Ruslan İzzətli: \"Siyavuş Novruzov bizim ofisə gəlsə, onu hörmətlə qarşılaya bilərəm...\"

Ölkə.az-ın əməkdaşları D18 Hərəkatının qonağı olub.

Əməkdaşlarımız təşkilatın yeni ofisi ilə tanış olduqdan sonra Hərəkatın sədri Ruslan İzzətlidən geniş müsahibə alıb.

Həmin müsahibəni sizə təqdim edirik:

- Salam Ruslan bəy, D18 Hərəkatı hansı vəziyyətdədir, nə işlər görür?

- Salam. Xoş gəlmisiniz. D18 Hərəkatı 2016-cı ili daha ciddi təşkilatlanma ili elan edib. Təbii ki, hər bir siyasi qurum üçün hər növbəti il təşkilatlanma ilidir. Hədəf varsa, həmin yöndə təşkilatlanmalıdır. Siyasətin əsas kapitalı insan olduğu üçün insanları hərəkata cəlb etməlidir. Bu təşkilatlanma yalnız regionlarda, universitetlərdə insanları cəlb etmək deyil. Cəmiyyətdə müstəqil gənclər var ki, konkret mövqe bildirirlər, biz onlarla işləyirik. Onlar bizim hərəkatın üzvü olmaya da bilər. Bizə üzv olmayan müxtəlif sahələrin insanları ilə məsləhətləşmələr aparırıq. Bu xətti qabartmışıq. Artıq beynəlxalq əlaqələri gücləndirməyə çalışırıq. Bu yaxınlarda ABŞ-da səfərdə oldum. ABŞ Konqresində bir çox görüşlər keçirdim. Orada onlara deyirdim ki, Azərbaycandan ilk dəfə bir hərəkat Konqresə gedib 20-yə yaxın konqresmenlə görüşür. Konqresmenlərlə görüş zamanı onlar məndən soruşdular ki, nəyə görə başqa siyasi partiyalar da səfərə gəlmir? Çünki Belarusiya müxalifəti hər zaman gəlib burada görüşlər keçirirdi. Bizim siyasi partiyaların bu cür səfərlər etməməsinin obyektiv, subyektiv səbəbi var. Düşünürəm ki, hədəfi olan siyasi partiya və ya hərəkat beynəlxalq əlaqələrini ciddi qurmalıdır. Biz də bu yöndə çalışırıq. Yaxın zamanda Avropa səfərim olacaq. Əslində fevralın 21-i İngiltərəyə getməli idim. İngiltərənin məşhur Mançestr Universitetinin demokratiya mükafatını alacaqdım. Ondan sonra Avropa Birliyinin, Almaniyanın və digər ölkələrin parlamentlərində görüşlərimiz olacaqdı. Ancaq idarə heyəti ilə qərarlaşdırdıq ki, bu səfəri təxirə salaq.

- Səbəb?

- Bizim ölkə daxili ilə bağlı bəzi planlarımız var. Rayon şöbələrini aktivləşdirmək istəyirik və Respublika müşavirəmiz var. 500-600 nəfərlə böyük görüşümüz olacaq. Ondan sonra xarici səfərlərə başlayacağıq. Düşünürük ki, bu il vizionumuzu daha ciddi göstərək.

- D18 Hərəkatının qarşısına qoyduğu əsas məqsəd nədir?

- D18 Hərəkatının əsas məqsədlərindən biri illərdir Azərbaycan siyasətində olan qütbləşməni dağıtmaqdır. İndiyə qədər bir iqtidar var idi, bir də onlara qarşı ənənəvi mübarizə aparan müxalifət. Bu qütb dağılacaqsa, yeni simalar ortaya çıxacaqsa, Azərbaycanda dəyişiklik daha da labüdləşəcək. İnsanlarda ümid yaranacaq. Azərbaycan insanında yeddidən yetmiş yeddiyə hər kəs narazıdır, ancaq etirazçı deyil. Etirazçı olmaq üçün insanlar prosesə və prosesdə olan siyasi aktorlara ümid olmalıdır. Bu gün prosesdə olan siyasi aktorların çoxu 20 ildən çoxdur ki, bu işin içərisindədir. Onların bəziləri haqqında "hakimiyyətə işləmək", bəziləri haqqında "daha radikal tip" təsəvvürü formalaşıb. Yəni, onları müxtəlif qruplara bölürlər. Onlar haqqında fikir birmənalı deyil. Yeni sima olacaqsa, insanlarda ümid də yaranacaq. Yeni sima yaratmaq və yeni qüvvə olmaq çox çətin bir məsələdir. Çünki burada həm iqtidarı qarşına alırsan, həm də illərdir müxalif postunda qalan qüvvələri qarşına alırsan. İki cəbhəni də qarşına aldığın üçün mətbuat problemi yaranır. Hər iki cəbhə sənin əleyhinə kampaniya aparır. Çox çətin bir prosesdir, ancaq nə qədər çətin olsa da bu proses yaradılmalıdır. Qarşımıza qoyduğumuz əsas məsələlərdən biri də cümhuriyyət dəyərlərini yaymaqdır. 2018-ci ildə Cümhuriyyətin 100 illiyidir.

