Bakıda müəllim çantanı direktor əvəzinin başına vurub

Xətai rayonu, 30 saylı musiqi məktəbinin dərs hissə müdiri Bətulə Məmmədova barəsində redaksiyamıza edilmiş şikayətə münasibət bildirib.

Öncə əməkdaşımızı məhkəməyə verəcəyi ilə hədələyən B.Məmmədova Ölkə.Az-a açıqlamasında müəllimlərin onun barəsində səsləndirdiyi fikirləri təkzib edib:

"Onların məni gözü götürmür deyə, qəsdən belə edirlər. Mən yaradıcı insanam və işdə ən yaxın adamıma da güzəştə getmirəm. Sizə müraciət edənlərdən biri mənim bibim qızıdır. O, bir müddət əvvəl mənimlə mübahisə etdi və əl çantasını başıma vurdu. Vicdanıma and olsun ki, yalan danışmıram. Sizin yazıdan sonra Bakı şəhər mədəniyyət və turizm idarəsinin rəisinin qəbulunda oldum. Hazırda məsələ araşdırılır. O ki qaldı dərs saatı məsələsinə, bu da məndən asılı deyil. Çünki mən direktor əvəziyəm, yaxın günlərdə direktor təyin olunacaq. Bu məsələlərə də məhz o baxacaq. Səmimi deyirəm ki, direktor olmaq fikrim yoxdur".

Qeyd edək ki, bu gün Xətai rayonu, 30 saylı musiqi məktəbinin bir qrup müəllimi Ölkə.Az-ın redaksiyasına müraciət edərək son iki ayda kollektivə rəhbərlik edən Bətulə Məmmədovadan narazılıqlarını bildirmişdilər:

"Bundan əvvəlki direktorumuz Eldar Bağırov idi. Sentyabrda Eldar müəllimin işdən azad olunmaq məsələsi qoyulmuşdu. Ötən ilin dekabrında öz ərizəsi ilə uzaqlaşdı. Dekabrın 30-da əmri verildi, xəstəliklə əlaqədar işdən çıxdı. Dekabrdan bu yana direktor vəzifəsi boşdur. Dərs hissə müdiri Bətulə Məmmədova direktoru əvəz edir. Kollektivin böyük hissəsi bu adamdan narazıdır".

Müəllimlər bildirirlər ki, Bətulə Məmmədova barədə ayrı-ayrı vaxtlarda Bakı Şəhər İcra Hakimiyyətinə, Bakı şəhər Mədəniyyət və Turizm İdarəsinə, Mədəniyyət və Turizm Nazirliyinə, hətta Baş Prokurorluğa müraciət ediblər. Müəllimlərin narazılığına səbəb olan əsas məqamalardan biri budur ki, B.Məmmədova "ölü müəllimlər"in adına dərs saatı yazdığı halda, hər gün işə gələn müəllimlərin dərs saatını aşağı salır:

"Məktəbdə doqquz müəllimin adı siyahıda gedir, amma üzünü görən olmayıb. Sonra bir az narazılıq oldu, onlardan ikisini çıxardılar. Hazırda yeddi "ölü" müəllimimiz var. Ancaq indi də eşitmişik ki, onları da çıxarıb ki, birdən gəlib yoxlayarlar, pis olar. Onların kartları da Bətulə Məmmədova ilə direktorda idi. Üçünün adı yadımızda qalıb-Yeganə, Zümrüd, Natavan... İndiyə kimi bizim bildiyimiz, məktəbdə 7 min yeyinti olub. Dəfələrlə müraciət və şikayətlərimizə baxmayaraq, heç birimizə nə dərs saatı verilmədi, nə də çağırıb dərdimizi soruşmadılar. Müəllimlər etiraz edəndə Bətulə Məmmədova hərəyə bir cür cavab verir. Kollektivdə 120-yə yaxın müəllim var. Kim haqqını tələb edirsə, kobudluqla qarşılaşır. Müəllimlərdən biri dərs saatı istəyib, ona deyib ki, itil burdan. Başqa bir müəllimin qolundan tutub bayıra atıb ki, çıx bayıra, sən burda dərs keçməyəcəksən".

Mövzunu diqqətdə saxlayacağıq.

İntiqam VALEHOĞLU
Ölkə.Az