Həftənin icmalı
Azərbaycan hərbçisinin meyitinin ermənilərdə olduğu təsdiq edildi
18.04.2016
Əsir və itkin düşmüş, girov götürülmüş vətəndaşlarla əlaqədar Dövlət Komissiyası bu gün erməni KİV-lərində azərbaycanlı hərbçinin meytinin onlarda olmaması barədə yaydığı məlumata aydınlıq gətirib.
Komissiyadan verilən məlumatda bildirlir ki, Əsir və itkin düşmüş, girov götürülmüş vətəndaşlarla əlaqədar Dövlət Komissiyası bir daha bəyan edir ki, aidiyyəti beynəlxalq təşkilatların vasitəçiliyi ilə əldə edilmiş razılaşmaya uyğun olaraq tərəflərin nəzarəti altında olan hərbçilərin meyitlərinin qarşılıqlı repatriasiyasının pozulmasında məsuliyyət tam şəkildə Ermənistan tərəfinin üzərinə düşür.
Prezident viza prosedurlarını sadələşdirdi — SƏRƏNCAM
18.04.2016
Dövlət Miqrasiya Xidmətinə tapşırıq verildi.
Azərbaycan prezidenti İlham Əliyev Ümumdünya Şahmat Olimpiadasının təşkili və keçirilməsi ilə bağlı Azərbaycana gələcək əcnəbilər və vətəndaşlığı olmayan şəxslər üçün viza prosedurlarının sadələşdirilməsi haqqında sərəncam imzalayıb.
Ölkə.Az-ın məlumatına görə, Bakı şəhərində keçiriləcək Ümumdünya Şahmat Olimpiadası ilə əlaqədar Azərbaycana gələn əcnəbilər və vətəndaşlığı olmayan şəxslər Azərbaycan Xarici İşlər Nazirliyinin Konsulluq İdarəsinin Azərbaycanın beynəlxalq hava limanlarında yerləşən struktur bölmələrində viza ala bilərlər.
Bakı Şahmat Olimpiadasının Əməliyyat Komitəsinin rəsmi dəvət məktubu, habelə Beynəlxalq Şahmat Federasiyasının (FİDE) müvafiq qaydalarına uyğun olaraq akkreditasiyadan keçməni təsdiq edən sənəd viza verilməsi üçün əsas hesab edilir. Bu sənədlərdən birinə malik olan şəxslər viza almaq üçün 2016-cı il avqustun 20-dən sentyabrın 20-dək müraciət edə bilərlər.
Ermənilərə məxsus PUA məhv edildi
19.04.2016
Ermənilərə məxsus PUA məhv edilib.
Ölkə.Az Müdafiə Nazirliyinin saytına istinadən xəbər verir ki, cəbhə bölgəsində Silahlı Qüvvələrimizin mövqeləri üzərində uçuşlar həyata keçirməyə cəhd göstərən Ermənistan silahlı qüvvələrinə məxsus "X-55" tipli pilotsuz uçuş aparatı (PUA) bölmələrimiz tərəfindən məhv edilib.
Bakı metrosunun yeni stansiyası istifadəyə verildi
19.04.2016
Avtovağzal stansiyası istifadəyə verilib
Ölkə.az xəbər verir ki, Bakı metropolitenin "Bənövşəyi xətt" üzrə Avtovağzal və Memar Əcəmi stansiyaları bu gün sərnişinlərin istifadəsinə verilib.
Açılışda prezident İlham Əliyev iştirak edib. Açılışla əlaqədar Bakı-Sumqayıt yolunun "Avtovağzal" hissəsində nəqliyyatın hərəkəti qısa müddətliyinə dayanıb.
Azərbaycan ov edən ərəbləri deportasiya edir
19.04.2016
Ekologiya və Təbii Sərvətlər Nazirliyinin əməkdaşları ölkə ərazisində növbəti reyd keçiriblər.
Nazirlikdən Ölkə.Az-a verilən məlumata görə, Salyan rayon ərazisində keçirilən reyd zamanı qanunsuz ov edən Hacıqabul rayonu Qarasu kənd sakini Vurğun Məlikov, Birləşmiş Ərəb Əmirliklərinin vətəndaşları Butti Ghamin Ali Ahmed Almansoori, Mohamed Eisa Mohamed Hamdan Almansoori və Salem Sultan Salem Kltham Alkedən saxlanılıb.
Onlardan 1 ov tüfəngi və 16 ədəd patron götürülüb.
Faktla bağlı təqsirkar şəxslər barəsində qanunvericiliyin tələblərinə uyğun akt və protokol tərtib edilib və İnzibati Xətalar Məcəlləsinin müvafiq maddəsinə əsasən, hər biri 2000 manat olmaqla, ümumilikdə 8000 manat məbləğində cərimələnib.
