Həftənin icmalı
Dörd rayonda partlamamış hərbi sursat tapıldı
11.04.2016
Azərbaycan Respublikası Ərazilərinin Minalardan Təmizlənməsi üzrə Milli Agentlik (ANAMA) aprelin 7-dən 11-dək Tərtər, Ağcabədi, Ağdam və Goranboy rayonlarında aşkar olunan partlamamış hərbi sursat (PHS) haqqında hesabatı təqdim edib.
ANAMA-nın mətbuat xidmətindən Ölkə.Az-a bildiriblər ki, agentliyin mütəxəssisləri tərəfindən Tərtər rayonunun Qapanlı kəndində 42 ev və həyətyanı sahəyə baxış keçirilib. Nəticədə 85 millimetrlik iki, 122 millimetrlik bir və 120 millimetrlik dörd top mərmisi aşkar edilərək götürülüb. Həmin sursatın ətrafında 5400 kvadratmetr ərazi yerüstü yoxlanılıb və heç bir təhlükəli sursat aşkar edilməyib. Qarağacı kəndində 10 ev və həyətyanı sahəyə baxış keçirilib və sursatın tam partladılmış olması müəyyən edilib. Ümumilikdə Tərtərin Qapanlı və Qarağacı kəndlərində yeddi partlamamış hərbi sursat götürülərək zərərsizləşdirilib.
TQDK ləğv olundu — Prezidentdən sərəncam
11.04.2016
Prezident İlham Əliyev aprelin 11-də Azərbaycan Respublikasının Dövlət İmtahan Mərkəzi publik hüquqi şəxsin yaradılması haqqında Fərman imzalayıb.
Ölkə.Az xəbər verir ki, fərman təhsil müəssisələrinə tələbə qəbulunun beynəlxalq təcrübəyə uyğunlaşdırılmasını nəzərdə tutur.
Dövlət İmtahan Mərkəzi publik hüquqi şəxs Azərbaycanda dövlət qulluğu üçün kadrların müsabiqə əsasında seçilməsini, ümumi təhsil pilləsində təhsilalanların yekun qiymətləndirilməsini, orta ixtisas təhsili müəssisələrinə, ali təhsil müəssisələrində ali təhsilin bakalavriat və magistratura səviyyələrinə, Azərbaycan Milli Elmlər Akademiyasında magistratura səviyyəsinə mərkəzləşdirilmiş qəbul imtahanlarının keçirilməsini təşkil etmək məqsədilə yaradılır.
Azərbaycanda yeni qurum yaradıldı
11.04.2016
Azərbaycan prezidenti İlham Əliyev “Ərzaq məhsullarının tədarükü və təchizatı” Açıq Səhmdar Cəmiyyətinin yaradılması haqqında sərəncam imzalayıb.
Ölkə.Az-ın məlumatına görə, “Ərzaq məhsullarının tədarükü və təchizatı” Açıq Səhmdar Cəmiyyətinin yaradılması kənd təsərrüfatı məhsullarının istehsalını və emalını stimullaşdırmaq, kənd təsərrüfatı məhsulları istehsalçılarının inkişafını təmin etmək, ərzaq məhsullarının keyfiyyətini daha da artırmaq, dövlət vəsaitlərindən səmərəli istifadəni təmin etmək, regionlarda kənd təsərrüfatı ilə məşğul olan əhalinin sosial rifahının yaxşılaşdırılmasına zəmin yaratmaq, dövlət sifarişi ilə ərzaq məhsullarının satın alınmasının mərkəzləşdirilmiş qaydada həyata keçirilməsini təmin etmək məqsədi daşıyır.
İƏT Dağlıq Qarabağla bağlı təmas qrupu yaradır
12.04.2016
İslam Əməkdaşlıq Təşkilatı (İƏT) Dağlıq Qarabağ münaqişəsinin nizamlanması məsələsi üzrə təmas qrupu yaradır.
Ölkə.Az Trend-ə istinadən xəbər verir ki, bunu Türkiyənin xarici işlər naziri Mövlud Çavuşoğlu İƏT Xarici İşlər Nazirləri Şurasının iclasında çıxış edərkən deyib.
Azərbaycanlı biznesmendən ermənilərə pul təklifi: Əsgərə 10, zabitə 15 min dollar
12.04.2016
Ukrayna Qafqaz Xalqları Konqresinin İdarə Heyətinin sədri Paşa (İlisuyski) Məmmədov Qarabağda yerləşən erməni əsgərlərə səslənib.
Ölkə.Az teref.info-ya istinadən xəbər verir ki, o, erməni əsgər və zabitlərinə təslim olmaq təklifi edib.
Hər təslim olan əsgərə 10 000, zabitə isə 15 000 dollar pul mükafatı təsis etdiyini deyən Paşa Məmmədov ermənilər “O torpaqlar sizin deyil, heç sizin atalarınızın belə deyil, özgə torpağına təcavüz edərək ölməyə dəyərmi?”
