Bu gün Azərbaycanda müasir idarəetmə və infrastruktur modelləri qurulur - Sədr müavini
Ölkə.az xəbər verir ki, bunu Milli Məclisin sədr müavini Ziyafət Əsgərov Milli Məclisdə “Azərbaycanda regionların, yerli demokratiyanın və özünüidarəetmənin inkişafında Heydər Əliyev irsi” mövzusunda konfransda çıxışı zaman deyib.
O qeyd edib ki, Heydər Əliyevin rəhbərliyi dövründə həyata keçirilən dövlət quruculuğu prosesi yalnız mərkəzi idarəetmənin gücləndirilməsi ilə məhdudlaşmamış, eyni zamanda yerli özünüidarəetmə institutlarının inkişafına da xüsusi diqqət yetirilmişdir:
“Onun siyasi kursunun əsas istiqamətlərindən biri demokratik dəyərlərin möhkəmləndirilməsi, vətəndaşların idarəetmədə iştirak imkanlarının genişləndirilməsi olmuşdur. Bu sahədə qəbul edilmiş fundamental hüquqi sənədlər, qanunvericilik aktları və strateji proqramlar uzunmüddətli inkişafın möhkəm təməlini qoymuşdur.
Azərbaycan üçün gənc təsisat olan yerli demokratiyanın və özünüidarəetmənin hüquqi bazasının əsasını Ulu Öndər Heydər Əliyevin rəhbərliyi ilə 1995-ci ildə qəbul edilmiş Azərbaycan Respublikasının Konstitusiyası təşkil edir. Konstitusiyaya əsasən, bələdiyyələr seçkili orqanlar kimi formalaşır və yerli əhəmiyyətli məsələlərin həllində müstəqil fəaliyyət göstərirlər”.
Vitse-spiker əlavə edib ki, Heydər Əliyevin müəyyən etdiyi strateji xəttə əsasən, yerli özünüidarəetmə orqanlarının fəaliyyəti yalnız formal xarakter daşımamalı, real sosial-iqtisadi nəticələrə xidmət etməli idi: "Bu baxımdan, bələdiyyələrin maliyyə müstəqilliyinin artırılması, onların yerli problemlərin həllində rolunun gücləndirilməsi istiqamətində mühüm hüquqi və institusional addımlar atılmışdır".
Z.Əsgərov bildirib ki, bu gün suveren Azərbaycanda Prezident İlham Əliyevin rəhbərliyi ilə regional inkişaf proqramlarının həyata keçirilməsi, yerli özünüidarəetmənin təkmilləşdirilməsi və demokratik institutların möhkəmləndirilməsi istiqamətində görülən işlər məhz Heydər Əliyevin müəyyən etdiyi strateji kursun müasir çağırışlara uyğun şəkildə məntiqi davamı və inkişafıdır.
"Prezident İlham Əliyevin rəhbərliyi ilə regionların iqtisadi potensialının daha səmərəli istifadəsi məqsədilə sənaye parkları və məhəllələrinin yaradılması istiqamətində mühüm addımlar atıldı. Bu sahədə qəbul edilmiş qərarlar regionlarda investisiya mühitinin yaxşılaşdırılmasına və yeni iş yerlərinin yaradılmasına vəsilə oldu.
Eyni zamanda kəndlərin inkişafı, aqrar sektorun modernləşdirilməsi və infrastrukturun yenilənməsi istiqamətində dövlət dəstəyi gücləndirildi. Həyata keçirilən tədbirlər regionlararası sosial-iqtisadi fərqlərin azaldılmasına xidmət edir.
Son illərdə ölkəmiz dövlətçilik və suverenlik tarixinin ən qüdrətli dövrünü yaşayır. Ümummilli Liderin ümdə vəsiyyətini parlaq Zəfərimizlə təmin edən Müzəffər Ali Baş Komandanın rəhbərliyi ilə əzəli torpağımız Qarabağ və Şərqi Zəngəzur yenidən dirçəlir. Bu gün həyata keçirilən regional inkişaf siyasətində başlıca məqsəd işğaldan azad edilmiş ərazilərin bərpasıdır. Prezident İlham Əliyevin rəhbərliyi ilə bu ərazilərdə “ağıllı şəhər” və “ağıllı kənd” konsepsiyaları tətbiq olunur, müasir idarəetmə və infrastruktur modelləri qurulur. Bu yanaşma yalnız fiziki bərpa deyil, həm də yeni, daha effektiv yerli idarəetmə sisteminin formalaşdırılmasını nəzərdə tutur.
Bu gün Azərbaycanda əldə olunan sosial-iqtisadi nailiyyətlər, regionların inkişafı və demokratik idarəetmə institutlarının möhkəmlənməsi məhz bu möhkəm təməl üzərində qurulmuşdur və gələcək inkişaf üçün etibarlı zəmin yaradır. Heydər Əliyev irsi yalnız keçmişin deyil, həm də gələcəyin inkişaf yolunu müəyyən edən mühüm bir strateji istiqamətdir”.
Mürtəza
