İran yaşayış binalarında günəş panellərinin quraşdırılmasına başlayır

İran yaşayış binalarında günəş panellərinin quraşdırılması ilə bağlı yeni təşəbbüsə başlayır.

Ölkə.az xəbər verir ki, bunu İranın yollar və şəhərsalma naziri müavini Qulamrza kazazemian (Gholamreza Kazemian) Ümumdünya Şəhərsalma Forumu (WUF13) çərçivəsində keçirilən "Yüksəksəviyyəli Enerji və Şəhər Dialoqu"nda deyib.

Onun sözlərinə görə, ölkədə müdafiə və innovativ texnologiyalar sahəsində aparılan işlərlə yanaşı, təmiz və dayanıqlı enerji mənbələrinə daha çox önəm verilir: "Bu çərçivədə İranın Yol və Şəhərsalma Nazirliyi Energetika Nazirliyi və İranın Tikinti Mühəndisliyi Təşkilatı ilə birlikdə yaşayış binalarında günəş enerji sistemlərinin genişləndirilməsi məqsədilə memorandum imzalamağa hazırlaşır. Təşəbbüs "Tikinti Mühəndisliyi və Konsaltinq haqqında" qanun çərçivəsində həyata keçiriləcək. Layihənin əsas məqsədi binalarda enerji istehlakını azaltmaq və müraciət edən yaşayış obyektlərinin enerji tələbatının bir hissəsini günəş panelləri vasitəsilə təmin etməkdir".

O bildirib ki, proqramın icrası üçün texniki və mühəndis dəstəyi, proqram təminatı, eləcə də maliyyə güzəştləri və kredit imkanları təqdim olunacaq: "Layihənin maliyyələşdirilməsi enerji qənaəti hesabına və İran Enerji Birjasında ticarət olunan enerji qənaəti sertifikatları vasitəsilə təmin ediləcək. 1995-ci ildə qəbul edilmiş "Tikinti Mühəndisliyi və Konsaltinq haqqında" qanuna əsasən, Milli Tikinti Qaydaları binaların layihələndirilməsi, hesablanması, tikintisi, istismarı və texniki xidmətini tənzimləyən texniki prinsiplər, standartlar və icra qaydalarını əhatə edir. Sənədin əsas məqsədləri sırasında təhlükəsizlik, ictimai sağlamlıq, komfort və iqtisadi səmərəliliklə yanaşı, enerji effektivliyinin artırılması da yer alır".