Təmas xəttində zərərsizləşdirilən 7 erməni hərbçinin adı açıqlanıb
12.04.2016
Ermənistan Müdafiə Nazirliyi Azərbaycanın işğal altında olan Dağlıq Qarabağ bölgəsində təmas xəttində aprelin 2-5-ində atəşkəsin pozulması nəticəsində Azərbaycan əsgərləri tərəfindən zərərsizləşdirilən daha 7 hərbçisinin adını açıqlayıb.
"Report" Ermənistan KİV-inə istinadən xəbər verir ki, bu ölkənin Müdafiə Nazirliyinin mətbuat katibi Artsurun Ovanisyan özünün "facebook" səhifəsində onların adlarını yazıb: polkovnik Aleksan Arakelyan (1982-ci ildə anadan olub), çavuş Adam Saakyan (1996), sıravlər - Norik Sarqsyan (1996), Boris Ozmanyan (1996), Jora Yesayan (1996), Azat Simonyan (1996), Artur Gevorkyan (1997).
Məleykə Abbaszadə TQDK-nın ləğvindən danışdı
12.04.201
“Dövlət İmtahan Mərkəzinin yaradılması ali məktəblərə qəbul olmağa hazırlaşan abituriyentlərə heç bir təsir göstərməyəcək. Onların işinə heç kim zərər vurmayacaq. Bu Mərkəzin yaradılması idarəetmədə olan bir dəyişiklikdir”.
Ölkə.Az xəbər verir ki, bunu Trend-ə Tələbə Qəbulu üzrə Dövlət Komissiyasının (TQDK) sədri Məleykə Abbaszadə deyib.
Hazırda sənəd qəbulunun aparıldığını xatırladan M.Abbaszadə qeyd edib ki, son dəyişikliklər bu prosesə təsir göstərməyəcək və sənəd qəbulu davam edəcək.
Provayderlər valideynlərin xahişi ilə porno-kontenti bağlaya biləcəklər
12.04.2016
Milli Məclisin Ailə, qadın və uşaq məsələləri komitəsinin bu gün keçirilən iclasında iki məsələ - “Uşaq hüquqları haqqında” və “Telekommunikasiya haqqında” qanunlara təklif edilən dəyişikliklər layihəsi müzakirəyə çıxarılıb.
Ölkə.Az-ın Report-a istinadən verdiyi xəbərinə görə, layihələr barədə məlumat verən komitə sədri Aqiyə Naxçıvanlı bildirib ki, hər iki layihə prezidentin təqdimatı ilə parlamentə daxil olub.
“Uşaq hüquqları haqqında” qanunun 15-ci maddəsinə təklif olunan əlavəyə əsasən, uşaqların sağlamlığına və inkişafına ziyan vuran informasiyadan qorunması müvafiq qanunla tənzimlənir. Dəyişiklik uşaqların sağlamlığına və inkişafına ziyan vuran informasiyadan onların qorunmasının müvafiq qanunla tənzimlənməsini nəzərdə tutur.
“Telekommunikasiya haqqında” qanuna isə 3 yeni maddənin əlavə edilməsi təklif olunur.
Məleykə Abbaszadəyə yeni vəzifə verildi
12.04.2016
Prezident İlham Əliyev yeni yaradılan Dövlət İmtahan Mərkəzinin Direktorlar Şurasına sədr təyin edilməsi barədə sərəncam imzalayıb.
Dövlət başçısının sərəncamı ilə Məleykə Mehdi qızı Abbaszadə Azərbaycan Respublikasının Dövlət İmtahan Mərkəzinin Direktorlar Şurasının sədri vəzifəsinə təyin edilib.
Qeyd edək ki, M. Abbaszadə ləğv edilən TQDK-nın də sədri idi.
I sinfə sənəd qəbulu başa çatdı
12.04.2016
Bakı Şəhəri üzrə Təhsil İdarəsi (BŞTİ) I sinfə elektron sənəd qəbulu ilə əlaqədar məlumat yayıb.
İdarənin mətbuat xidmətindən verilən məlumata görə, təhsil nazirinin 19 fevral tarixli əmrinə əsasən, 2016-2017-ci dərs ili üçün I sinfə şagird qəbulunun elektron sistem vasitəsi ilə həyata keçirilməsi prosesinə martın 1-dən başlanılıb.
Hazırda mektebeqebul.edu.az saytı vasitəsilə 33725 valideyn övladlarının I sinfə qəbulu ilə bağlı elektron qeydiyyatdan keçib. Onlardan 28247 nəfər valideyn məktəb, lisey və gimnaziyalara sorğu yerləşdirib.
Bundan başqa, 24559 nəfəri övladlarının təhsil alması üçün ümumtəhsil məktəblərini, 3688 nəfəri isə lisey və gimnaziyaları seçib.
Bu günə olan rəsmi məlumata əsasən, 17287 nəfər oğlan, 15268 nəfər qız I sinfə qəbul üçün elektron sistemdə qeydiyyatdan keçirilib. Onlardan 2838 nəfəri 6 yaşı tamam olmayanlardır.
