Mağazanı yarıb, yandıran keçmiş məhkum: "Tam yandıra bilərdim, qorxutmaq istədim" - VİDEO
"Guya mən onun üstünə vergiləri göndərmişəm"
Gəncədə əvvələr şəriki olduğu mağazanı yarıb sonra yandıran şəxs saxlanılıb.
Gəncə şəhər sakini Ərşad Zərgərov Kəpəz rayon Polis İdarəsinə müraciət edərək, Nəriman Nərimanov prospektində ona məxsus mağazadan oğurluq edildiyini, daha sonra mağazanın yandırıldığını bildirib.
Gəncə şəhər Baş Polis İdarəsi və Kəpəz rayon Polis İdarəsinin əməkdaşlarının həyata keçirdikləri əməliyyat təbdirləri nəticəsində cinayəti törədən şəxs, əvvəllər iki dəfə məhkumluq həyatı yaşayan Azər Zeynalov saxlanılıb.
Məlumata görə saxlanılan Azər Zeynalovla Ərşad Zərgərov mağazanı əvvəl birlikdə işlədiblər. Sonra aralarında yaranan narazılıq səbəbindən Azər Zeynalov mağazanı yararaq, yandırıb.
Azər Zeynalov - saxlanılan şəxs: “Mən oğurluq eləməmişəm, öz mallarımı götürmüşəm. Mən ondan pulumu ala bilmirəm. Bir yerdə getmişik Gürcüstana bir yerdə gətirmişik. Sonra aramızda narazılıq olub, mağazanı vermişəm ona. Mənə dedi ki, guya mən onun üstünə vergiləri göndərmişəm. Dedi ki, sənin pulunu vermirəm, o pulu cəriməyə vermişəm. Dedim ki, mən göndərməmişəm, pulumu ver, dedi ki, vermirəm. Mən də salyarka töküb yandırdım mağazanı. Tam yandırmaq istəmədim, qorxutmaq istəyirdim, istəsəydim, tam yandırardım”.
Faktla bağlı Gəncə şəhər Baş Polis İdarəsində cinayət işi açılıb, araşdırma aparılır. (Region TV)
