"Bu Forum Azərbaycanın beynəlxalq aləmdə çox böyük nüfuzunun olduğunu göstərir"
Bu gün Bakıda Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzinin təşkilatçılığı ilə "İnterAaction Council", Madrid Klubu, İsgəndəriyyə Kitabxanası, Roma Klubu, Dünya Elmlər və Mədəniyyət Akademiyası ilə əməkdaşlıq çərçivəsində IV Qlobal Bakı Forumu keçirilir.
Forumda Azərbaycan prezidenti İlham Əliyevlə yanaşı Albaniya, Monteneqro, Bolqarıstan, Makedoniya, Bosniya və Herseqovina və Gürcüstan prezidentləri, 27 sabiq prezident və 23 sabiq baş nazir də daxil olmaqla, 53 ölkədən 300-dən çox nümayəndə iştirak edir.
Forumda münaqişələrin qarşısının alınmasında dinlərarası dialoqun rolu, miqrasiya, multikulturalizm və inteqrasiya məsələləri, o cümlədən qlobal təhlükəsizliyin təmin olunmasında radikallaşma və miqrasiya amillərinin rolu kimi mühüm məsələlər müzakirə olunacaq.
IV Qlobal Bakı Forumu ilə bağlı millət vəkili Araz Əlizadə Ölkə.Az-a qısa açıqlama verib:
"Bu forum onu göstərir ki, Azərbaycanın beynəlxalq aləmdə çox böyük nüfuzu var. Gündəlikdə olan məsələlər hamısı aktualdır. Multikulturalizm, ərazi bütövlüyü, dinc yaşamaq və s. kimi məsələlər forumda öz əksini tapıb.
Ən əsası da odur ki, prezident İlham Əliyev çıxışında dünyanın ədalətsiz olduğunu, Qarabağ məsələsinə dünyanın biganəliyini, BMT Təhlükəsizlik Şurasının öz qətnamələrinə hörmət etmədiyini xüsusi vurğuladı. Bu da forum iştirakçıları tərəfindən çox müsbət qarşılandı".
Səxavət Məmməd
Ölkə.Az
