28 yaşında heç kimin düşünmədiyi problemi həll etdi, milyonlarla yatırım aldı
Ölkə.Az Valyuta.az-a istinadən xəbər verir ki, universiteti yarımçıq qoyan Piter Qoldsboro (Peter Goldsborough) qısa müddətdə Silikon Vadisində tanınan gənc mühəndislərdən birinə çevrilib.
O, cəmi 19 yaşında “Facebook”un süni intellekt araşdırmaları komandasına qoşulub, daha sonra isə müdafiə texnologiyaları şirkəti “Anduril”də baş mühəndis vəzifəsində çalışıb.
Lakin Qoldsboro texnologiya sektorunda çoxlarının diqqət yetirmədiyi bir problemi görüb: orduda logistika sahəsi kifayət qədər inkişaf etməyib. Halbuki qoşunların, texnikanın və silah sistemlərinin yanacaq, su, sursat, ərzaq və ehtiyat hissələri ilə fasiləsiz təmin olunması hərbi əməliyyatların əsas şərtlərindən biridir.
Bu boşluğu aradan qaldırmaq üçün o, 2024-cü ildə “Rune Technologies” şirkətini yaradıb. Hazırda Qoldsboro şirkətin həmtəsisçisi və texniki direktorudur. Startap A seriyası investisiya raundunda 24 milyon dollar cəlb edib. Toxum mərhələsi də daxil olmaqla ümumi investisiya həcmi 30,2 milyon dollara çatıb.
Şirkətin əsas məhsulu “TyrOS” adlı platformadır. Sistem logistika mütəxəssislərinə mövcud ehtiyatları izləməyə, hansı resursların azalacağını əvvəlcədən görməyə və təchizat qərarlarını daha operativ verməyə kömək edir. Platforma həmçinin resursların hara və necə çatdırılacağını planlaşdırır.
“Rune”in texnologiyası artıq ABŞ Ordusunun bir neçə bölməsində pilot layihələr çərçivəsində istifadə olunub. Qoldsboro bildirir ki, məqsəd insanları əvəz etmək deyil, onların qərarvermə imkanlarını gücləndirməkdir.
O, şirkəti qurmağı həm strateji addım, həm də mənəvi məsuliyyət hesab etdiyini deyir. Sahibkarlara tövsiyəsi isə budur: məhsulu fərziyyələrə əsasən deyil, real istifadəçilərin ehtiyaclarını dinləyərək qurmaq lazımdır.
