar təşəbbüsünü dəstəkləyirəm. Öz milli inventarımızdan Ukraynaya təmin etdiyimiz hərbi dəstəyə əlavə olaraq, Puer El giriş proqramı çərçivəsində töhfəmizi davam etdirəcəyik”.
İran və Hörmüz boğazındakı böhranla bağlı mövqeyini açıqlayan Türkiyə Prezidenti diqqətə çatdırıb ki, bu məsələdə təxribat cəhdləri var.
“Buna baxmayaraq, dostum Trampın İran böhranını həll etməkdə göstərdiyi qətiyyətli mövqeyini yüksək qiymətləndirirəm. Diplomatik səylərimizlə yanaşı, Hörmüz boğazının minalardan təmizlənməsinə də töhfə verməyə hazırıq”, - o vurğulayıb.
Mürtəza
