"Stratfor çox zaman səfeh fikirlər bildirməklə məşğuldur"

"Stratfor" araşdırma mərkəzi üçüncü dünya müharibəsinin başlayacağı haqda proqnoz verib.

Təşkilatın hesabatında bildirilir ki, üçüncü dünya müharibəsinin başlanması üçün hazırda münbit şərait var.

Bundan əlavə mərkəzin analitikləri Rusiyanın Türkiyə və Polşa ilə müharibə edə biləcəyi ehtimalını da vurğulayıblar.

"Stratfor" araşdırma mərkəzinin analiz hesabatı ilə bağlı politoloq Zərdüşt Əlizadə Ölkə.Az-a danışıb:

""Stratfor" araşdırma mərkəzinin yaydığı hesabatlar ara qızışdırmaq, su bulandırmaqdan başqa bir şey deyil. Üçüncü dünya müharibəsi təhlükəsi yoxdur. Heç kəs ölmək istəmir.

Üçüncü dünya müharibəsi bəşəriyyətin sonu deməkdir. Ona görə də, heç kəs müharibə etmək istəmir. Bəli, lokal müharibələr var, amma üçüncü dünya müharibəsi isə o deməkdir ki, mütləq nüvə silahı işə salınacaq. Əgər üçüncü dünya müharibəsi olsa, onda dördüncü dünya müharibəsi nizə ilə, oxla, dəyənəklə olacaq. Bəşəriyyət ibtidai icma quruluşuna dönəcək.

"Stratfor" araşdırma mərkəzinin işi ara qarışdırmaq və siyasi möhtəkirlik etməkdir. "Stratfor" araşdırma mərkəzi dərin təşkilat deyil. Sadəcə yaxşı maliyyə qaynağı var və özlərini yaxşı piar edirlər, ancaq çox zaman səfeh fikirlər bildirməklə məşğuldurlar".

Səxavət Məmməd
Ölkə.Az