Azərbaycana keçmək istəyən fransalı saxlanıldı
13.04.2016
Dövlət Sərhəd Xidməti tərəfindən aprelin 5-də Qazax rayonunun Şıxlı kəndi ərazisində yerləşən sərhəd zastavasının xidməti sahəsində Gürcüstandan Azərbaycana keçərkən Fransa vətəndaşı, 27.09.1979-cu il təvəllüdlü Malavialle Olivye Alain saxlanılıb.
Dövlət Sərhəd Xidmətinin Mətbuat Mərkəzindən bildirilib ki, Fransanın Azərbaycandakı səfirliyinin məlumatına əsasən, qeyd olunan şəxs Fransa, Polşa, Serbiya, Slovakiya, Rumıniya kimi ölkələrdə törətdiyi qanunsuz hərəkətlər, zorakılıq halları, oğurluq, ictimai əmlaka ziyan vurma, ictimai asayişin pozulması, narkotik vasitələrin istifadəsi ilə əlaqədar cinayətlərə görə dəfələrlə məsuliyyətə cəlb edilib.
Saxlanılan şəxs barəsində müvafiq tədbir görülməsi üçün Dövlət Miqrasiya Xidmətinə təhvil verilib.
Ağ Evin saytında Dağlıq Qarabağ münaqişəsi ilə bağlı petisiyada imzaların sayı 100 mini keçib
13.04.2016
Ağ Evin rəsmi saytında Dağlıq Qarabağ münaqişəsi ilə bağlı yaradılmış petisiyada imzaların sayı 100 mini keçib.
APA-nın məlumatına görə, “Ədalətin Bərqərar Olunması və Böyük Fəlakətin Qarşısının Alınması Naminə” adlı petisiya layihəsində Obama administrasiyasından Ermənistan hərbi qüvvələrinin işğal olunmuş Azərbaycan ərazisindən çıxarılmasına dəstək tələb edilir.
Petisiya Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) tərəfindən yaradılıb.
Daxili İşlər Nazirliyi yeni xidmət istifadəyə verdi
13.04.2016
Daxili İşlər Nazirliyinin vətəndaşlar üçün Elektron xidmət kabineti yaradıb.
DİN-dən Ölkə.Az-a verilən məlumata görə, buna səbəb martın 1-dən etibarən yeni İnzibati Xətalar Məcəlləsinin qüvvəyə minməsi olub.
Belə ki, Daxili İşlər Nazirliyinin müvafiq sistemlərində yeni məcəllənin maddələrinə uyğun olaraq müvafiq dəyişikliklərin tətbiqinə başlanılıb.
Bu istiqamətdə inzibati xəta haqqında iş üzrə qərar qəbul edilməmiş (qərarsız) protokollar barədə məlumatların əldə edilməsi və onların ödənişinin həyata keçirilməsi üçün Daxili İşlər Nazirliyinin mövcud “Elektron Ödənişlər Sistemi”ndə əlavə funksionallıqlar işlənib hazırlanıb.
MN: Biz münaqişə ilə bağlı beynəlxalq hərbi tribunalın yaradılmasında maraqlıyıq
13.04.2016
“Azərbaycan ümumilikdə münaqişə ilə bağlı, eləcə də son hadisələrlə əlaqədar beynəlxalq hərbi tribunalın yaradılmasında erməni tərəfindən daha çox maraqlıdır”.
Ölkə.Az xəbər verir ki, bu barədə APA-ya Azərbaycan Müdafiə Nazirliyinin mətbuat xidmətindən bildirilib. Nazirlikdən deyiblər ki, məhz o zaman Ermənistanın hazırkı kriminal hərbi-siyasi hakimiyyətinin mahiyyəti, onun azərbaycanlılara qarşı saysız-hesabsız qanlı cinayət əməlləri törətməsi aydın sübuta yetiriləcək: “Təkcə Xocalışəhərində dinc azərbaycanlı əhaliyə qarşı həyata keçirilən genosid siyasəti kifayət edir ki, Ermənistan rəhbərliyi və erməni səhra komandirləri beynəlxalq cinayət məhkəməsinə verilərək layiqli cəzalarını alsınlar”.
Qeyd edək ki, Ermənistan müdafiə nazirinin müşaviri Alik Avetisyan 2-5 apreldə baş verənlərlə bağlı beynəlxalq tribunalın yaradılması üçün BMT-yə müraciət edə biləcəklərini söyləyib.
Qeyd edək ki, Dağlıq Qarabağ münaqişəsinin müasir mərhələsi 1988-ci ildə Ermənistan SSR-in Azərbaycan SSR-ə qarşı ərazi iddiaları əsasında başlayıb.
