Bakı strategiyası: Trampın Cənubi Qafqaza olan marağı 

Ölkə.az xəbər verir ki, bunu deputat Kamran Bayramov parlamentdə çıxışı zamanı deyib. 

O bildirib ki, bu cür səfərlərin simvolizmi nadir hallarda təsadüfi olur. "Ceyms Vens respublikaçıların Ağ Evə qayıtmasından sonra Azərbaycan-ABŞ münasibətlərində transformasiyanın baş verdiyi bir dövrdə Bakıya gəlir. Bu dəyişikliklərin dinamikası iki liderin avqust görüşündən əvvəl də telefon danışıqları və məktub mübadiləsi yolu ilə yaranmağa başladı və bu təmaslar zamanı liderlərin qlobal və regional məsələlər üzrə mövqeləri müəyyən edilib",- o vurğulayıb. 

Deputat qeyd edib  ki, Bayden administrasiyası dövründə pisləşən Azərbaycan-ABŞ münasibətlərinin bərpasında Donald Trampın şəxsi rolu xüsusi diqqətə layiqdir: " Amerika Prezidenti beynəlxalq məsələlərə praqmatik yanaşması ilə tanınır və burada digər ölkə liderləri ilə şəxsi münasibətlər mühüm rol oynayır. İlham Əliyevlə Donald Tramp arasında Vaşinqtonda, Misirdə və Davosda keçirilən görüşlər və təmaslar iki dövlət başçısı arasında maraqların uzlaşmasına əsaslanan işgüzar dialoqun qurulduğunu nümayiş etdirdi.

Ceyms Vensin ölkəmizə səfəri isə bu yüksək səviyyəli təmaslar ardıcıllığına uyğun gəlir. Sirr deyil ki, ABŞ-ın vitse-prezidenti Donald Tramp tərəfindən ona verilmiş mandatla Bakıya gəlir, çünki Ceyms Vens Azərbaycanla münasibətlərin dərinləşməsinə dair xarici siyasət qərarlarını qəbul edən komandanın mövqeyini təmsil edir.

Bu gün Cənubi Qafqaz regionu dönüş dövrünü yaşayır: Qarabağ münaqişəsinə son qoyulması, regionda sülhün bərqərar olması, güclər konfiqurasiyasının dəyişilməsi və yeni nəqliyyat dəhlizlərinin açılması xarici oyunçuların regiona marağını əhəmiyyətli dərəcədə artırır. Tramp administrasiyası isə abstrakt və ideoloji mövqelərə deyil, iqtisadi maraqlara və geosiyasi reallıqlara əsaslanan münasibətlər qurmağa hazır olduğunu nümayiş etdirir".
O əlavə edib ki, ABŞ vitse-prezidentinin Bakıya səfəri Tramp administrasiyasının sələflərindən miras qalmış xarici siyasət prioritetlərini fəal şəkildə yenidən nəzərdən keçirdiyi bir vaxta təsadüf edir: "Bununla da, Cənubi Qafqaz regionu əvvəlki illərdə toplanmış stereotiplər və qərəzli yanaşma yükündən azad olunaraq obyektiv və ədalətli qiymət almaq şansını əldə edir. Azərbaycan isə alternativ yanaşmaları dinləməyə və nəzərdən keçirməyə hazır olan bir administrasiyaya qlobal və regional məsələlərlə bağlı mövqeyini sərgiləmək və qəbul etdirmək imkanını qazanır".

Mürtəza