UN-Habitat: Mənzil fondunun səmərəsiz istifadəsi torpaq istehlakını artırır

Mənzil fondunun səmərəsiz istifadəsi torpaq istehlakını artırır.

Ölkə.az xəbər verir ki, bunu BMT-nin Məskunlaşma Proqramının (UN-Habitat) Torpaq, Mənzil və Sığınacaq Bölməsinin rəhbəri, mənzil təminatı üzrə aparıcı mütəxəssisi Ombretta Tempra Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində təşkil olunmuş "Hamı üçün adekvat mənzil üzrə Hökumətlərarası Açıq Tərkibli Ekspert İşçi Qrupu: Mənzil dayanıqlılığı və davamlılığı üzrə sessiyalararası görüş"də bildirib.

Onun sözlərinə görə, mənzil təminatı ilə təbii mühitin bir-biri ilə müxtəlif qarşılıqlı təsir formaları var: "Birincisi, təbii ki, mənzil sektoru iqlim dəyişikliyi, çirklənmə və biomüxtəlifliyin itirilməsi kimi üçlü qlobal planetar böhrana mühüm dərəcədə təsir göstərir. Biz bilirik ki, məsələn, tikili mühit hazırda qlobal material istifadəsinin 31 %-ni, qlobal şirin su istifadəsinin 15 %-ni, enerjiyə olan tələbatın 32 %-ni, istixana qazı emissiyalarının 21 %-ni və karbon dioksid (CO_2) emissiyalarının 34 %-ni təşkil edir. Bu, sadəcə ən böyük rəqəmlərdir. Lakin biz bilirik ki, mənzillərin idarə olunması və ya mənzil tikintisinin inkişaf forması daha geniş aspektlərə də təsir göstərir.

Məsələn, torpaq istehlakı və ekosistemin parçalanması. Əgər mənzil tikintisi yığcam deyilsə və ya mövcud mənzil fondundan maksimum istifadə olunmursa, bu, gördüyümüz torpaq istehlakı böhranını daha da kəskinləşdirir, ekosistemə, yəni biomüxtəlifliyə ciddi təsir göstərir. Sırf mənzil istehsalının özü üzərində işləmək vacib olduğu qədər, bütün tikili mühit və şəhərlərin morfologiyası, urbanizasiyanın necə formalaşması üzərində işləmək də bir o qədər vacibdir ki, davamlılıq regional səviyyədə də təmin olunsun".