Kür çayında biogen maddələrin miqdarı normadan dəfələrlə artıqdır
13.04.2016
Ekologiya və Təbii Sərvətlər Nazirliyinin (ETSN) Ətraf Mühit üzrə Milli Monitorinq Departamenti Kür və Araz transsərhəd çaylarının, onların transsərhəd qollarının çirklənmə vəziyyətini öyrənmək məqsədilə aprel ayının I ongünlüyü üçün növbəti monitorinqləri həyata keçirib.
ETSN-nin mətbuat xidmətindən verilən məlumata görə, aprel ayının I ongünlüyündə Kür çayında suyun sərfi mart ayının III ongünlüyünə nisbətən 34 m3/san artaraq 268 m3/san təşkil edib.
Monitorinqin nəticələrinə əsasən Gürcüstan və Ermənistan ərazilərindən təmizlənmədən birbaşa su obyektlərinə axıdılan məişət tullantıları və sənaye müəssisələrinin çirkab sularının təsiri nəticəsində Kür çayı və onun qollarında biogen maddələrin miqdarının normadan dəfələrlə artıq olması müşahidə olunub.
Suyun tərkibindəki spesifik çirkləndiricilərdən fenollar Şıxlı-2 məntəqəsində 3.4, Ağstafaçayda 3.1, Ağstafaçay su anbarında isə 3.5 dəfə yol verilən qatılıq həddini (YVQH) keçib.
Mütəxəssis: "Azərbaycanda bu il quraqlıq olacaq"
13.04.2016
Son illər Azərbaycanda küləyin sürəti və yağıntıların miqdarı azalıb.
Ölkə.Az xəbər verir ki, Azərbaycan Milli Elmlər Akademiyasının (AMEA) Coğrafiya İnstitutunun İqlim və aqroiqlimşünaslıq şöbəsinin baş elmi işçisi, coğrafiya üzrə fəlsəfə doktoru Məhərrəm Həsənov APA-ya deyib ki, ölkədə çoxillik normaya nisbətən küləyin sürətinin və yağıntıların miqdarının azalması davam edir. Onun sözlərinə görə, yağıntıların azalması tendensiyası ilə yanaşı, temperaturun artması müşahidə olunur.
M.Həsənov bildirib ki, bu il də ölkə ərazisində quraqlıq gözlənilir: “Ölkənin müəyyən ərazilərində, xüsusən Kü-Araz ovalığında quraqlıq olacaq. Bu da yağıntıların azalması və temperaturun artması nəticəsində baş verir. Çaylarda suyun səviyyəsinin artıb-azalması ilə bağlı dəqiq məlumat vermək hələki mümkün deyil. Çünki bunu atmosfer yağıntıları ilə bağlamsq bir az tezdir. Çayların suyunun yuxarı axınından daha çox istifadə olunur. Ona görə də suyun açağı aşağı axınında çayların suyu azalır və ya quruyur”.
Azərbaycanla sərhəddə dağıdıcı zəlzələ proqnozlaşdırılır
13.04.2016
Yerli hakimiyyətin zəif tikililəri gücləndirmək üçün vaxtı var.
Dağıstanda 2106 və ya 2017-ci ildə 6,6 maqnitudalı dağıdıcı zəlzələ proqnozlaşdırılır.
Bu barədə Rusiya Elmlər Akademiyasının Yer Fizikası İnstitutunun direktor müavini Yevqeni Roqojin bildirib.
“Şərqi Qafqaz üzrə proqnoz var. Bu Dağıstanın Azərbaycanla sərhəddə olan rayonudur - burada ya bu il, ya da gələn il güclü zəlzələ baş verə bilər. Biz 6-6,5 maqnitudalı zəlzələ proqnozladırırıq, bu təxminən 7-8 bal deməkdir”, - Roqojin deyib.
Sensasion açıqlama: 6 rayonun qaytarılması müzakirə edilir
14.04.2016
Ermənistan xarici işlər naziri Edvard Nalbandyan sensasion bəyanatla çıxış edib
Ölkə.Az AzVision.az-a istinadən xəbər verir ki, nazir Ermənistanın İctimai Telekanalına müsahibəsi zamanı Azərbaycan və Ermənistan arasında Qarabağ nizamlanması üzrə predmeti açıqlayıb.
Erməni nazirin sözlərinə görə, tərəflərin müzakirə etdiyi işçi sənədlər əvvəllər müzakirə edilənlərdir. Tərəqqiyə nail olunmamış sənədlər ATƏT-in Vyanadakı ofisinə saxlanmaq üçün verilir.
`Hələ ki saxlanmaq üçün verilməmiş sənəd Kazan sənədidir. Bütün digər şərhlər yersizdir`, - Nalbandyan deyib.
Cəbhəboyu kəndlərimiz minadan təmizlənir — VİDEO
14.04.2016
Hazırda xüsusi təlimatlı mobil çevik əməliyyat qrupları Füzuli, Ağdam, Goranboy və Tərtər rayonları ərazisində partlamamış silah-sursatların təmizlənməsi işlərini həyata keçirir.
Ölkə.Az Report-a istinadən xəbər verir ki, bu barədə Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) əməkdaşı məlumat verib.