Ziya Bünyadovun xanımı vəfat etdi
19.04.2016
Məşhur tarixçi alim, sabiq millət vəkili, mərhum akademik Ziya Bünyadovun xanımı Tahirə Bünyadova bu gün səhər saatlarında vəfat edib.
Ölkə.Az xəbər verir ki, bu barədə modern.az-a Bünyadovlar ailəsinin yaxınları məlumat veriblər.
Mərhumun dəfn mərasiminin Təzəpir məscidində keçiriləcəyi gözlənilir.
Qeyd edək ki, Tahirə Bünyadova 91 yaşındaydı. O, son vaxtlara qədər Milli Məclisin kitabxanasında məsləhətçi işləyirdi. Əslən Qarabağdan olan Tahirə xanım Yusif Vəzir Çəmənzəmənlinin yaxın qohumudur. O, Moskvada Nərimanov adına Şərqşünaslıq İnstitutunda təhsil almışdı.
Akademik Ziya Bünyadov 1997-ci il fevral ayının 21-də yaşadığı binanın qarşısında cinayətkar qrup tərəfindən vəhşicəsinə qətlə yetirilib.
Həccə gedənlər üçün qurbanlıq qoyunlar bahalaşdı
19.04.2016
Azərbaycandan bu il Həcc ziyarətinə səfər edəcək zəvvarlar üçün təklif olunan qurbanlıq qoyunlar əvvəlki il ilə müqayisədə bahalaşıb.
Ölkə.Az xəbər verir ki, Qafqaz Müsəlmanları İdarəsindən APA-ya verilən məlumata görə, bu il qurbanlıq qoyunlar zəvvarlara 160-170 ABŞ (243-258 AZN) dollarına başa gələcək.
QMİ-dən onu da bildiriblər ki, qurbanlıq qoyunların ödənişi ziyarət səfərinin təşkili üçün ödəniləcək vəsaitə daxil deyil və zəvvar bunu əlavə olaraq ödəməlidir.
Xatırladaq ki, ötən ilki Həcc zamanı qurbanlıq qoyunlar zəvvarlar üçün 130-140 ABŞ dollarına başa gəlib.
Bakıda mənşəyi məlum olmayan 1 tondan çox yararsız ət aşkarlandı
19.04.2016
Kənd Təsərrüfatı Nazirliyi yanında Dövlət Baytarlıq Nəzarəti Xidməti (DBNX) ölkə ərazisində epizootoloji sabitliyin saxlanması, əhalinin sağlamlığı və qida zəhərlənmələrindən qorunması istiqamətində apardığı nəzarəti tədbirləri davam etdirir.
Aprelin 19-da alınmış məlumat əsasında Dövlət Baytarlıq Nəzarəti Xidmətinin mütəxəssisləri Daxili İşlər Nazirliyinin Baş İctimai Təhlükəsizlik İdarəsinin Karantin tədbirlərini təmin edən əlahiddə polis taborunun əməkdaşlarının iştirakı ilə Qaradağ rayonu ərazisində Dövlət Yol Polisi postunda reyd keçirərkən Ağcabədi rayonundan Bakı şəhərinə gələn Şamxal Nəbiyevin idarə etdiyi "Daevo Neksiya" markalı 99 AU 715 dövlət nömrə nişanlı minik və Zərdab rayonundan Bakı şəhərinə gələn Nadir Qasımovun idarə etdiyi "Ford Transit" markalı 90 LX 763 dövlət nömrə nişanlı yük avtomobilləri saxlanılıb və baxış keçirilib.
Nazirlik: Bu günədək 5 mindən çox əlil və şəhid ailəsinə mənzillər verilib
19.04.2016
Qarabağ müharibəsi əlillərinin minik avtomobilləri ilə təminatı da diqqətdə saxlanılır.
Əmək və Əhalinin Sosial Müdafiəsi Nazirliyi tərəfindən təkcə keçən il və cari ilin ötən dövründə 385 nəfər, o cümlədən 180 nəfər Qarabağ müharibəsi əlili, 205 şəhid ailəsi müasir tələblərə cavab verən yeni mənzillərlə təmin ediliblər.
Ümumilikdə bu vaxta qədər Nazirliyin xətti ilə 5336 nəfər əlil və şəhid ailəsi mənzillə təmin olunub.
İtkin düşən nefçilərdən daha birinin meyiti tapıldı
20.04.2016
Xəzər dənizinin Türkmənistan sahillərində neftçi olduğu ehtimal edilən meyit tapılıb.