- Ənənəvi müxalifətdən fərqiniz nədir?

- Ənənəvi müxalifətdən fərqimiz yeni adla, yeni sima ilə olmur. Azərbaycanda 55-56 qeydiyyatdan keçmiş partiya var. Son 5-6 ildə yaranan 3-4 siyasi partiyaya baxdıqda görürük ki, onlar yeni adamlardır. Ancaq yanaşma və çıxışlar ənənəvidir. Yeni qüvvənin yanaşması, baxışları fərqli olmalıdır. Bir fərqimiz odur ki, şəxsiyyətlər üzərində dava aparmırıq. Biz ideoloji çətir altında birləşmirik. Biz bütün ideologiyaları bir araya yığmaq istəyirik. Siyasi, dini, milli ideologiyasından asılı olmayaraq hər kəsə qucaq açan bir hərəkatıq.

- Bir çoxları deyir ki, D18 Hərakatı və Ruslan İzzətli nə qədər də ənənəvi müxalifət olmadığını desə də, ənənəvi müxalifətin dili ilə danışır...

- Kimsə açıqlamamda və çıxışımda qarşı tərəfin şəxsiyyətinə təhqir görə bilməz. Kimsə deyə bilməz ki, çıxışım və yazımda kiminsə ailəsini və keçmişini təhqir etmişəm, bəziləri kimi "bunlar ermənidir, bunlar kürdlərdir" kimi fikirlərimizi heç eşidə bilməz. Bəzi siyasi partiyalar və hərəkatlar kimi insanları və ətrafımı aldada bilmərəm. Siyasətdə sevgi və inamın qabardılmasının tərəfindəyəm. Nə qədər "basqı var", "məni tuturlar", "məni döyürlər" deyəcəyiksə, insanlar siyasətdən qaçacaqlar və biz də hakimiyyətin maraqlarına xidmət edəcəyik. Siyasətin qorxulu olduğu görünəcək və yeni simalar siyasətə gəlməyəcəklər. İnsanlar qorxulu yerə niyə gəlsinlər? Biz isə deyirik ki, siyasətdə olanlar daha intellektualdırlar və ölkələrini daha çox düşünürlər. Bura o qədər də qorxulu yer deyil. Regionlarda adamlar elə bilir ki, bir səngər var, bir tərəfdə YAP-ın üzvləri, digər tərəfdə də biz durmuşuq. Qalxanı güllə ilə vururlar. Bu qətiyyən belə deyil. Bu gün Siyavuş Novruzov bizim ofisə gələr və onu hörmətlə qarşılaya bilərəm. Sabah YAP-da bir pis hadisə baş verə bilər, gedib onlara başsağlığı verərəm. Bizim YAP-la siyasi düşüncə fərqimiz var. Biz deyirik ki, ölkə bu idarəetmə ilə uçuruma gedir. Onlar da deyir, sizin yanaşmanız ölkəni uçuruma aparır. Bizim aramızdakı fərq budur. Mənim bu ölkənin nə birinci, nə beşinci, nə də mininci şəxsi ilə problemim yoxdur. Mənim şəxsi və kiminsə şəxsiyətinə qarşı mövqeyim yoxdur. Parlamentdə kifayət qədər dostlarım var. Hökuməti ən yüksək səviyyədə tərifləyən yaxşı münasibətdə olduğumuz adamlar var. Onlar mənim mövqeyimi, mən də onların mövqeyini bilirik. Bəzən siyasi düşüncələrimiz məişətimizdə də yer alır. Birimizin xeyir işi olur getmirik, hüzürümüz olur, getmirik. Bir-birimizə bəzən küçədə salam vermirik. Bunlar aradan qalxmalıdır. Dünyanın hər yerində siyasət meydanı başqadır, məişət isə başqadır. Bu ölkənin vətəndaşlarıyıq, bölə bilməyəcəyimiz heç nə yoxdur və bir-birimizə sahib çıxmalıyıq.