O qeyd edib ki, təmizləmə cəbhəboyu ərazilərdə yerləşən 29 kəndin ərazisində aparılır: "Bu gün biz Tərtər rayonunun Qarağacı, Qapanlı və digər kəndlərinin ərazisinin partlamamış silah-sursatlardan təmizlənməsi işlərini aparırıq. Axtarışlar zamanı 10-a qədər partlamamış hərbi sursat götürülərək mərkəzi məhvetmə ərazisində zərərsizləşdirilib".
MN: Ermənistanın yaydığı məlumatlar yalandır
14.04.2016
Erməni tərəfi son döyüş əməliyyatları zamanı çoxsaylı itkilərinin bir qismini açıqladıqdan sonra Ermənistan ictimaiyyəti qorxu və vahimə içindədir.
Ölkə.Az xəbər verir ki, bunu Trend-in sorğusuna cavab olaraq Müdafiə Nazirliyindən bildiriblər.
Odur ki, Ermənistan kriminal hərbi-siyasi rejimi digər meyitləri aşkara çıxarmaq üçün yəqin ki, Azərbyacan ordusunun guya hər gün diversiya əməliyyatları keçirməsi barədə məlumatları hələ uzun müddət verəcək və ölülər barədə xəbər yayacaqdır.
Uğursuzluqlarını ört basdır etmək üçün onların belə bəhanələrdən başqa çıxış yolu yoxdur.
Azərbaycanda terror xəbərdarlığı — DTX açıqlama verdi
14.04.2016
Dövlət Təhlükəsizliyi Xidməti: "Azərbaycan Respublikasının təhlükəsizliyinə mümkün təhdidlərin qarşısının alınması üçün zəruri tədbirlər görülür və əməliyyat şəraitinə nəzarət olunur"
"Azərbaycan Respublikasının təhlükəsizliyinə mümkün təhdidlərin qarşısının alınması üçün digər hüquq-mühafizə orqanları ilə birgə zəruri tədbirlər görülür və əməliyyat şəraitinə nəzarət olunur".
Bunu, İsrailin terrorla mübarizə qərargahının bir sıra ölkələrdə, o cümlədən Azərbaycanda terror təhlükəsinin olması barədə Sputnik-in sorğusunu cavablandırarkən, Azərbaycanın Dövlət Təhlükəsizliyi Xidmətinin (DTX) İctimaiyyətlə əlaqələr şöbəsindən bildiriblər. DTX rəsmisi qeyd edib ki, Azərbaycanda təhlükəsizlik şəraiti yüksək səviyyədə təşkil olunub.
Dünyasını dəyişən azərbaycanlı zəvvarlara görə kompensasiya ödənəcək
14.04.2016
Azərbaycandan Həcc ziyarətinə gedəcək zəvvarlardan ziyarətdə dünyasını dəyişənlərin ailələrinə və ya ağır xəsarət alanlara kompensasiya ödənəcək.
Ölkə.Az xəbər verir ki, Qafqaz Müsəlmanları İdarəsindən (QMİ) APA-ya verilən məlumata görə, kompensasiyalar zəvvarların seçdikləri ziyarət xidməti növlərinə görə 5 və 6 min manata qədərdir.
Zəvvarlardan VİP ziyarət növünü seçənlər üçün 6 min, nisbətən ucuz ziyarət növünü seçənlər üçün isə 5 min manat nəzərdə tutulub. Bundan başqa, ağır xəsarət alanlara müvafiq olaraq müalicənin xərcinə görə kompensasiya veriləcək. Bu, sənədlərin qəbulu zamanı zəvvarla bağlanan müqavilədə əksini tapır.
Azərbaycan regionun ən zəngin ölkəsidir
14.04.2016
ABŞ-ın nüfuzlu "Global Finance Magazine" nəşri dünyada ən zəngin ölkələrinin reytinqini tərtib edib.
Ölkə.Az Report-a istinadən xəbər verir ki, siyahıya dünyanın 185 ölkəsi daxil edilib.
Dünyanın ən zəngin ölkəsi adına Qətər layiq görülüb. Bu ölkədə adambaşına düşən ÜDM 146,011 min ABŞ dolları təşkil edir. İkinci sırada Lüksemburq (94,167 min dollar), üçüncü yerdə isə Sinqapur (84,821 min dollar) qərarlaşıb.
Azərbaycan reytinq sıralamasında 64-cü yeri tutub. Ölkəmizdə adambaşına düşən ÜDM 18,913 min dollara bərabərdir. Region ölkələrindən Gürcüstan 113-cü (8,222 min dollar), Ermənistan isə 116-cı (7,748 min dollar) yerdə qərarlaşıb.
Reytinqdə Rusiya 51-ci (25,350 min dollar), Türkiyə 62-ci (20,299 min dollar), İran isə 72-ci (16,918 min dollar) pillədə yer alıb.