Ölkə.Az-ın FHN-in saytına istinadən verdiyi məlumata görə, Azərbaycanın Türkmənistandakı səfirliyindən bildirilib ki, aprelin 18-də Xəzər dənizinin Türkmənistan sahillərində meyiti tapılan şəxsin ilkin olaraq, “Günəşli” yatağındakı 10 saylı dərin dəniz özülündə baş vermiş qəza nəticəsində itkin düşənlərdən birinin olduğu ehtimal edilir.
Bununla əlaqədar, FHN-in “BE-200ÇS” amfibiya tipli təyyarəsinin istintaq qrupu ilə birgə cəsədin tanınması və respublikaya gətirilməsi məqsədilə Türkmənistana göndərilməsi üçün hazırlıq işlərinə başlanılıb.
Polisin vətəndaşı saxlama qaydalarında — Yeniliklər
20.04.2016
Azərbaycanda polisin vətəndaşı saxlama qaydalarında yeniliklər təklif edilir.
Ölkə.Az xəbər verir ki, bu barədə APA-ya Milli Məclisdən bildirilib. Məlumata görə, parlamentə “Polis haqqında” qanunun 23-cü (Azadlıq hüququnun məhdudlaşdırılması ilə bağlı polis əməkdaşının vəzifələri) maddəsinə əlavə və dəyişikliklər layihəsi təqdim olunub.
Maddənin 3-cü hissəsinə edilən dəyişikliyə əsasən, saxlanmadan dərhal sonra polis həmin şəxsə sadəcə, saxlanmasının əsaslarını yox, səbəbini, şübhənin mahiyyətini bildirməli olacaq. Maddənin bu bəndinə edilən əlavəyə görə isə, polis saxlanılan şəxsə hüquqlarını "ona aydın olan dildə” izah etməlidir.
Layihə Milli Məclisin aprelin 26-da keçiriləcək iclasında müzakirəyə çıxarılacaq.
Lələ təpəni azad edən komandirə general rütbəsi verildi
20.04.2016
Lələ təpə yüksəkliyinin azad olunması uğurunda gedən döyüşlərdə xüsusi qəhrəmanlıq göstərən Mais Bərxudarova general-mayor rütbəsi verilib.
Ölkə.Az-ın məlumatına görə, bu barədə millət vəkili Sahib Əliyev özünün feysbuk səhifəsində yazıb:
“Məhz döyüşdə, məhz əsgərin önündə, məhz qələbə çalmaqla öz sərkərdəliyini təsdiqləmiş yeni generalımız! Ali Baş Komandan İlham Əliyev əmrini peşəkarlıqla və ləyaqətlə yerinə yetirərək Lələ təpə yüksəkliyinin azad olunması uğurunda gedən döyüşlərdə düşmənə qan udduran Mais Bərxudarova dünən general-mayor rütbəsi verdi.
Uğurlu-xeyrli olsun, müzzəffər ordunun yeni generalı, zəfərlərin davamını gözləyirik!”
Dördgünlük müharibənin sonuncu şəhidi torpağa tapşırıldı
20.04.2016
Azərbaycan Ordusunun ermənilərlə döyüşdə şəhid olan giziri dəfn edilib.
Ölkə.Az xəbər verir ki, APA-nın məlumatına görə, Baxışov Seymur Qulamhüseyn oğlu Sumqayıt Şəhidlər xiyabanında torpağa tapşırılıb.
Dəfn mərasimində Müdafiə Nazirliyinin, Sumqayıt şəhər İcra Hakimiyyətinin, Səfərbərlik və Hərbi Xidmətə Çağırış üzrə Dövlət Xidmətinin rəsmi şəxsləri, ictimaiyyət nümayəndələri iştirak ediblər.
Qeyd edək ki, S. Baxışov aprelin əvvəlində keçirilən son döyüşlərdə şəhid olub. Onun meyiti aprelin 19-da təmas xəttindən götürülüb.
QMİ: “Şəhidlər” məscidində namaz qılmaq olar
20.04.2016
Qafqaz Müsəlmanları İdarəsi (QMİ) “Şəhidlər” məscidinin təmirdən sonra istifadəyə verilməsi ilə bağlı yayılan xəbərlərə münasibət bildirib.
Ölkə.Az-ın məlumatına görə, QMİ-nin mətbuat xidmətindən APA-nın sorğusuna cavab olaraq bildirilib ki, məsciddə təmir işləri davam edir, ibadət evi hələlik kütləvi tədbirlər, kütləvi ibadət üçün açıq deyil.
“Məscidə axund və imam da bu səbəbdən hələlik təyin olunmayıb. Təmir işləri başa çatıb, məscid kütləvi ibadətə açılandan sonra axund və imam təyinatı da olacaq. Bununla belə, Şəhidlər Xiyabanına gələnlər fərdi şəkildə məscidə gedə və ibadət edə bilər”, - deyə mətbuat xidmətindən bildirilib.
