Rövşən Nəcəf: "Əvvəllər SOCAR, əsasən, Azərbaycan şirkəti idi"
"SOCAR üçün növbəti mərhələ süni intellekt və məlumat mərkəzləri sahəsinə daxil olmaqdır".
Ölkə.az xəbər verir ki, bunu Azərbaycan Dövlət Neft Şirkətinin (SOCAR) prezidenti Rövşən Nəcəf 31-ci Bakı Enerji Forumu çərçivəsində keçirilən "Liderlərin çıxışları: Enerji transformasiyası və gələcək strategiyaları mövzusunda liderlərin mövqeyi" adlı panel müzakirədə deyib.
Qurum rəhbəri bildirib ki, süni intellektin inkişafı əsas istiqamətdir:
"Uzunmüddətli perspektivdə rəqabət qabiliyyətimizi qorumaq üçün biz həm də məlumat mərkəzlərinə və süni intellekt mərkəzlərinə investisiya yatırırıq. Dünən imzaladığımız müqavilələrdən biri Azərbaycanda məlumat mərkəzi və süni intellekt mərkəzinin yaradılması ilə bağlı idi. Lakin bu, yalnız Azərbaycanla məhdudlaşmır. Biz müxtəlif ölkələrdə də investisiyalar həyata keçiririk və qlobal oyunçuya çevrilirik. Biz neft şirkəti olmaqdan çıxaraq enerji və texnologiyayönümlü şirkətə çevrilirik. Bu, bizim üçün əsas istiqamətdir".
Rövşən Nəcəf vurğulayıb ki, baş verən dəyişikliklər SOCAR-ın insan kapitalının tərkibinə də təsir göstərib:
"Əvvəllər SOCAR, əsasən, Azərbaycan şirkəti idi. İndi isə SOCAR-da daha çox xarici mütəxəssis çalışır. Müxtəlif ölkələrdən olan yüksəkixtisaslı peşəkarlar şirkətə qoşulurlar. SOCAR-ın xaricdəki törəmə müəssisələrində çalışan əməkdaşların əhəmiyyətli hissəsi artıq əcnəbilərdir. Bu da SOCAR-ın beynəlxalq enerji şirkətinə çevrilməsinin və insan kapitalının beynəlmiləlləşməsinin göstəricisidir".