NATO rəsmisi Qarabağla bağlı brifinq keçirdi
15.04.2016
Müdafiə Nazirliyinin Beynəlxalq Hərbi Əməkdaşlıq İdarəsində NATO-nun Cənubi Qafqaz üzrə Əlaqələndirici Ofisinin rəhbəri Vilyam Lahu üçün "Aprelin 1-dən 7-dək qoşunların təmas xəttində yerləşən Azərbaycanın yaşayış məntəqələrinə və vətəndaşlarına qarşı erməni bölmələrinin təxribat fəaliyyətləri"nə dair brifinq verilib.
Ölkə.Az xəbər verir ki, brifinqdə erməni bölmələrinin Azərbaycanın yaşayış məntəqələrini ağır silahlardan aramsız atəşə tutması nəticəsində yerli infrastruktura dəymiş ziyan, eləcə də mülki əhali arasında ölən və yaralananlar barədə faktlar əsasında hazırlanmış məlumatlar təqdim edilib.
12 illik təhsillə bağlı — SON XƏBƏR
15.04.2016
"Azərbaycanda da 12 illik təhsilə keçid məsələsinin rəsmi sənədlərdə əks olunması bu prosesdə bir çox məsələlərin həllinə geniş imkan yaradır”
Ölkə.Az xəbər verir ki, bunu Təhsil Nazirliyinin şöbə müdiri Aydın Əhmədov jurnalistlər üçün keçirilən təlimdə deyib.
Onun sözlərinə görə, təhsil yükünün yüngülləşdirilməsi üçün 12 illik təhsil daha uyǧundur: "Bir il artıq təhsil almaq şagirdin yaş səviyyəsinə müsbət təsir edəcək. 12 illik təhsilə keçəndə ayrı-ayrı fənlər üzrə təhsilin məzmunu da dəyişəcək".
Ermənistanın real itkiləri: 322 ölü, 500-dən çox yaralı, 50-dən çox itkin
15.04.2016
Aprelin 2-dən 5-dək Ermənistan və Azərbaycan qoşunlarının təmas xəttində baş verən döyüş toqquşmalarında erməni tərəfi açıqladığından daha çox itki verib.
Ölkə.Az xəbər verir ki, APA-nın erməni mətbuatı və sosial şəbəkələrdə apardığı monitorinqlərdən aydın olur ki, itkilər və yaralılar açıqlanan rəqəmlərdən qat-qat çoxdur.
Erməni tərəfi indiyədək 100-dək ölü itkisi verdiyini açıqlasa da, real ölü sayı 322, yaralı sayı 500-dən, itkin isə 50-dən çoxdur.
Ermənistan rəhbərliyi döyüşdə məhv edilmiş hərbçilərinin dəqiq sayını gizlətmək üçün onların bir qismini “itkin düşmüş” elan edib, onların bir hissəsi basdırılıb, digər hissəsi isə qeyri-döyüş itkisi kimi və “aprelin 5-dən sonra atışmalarda ölənlər” kimi təqdim olunur.
Bu rəqəmləri əks etdirən məlumatlar Ermənistan mətbuatında verilsə də, sonradan məlumatlar silinib və yayımı qadağan edilib.
Bəzi məlumatlara görə, döyüş vaxtı bəzi erməni hərbçilər fərarilik edərək İrana qaçıb. Onların da adı “itkin düşənlər”in siyahısına daxil edilib.
“İtkin” kimi təqdim olunanların bəzilərinin gizli basdırıldığı, qalanların morqda olduğu və hissə-hissə çıxarılaraq ailələrinə verilərək, bu barədə ictimaiyyətə məlumat açıqlandığı bildirilir.
Azərbaycan hərbçilərinin meyitlərinin üzərində işgəncə əlamətləri aşkarlanıb — RƏSMİ
15.04.2016
Azərbaycan Ordusunun son döyüşlərdə şəhid olmuş, ermənilərdən təhvil alınmış hərbçilərinin meyitlərinin üzərində işgəncə əlamətləri aşkarlanıb.
APA-nın məlumatına görə, Azərbaycanın ATƏT yanındakı Daimi Nümayəndəliyinin Daimi Şuranın 1096 saylı iclasındakı bəyanatında deyilir ki, Azərbaycan Respublikası Hərbi Prokurorluğu və məhkəmə-tibbi ekspertizası ermənilərdən alınmış hərbçi meyitlərinin üzərində qeyri-insani rəftarla bağlı çoxsaylı fakt aşkarlayıb.
Qeyd edilir ki, cəsədlərin gözləri çıxarılıb, küt alətlərlə zədələr yetirilib, qulaqlar kəsilib, kəllə sümükləri qırılıb, ağızlarında yarıqlar aşkar edilib.
“Bu fakt və törədilmiş cinayətlər barədə informasiyaya əsaslanaraq Azərbaycan Respublikası Cinayət Məcəlləsinin müvafiq maddələri ilə araşdırmalara başlanılıb”, - deyə bəyanatda vurğulanır.