- İnsanlarımızın bəzilərində belə bir fikir formalaşıb ki, siyasət çirkin bir oyundur, siyasətçilər də çirkin oyunçular...

- Azərbaycan siyasətində bu var. Adamların baxışı, yanaşması siyasəti daha çox cılızlaşdırır. Bəzən baxıram, ölkənin dəyişməsini, Avroatlantik məkana inteqrasiyasını istəyən bir lider sosial şəbəkədə elə bir şeyə fikir bildirir ki, birinci sinif uşağı belə ifadə işlətməz. Biz "hərşeyşünas" olmamalıyıq. Bir müğənninin klipi plagiatdırsa, ona münasibət bildirməməlisən. Siyasi lider olduğu postun məsuliyyətini anlamalıdır. İnsanlar olduqları yerin məsuliyyətini anlamayacaqsa, o halda alverçidən başqa bir şey olmayacaqlar. Seçkidə gördüm ki, nə qədər insanın siyasətə marağı artdı...

- Tez-tez müsahibələr verirsiniz, mediaya çıxırsınız. İnsanlar fikirləşir ki, Ruslan İzzətli kiminsə adamıdır. Ruslan İzzətli kimin adamıdır?

- Azərbaycanda siyasəti bilən varsa, ömürlərində bir dəfə kitab oxuyublarsa, onlar görərlər ki, Ruslan İzzətli kimin adamıdır. Mənim yanaşmamı, mövqeyimi hansısa siyasi bir partiya, onun lideri ortaya qoysun, deyərəm ki, o çox obyektiv adamdır. Əgər hökumətə satılıb, hakimiyyəti tənqid edə bilirsənsə, jurnalist zəng edib açıqlama alanda "filankəsi vurma" deyirsə və bu, hökumətə işləməkdirsə, qoy hər kəs hökumətə işləsin və işləyənləri də alqışlayıram.

- Hətta deyirlər ki, Ruslan İzzətli hökumətdən pul alır...

- Bilirsiniz, Allah Allahdır, onu da qəbul etməyənlər var. Hər kəs bizi sevəsi deyil. İnsanlarda da psixoloji yanaşma var. Baxırlar, bu adamın 26 yaşı var, qorxmadan çəkinmədən hökuməti tənqid edir, insanların haqqını müdafiə edir, məndən 10 yaş böyüklər axı hökumətə məddahlıq etməklə pul qazanırlar, bəs nə deməlidirlər? Deməyəcəklər ki, "Ruslan kişi adamdır". Başlayırlar qara yaxmağa. Qızıl nə qədər palçığa düşürsə düşsün, o heç zaman qiymətini itirməz. Zaman ən böyük hakimdir. Zaman hər şeyi göstərəcək. Bizim bu gün genişlənməyimiz, böyüməyimiz qıcıq yaradır. Siyasət adamlarının mənim haqqımda fikri normaldır.

- Ruslan İzzətli hərəkatı nə ilə saxlayır?