Ordumuz azad etdikləri bütün yüksəkliklərə nəzarət edir
15.04.2016
"Ermənistanın müdafiə naziri Seyran Ohanyanın cəbhədəki son hadisələrlə bağlı gecikmiş təhliləbənzər etirafı məğlubiyyətə uğramış "sərkərdə"nin özünü təmizə çıxarmaq istiqamətində növbəti uğursuz addımıdır".
Ölkə.Az xəbər verir ki, bu barədə Müdafiə Nazirliyinin mətbuat xidmətindən Trend-in sorğusuna cavab olaraq bildirilib.
Qeyd olunub ki, S.Ohanyanın açıqlamaları real hadisələri və vəziyyəti əks etdirməyərək, hələ keçən əsrdə hazırlanmış döyüş nizamnamələrindən köçürülmüş şablon cümlələrdən ibarətdir: "Belə ki, əgər ermənilər döyüş ehtiyatlarından istifadə etmədiklərini, tankçılarının "məharət və şücaətlə" döyüşdüklərini iddia edirlərsə, bəs müdafiənin dərinliyindən köməyə cəlb edilərək kolonlarla hərəkət edən ermənilərin 30-dək döyüş tankının və onlarla artilleriya qurğusunun məhv edilməsinin etirafını sadalamağı niyə unudur? Bir neçə gün bundan əvvəl erməni tərəfi iddia edirdi ki, Azərbaycan dörd hərbi birləşmənin iştirakı ilə irimiqyaslı hücuma keçib. İndi isə S.Ohanyan bu məsələni unudaraq döyüşlərin taqım səviyyəsində aparılmasını öz xalqına sırımağa çalışır".
Azərbaycan əhalisinin sayı açıqlandı
15.04.2016
Bu ilin əvvəlindən Azərbaycan əhalisinin sayı 17 900 nəfər və ya 0,2% artaraq 2016-cı il mart ayının 1-i vəziyyətinə 9 milyon 723 min 500 nəfərə çatıb.
Dövlət Statistika Komitəsindən verilən məlumata görə, əhalinin 1 kv. km olan sıxlığı 112 nəfər olub.
Ölkə əhalisinin ümumi sayından 53,1%-i şəhər, 46,9%-i kənd sakinlərinin, 49,8%-i kişilərin, 50,2%-i isə qadınların payına düşür. Hazırda hər 1000 kişiyə 1007 nəfər qadın düşür.
Ədliyyə Nazirliyinin rayon (şəhər) qeydiyyat şöbələri tərəfindən cari ilin ilk iki ayı ərzində ölkədə 27 min 600 doğulan körpə qeydə alınıb və bu göstərici əhalinin hər 1000 nəfərinə 17,5 təşkil edib. Doğulan körpələrin 53,2%-i oğlan, 46,8%-i isə qız uşaqlarından ibarət olub.
2016-cı ilin yanvar-fevral aylarında ölkədə 9 min 900 ölüm halı qeydə alınıb və əhalinin hər 1000 nəfərinə ölüm səviyyəsi 6,3 olub.
Azərbaycanda işsizlərin sayı açıqlandı
15.04.2016
Bu il aprelin 1-i vəziyyətinə Azərbaycanda iqtisadi fəal əhalinin sayı 4 milyon 929,7 min nəfər olub, onlardan 4 milyon 685,2 min nəfərini iqtisadi əmək fəaliyyəti ilə məşğul olan əhali təşkil edib.
Dövlət Statistika Komitəsindən verilən məlumata görə, bu il martın 1-i vəziyyətinə muzdla işləyənlərin sayı 1 milyon 494,7 min nəfər, o cümlədən iqtisadiyyatın dövlət sektorunda 883,2 min nəfər, qeyri-dövlət sektorunda isə 611,5 min nəfər təşkil edib. İqtisadiyyatın neft sektorunda 34,3 min nəfər, qeyri-neft sektorunda isə 1 milyon 460,4 min nəfər çalışıb.
Müəssisə və təşkilatlarda muzdla çalışan işçilərin 21,3%-i məhsul istehsalı sahələrində, o cümlədən 6,3%-i tikintidə, 6,1%-i emal sənayesində, 3,0%-i kənd təsərrüfatı, meşə təsərrüfatı və balıqçılıq sahələrində, 2,3%-i mədənçıxarma sənayesində, 1,8%-i elektrik enerjisi, qaz və buxar istehsalı, bölüşdürülməsi və təchizatı, 1,8%-i su təchizatı, tullantıların təmizlənməsi və emalı sahələrində məşğul olub.
Erməni qadınları Azərbaycana qarşı müharibəyə hazırlaşırlar
16.04.2016
Ermənistan hökuməti Azərbaycana qarşı hərbi əməliyyatlarda iştirak etmək üçün könüllü qadınlar hazırlayır.
Ölkə.Az oxu.az-a istinadən xəbər verir ki, bu barədə jurnalist Tiqran Petrosyanın Almaniyanın “Tageszeitung” qəzetində dərc edilmiş məqaləsində deyilir.
Bir həftə öncə Ermənistanın paytaxtında 18-30 yaş arası 170 könüllü üçün hazırlıq kursları açılıb, könüllülərin əsas hissəsi qızlardır.
“Qadınlar da orduda xidmət etməlidirlər”, - kursların rəhbəri və məşqçi Vova Vardanov bildirib.
Azərbaycan üçün ikinci peyk tikilir
16.04.2016
Azərbaycanın ikinci telekommunikasiya peyki "Azerspace-2"in tikintisi üzrə işlər başlayıb
Bunu Trend-ə rabitə və yüksək texnologiyalar nazirinin müavini İltimas Məmmədov deyib.
Onun sözlərinə görə, hazırda peyk istehsalçısı tərəfindən tikinti işlərinin təqribən 20 faizi görülüb.
İ.Məmmədov qeyd edib ki, peykin buraxılmasına hazırlıq üzrə işlər qrafikə uyğun aparılır. Peykin 2017-ci ildə buraxılması planlaşdırılır.
Azərbaycanda Peşə Təhsili Dövlət Agentliyi yaradılacaq
16.04.2016
“Bu gün Təhsil Nazirliyinin tabeliyində 114 ilk-peşə ixtisas təhsili müəssisələri var”.
APA-nın xəbərinə görə, bunu deyən Təhsil Nazirliyinin ilk peşə-ixtisas təhsili sektorunun müdiri Nigar İsmayılzadə bildirib ki, ilk peşə ixtisas təhsili müəssisələrindən 45-i peşə liseyi, 61-i peşə məktəbi (8-i cəzaçəkmə müəssisələrinin tərkibində), ikisi tədris mərkəzidir.
Onun sözlərinə görə, peşə təhsili müəssisələrindən 6-sı işğal olunmuş rayonlarda yerləşdiyindən onların fəaliyyəti dayandırılıb. O qeyd edib ki, ümumilikdə peşə ixtisas təhsili müəssisələrindən 34-ü Bakıda yerləşir.
Sektor müdiri bildirib ki, respublikanın ilk peşə-ixtisas təhsili müəssisələrində 126 peşə üzrə 23850 şagird təhsil alır. 2015-2016-cı il peşə məktəblərinə qəbulun 16990 nəfər olduğunu deyən N. İsmayılzadə əlavə edib ki, ilk peşə ixtisas təhsilinin müddəti 1-3 ildir.
Müdafiə Nazirliyi: "Bizdə ermənilərə məxsus məxfi xəritələr var"
16.04.2016
Azərbaycanın Müdafiə Nazirliyi Ermənistan müdafiə nazirinin müavini David Tonoyanın xarici ölkələrin hərbi attaşeləri üçün keçirdiyi brifinqdə hərbi xəritələr təqdim edərək, guya Azərbaycanın ilk hücuma keçən tərəf olması barədə açıqlamalarına münasibət bildirib.
Müdafiə Nazirliyinin mətbuat xidmətindən verilən məlumatda qeyd olunur ki, D.Tonoyan hərbi forma geyməsinə baxmayaraq, qeyri-peşəkar və mülki şəxsə xas olan mülahizələri ilə erməni hərbi rəhbərliyinin bu əməliyyatlarda bacarıqsızlığını ört-basdır etməyə, eyni zamanda xarici dövlətlərin nümayəndələrinin fikirlərini yanlış istiqamətə yönəltməyə çalışıb.
Qarabağın ilk şəhidinin anası vəfat etdi
16.04.2016
Azərbaycanın Qarabağda verdiyi ilk şəhidin anası dünyasını dəyişib.
Ölkə.Az Modern.az-a istinadən bildirir ki, bu barədə Milli Qəhrəman Allahverdi Bağırovun oğlu Elşən Bağırov bildirib.
Onun sözlərinə görə, Azərbaycanın ilk şəhidi, Agdam rayon sakini Bəxtyar Quliyevin anası Səlimə Quliyeva bu gün 65 yaşında dünyasını dəyişib.
Xatırladaq ki, 1988-ci il fevralın 21-də Azərbaycanın Dağlıq Qarabağ Muxtar Vilayətinin yalnız erməni deputatlarının iştirakı ilə keçirilən növbədənkənar legitim olmayan iclasında vilayətin Azərbaycanın tərkibindən çıxarılıb Ermənistanın inzibati-ərazi bölgüsünə daxil edilməsi barədə qərar qəbul edilib. Sessiyada Dağlıq Qarabağın Ermənistana birləşdirilməsi haqqında Azərbaycan və Ermənistanın hakimiyyət orqanlarına müraciət olunub. Həmin vaxt ermənilər Xankəndidə vilayət Partiya Komitəsinin binası qarşısında mitinq keçirir, Azərbaycana qarşı əsassız iddialar səsləndirir, qərarın dərhal SSRİ Ali Sovetinə göndərilməsini tələb edirdilər.