- Siyasətdə ağlamağın, ah-vah etməyin, qəmli bayatı deməyin tərəfdarı olmamışam. Bəzən, biz ofisin kommunal xərclərini belə günlərlə gecikdiririk. Bəzən, hansısa işçilərin pulunu vermək üçün çətinlik çəkirik. Ayın 11-də verəcəyimiz maaşı 20-si verə bilirik. Bir siyasi hərəkat mobil bir təşkilat deyilsə, ofis tutmaq gücündə deyilsə, sabah bu hərəkat hansı uğurlara imza ata bilər? Əqidən üçün ayda 20-30 manatından keçə bilmirsənsə hansı əqidədən danışa bilərsən? Bu bizim hərəkatda var. Digər partiyaların da liderləri çıxıb gəlirləri haqqında məlumat versin, mən də verim. Gəlib bizi də araşdırsınlar, onları da, görsünlər bizim maliyyə durumumuz hansı səviyyədədir, gördüyümüz iş hansı səviyyədədir. Kənardan çox ciddi maliyyəsi olan siyasi hərəkat kimi görsənə bilərik, ancaq həqiqətdə isə çox çətindir. Mən digər siyasi liderlər kimi, "evimə basqın oldu", "qərargahım partladıldı", "qaynım həbsdədir" kimi şeylər demirəm. Çünki insanları ağu ilə, bayatı ilə aldatmaq istəmirəm. Kifayət qədər problemləri olan insanları öz problemlərim ilə yükləmək istəmirəm. Heç üzvlərimizi də yükləmək istəmirəm. Problemlərimizi yazsam, kimsə gəlib dəstək olacaq? Yox, insanlar o vəziyyətdə deyillər. Onlar 120 manatlıq kreditlərini verə bilmirlər. Əgər kimsə hərəkatda özək sədrliyinə, müavinliyə, rayon təşkilatı sədrliyinə gəlib çıxıbsa, onun da borcudur ki, hərəkatını ayaqda saxlasın. Biz mobil bir təşkilat qurub bunu etmişik. Digərləri bunu edə bilməyibsə, işi-gücü çayxanalarda onu-bunu tənqid etmək, onun-bunun haqqında danışmaqdırsa, bizim onlar haqqında fikir söyləmək və onlara zaman ayırmağa vaxtımız yoxdur.

- Cəmiyyətdə belə bir fikir var, əgər kimsə müxalifət lideridirsə, eynilə bir vətəndaş kimi 120 manatlıq kreditini ödəyə bilməməlidir. Müxalifət lideri də ac olmalıdır.

- İngilislərin bir gözəl sözü var, ağıllı adam heç vaxt ac olmaz. Bir yerə gəlib çıxmışamsa, siyasi hərəkat qurmuşamsa və onun sədriyəmsə, deməli, mənim bir çevrəm var. Azərbaycanda siyasi bir hərəkat qurmaq və mətbuatın gündəmində qalmaq çox ağır bir məsələdir. Türkiyədə təhsil almışam, orada çoxlu dostlarım var, bəzi qurumlar var ki, onlara yazı yazıram, ekspert kimi çalışıram. Şəxsi problemlərimi bununla həll edirəm. Şəxsi problemim varsa, onu danışmağı sevmirəm və öz şəxsiyyətimə sığışdırmaram ki, mənim bu problemim var və bunu ödəyə bilmirəm. Biz insanları sıxıntılarımızla yox, gülərüz, pozitiv, inamlı danışığımızla kökləməliyik. Bizim fərqimiz budur. Biz cəmiyyətdəki bu fikri dağıtmalıyıq.

- Müşahidə etdiyim qədərilə normal şəraitli ofisiniz var. Ofisdə xeyli sayda işçiləriniz var. Ancaq bəzi siyasi təşkilatlar var ki, onların ofisi də, işçiləri də ancaq "Facebook" profilindədir. Maraqlısı ondadır ki, onlar gündəmdə qala bilirlər...

- Sosial şəbəkə gördüyün işləri göstərmək üçün bir yerdir. Biz sosial şəbəkələrdə ancaq görüşlərimizi, işlərimizi yayımlayırıq. Biz hələ D18 Hərəkatından razı deyilik. Mənim xəyalımda qurduğum hərəkat bu cür deyil. D18 mənim istədiyim hərəkatın hələ yüzdə biri deyil. Bunun da obyektiv səbəbləri var. Televiziyaya çıxa bilsəm, bir ilə Türkiyədəki CHP, AKP kimi partiyanı burada quraram.

Ruslan İzzətli ilə müsahibənin sonunda Milli Şuranın sədri Cəmil Həsənli D18 Hərəkatının ofisinə gəlir.

Ruslan İzzətli bildirir ki, hər bazar günləri Cümhuriyyət Akademiyasının tanınmış şəxslərinin görüşü keçirilir. Görüşdə D18 Hərəkatının üzvləri və istənilən şəxslər iştirak edə bilər. O, bildirir ki, Cümhuriyyət Akademiyasının bu günkü qonağı Milli Şuranın sədri Cəmil Həsənlidir və mövzu da Məhəmməd Əmin Rəsulzadə və Azərbaycan Cümhuriyyətidir.

Cəmil Həsənli ilə görüşüb, görüş iştirakçılarına uğur diləyərək D18 Hərəkatının ofisindən çıxırıq.