Mikayıl Cabbarov: Xaricdə təhsil proqramı ləğv olunmayacaq
20.04.2016
Bilirsiz ki, bu, 2007-ci ildən Azərbaycan prezidentinin təşəbbüsü ilə həyata keçirilən “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” təhsil sistemində olan ən uğurlu proqramlardandır. Bu proqramın həyata keçirildiyi müddətdə 3500-dən çox Azərbaycan vətəndaşı, gənc soydaşlarımız dünyanın ən nüfuzlu ali məktəblərində, müəssisələrində təhsil almaq imkanı əldə ediblər.
Ölkə.Az xəbər verir ki, bu barədə “Caspian European Club”ın təşkil etdiyi biznes-forum çərçivəsində jurnalistlərə Azərbaycanın təhsil naziri Mikayıl Cabbarov “2007-2015-ci illərdə Azərbaycan gənclərinin xarici ölkələrdə təhsili üzrə Dövlət Proqramı” ilə bağlı verdiyi açıqlamada qeyd edib.
Nazirin sözlərinə görə, proqramın adından da bəlli olduğu kimi, 2015-ci ildə onun başa çatdırılması nəzərdə tutulurdu.
Nikaha daxil olmaq istəyən 74 nəfərdə QİCS aşkarlandı
20.04.2016
Azərbaycanda son 10 ayda nikaha daxil olmaq istəyən 117 500 nəfər müayinə edilib.
Ölkə.Az APA-ya istinadən xəbər verir ki, B. Eyvazov adına Elmi-Tədqiqat Hematologiya və Transfuziologiya İnstitutunun direktoru Zöhrə Əlimirzəyeva deyib ki, nikaha daxil olmaq istəyən 6521 nəfərin talassemiya daşıyıcı, 74 nəfərin QİCS, 363 nəfərin isə sifilis xəstəsi olduğu aşkarlanıb. Onun sözlərinə görə, 50 cütlüyün isə hər ikisinin talassemiya daşıyıcısı olduğu üzə çıxıb: “Bunlardan 5-6 cütlük nikaha daxil olmaqdan imtina edib. Ancaq xəstə cütlüklərdən ailə quranlar da var ki, hətta onlardan 6-da hamiləlik müşahidə edilir. Həmin cütlüklərdən birində dölün perinatal diaqnostikası aparılıb və nəticədə döldə xəstəlik aşkarlanıb. Həmin gənclər hamiləliyi pozmağı qərara veriblər. Digər 5 dölün də müayinəsi aparılıb, onların heç birində xəstəlik aşkar edilməyib”.
Azərbaycan Rusiyadan 6 helikopter aldı
21.04.2016
Azərbaycan mövcud hərbi-texniki əməkdaşlıq müqavilələri çərçivəsində “Rusiya helikopterləri” holdinqindən 6 hərbi-nəqliyyat "Mi 17B-1" helikopteri alıb.
Ölkə.Az APA-ya istinadən verdiyi xəbərə görə, bu barədə “Rusiya helikopterləri” holdinqinin 2015-ci ilin maliyyə göstəriciləri ilə bağlı hesabatında deyilir.
Hesabatda göstərilir ki, İndoneziya, Banqladeş, Peru, İraq, Şri Lanka və Kuba holdingdən modifikasiya olunmuş "Mi-171" helikopterləri satın alıb.
Sərnişinlər metroya 43 milyon xərcləyib
21.04.2016
"Bakı Metropoliteni" QSC 2015-ci ildə sərnişindaşıma sahəsində satışlardan 43,005 mln. manatlıq gəlir əldə edib.
Ölkə.Az QSC-nin açıqladığı hesabata istinadən xəbər verir ki, bu məbləğ 2014-cü illə müqayisədə 2,23% çoxdur.
QSC sair əməliyyatlardan 9,563 mln. manatlıq gəlir əldə edib ki, bu da bir il öncə ilə müqayisədə 4,2 çoxdur.
Hesabat dövründə Bakı metrosu 7,661 mln. manatlıq elektrik enerjisi, 130,157 min manatlıq qaz istifadə edib.
Hesabata əsasən, ötən il QSC-nin işçi heyətinə 42,779 mln. manatlıq xərc çəkilib ki, bu da il ərzində 0,23%-lik və ya 104 min 992 manatlıq azalma deməkdir.
Azərbaycana sığınan erməni ailəsi üçüncü ölkəyə göndərildi
22.04.2016
Keçən ilin sentyabrında həyat yoldaşı və azyaşlı övladı ilə birlikdə Ermənistandan qaçaraq Azərbaycana gələn Ermənistan “Milli Azadlıq Hərəkatı” təşkilatının rəhbəri Vaan Martirosyan ailəsi ilə birlikdə üçüncü ölkəyə yola salınıb.
Ölkə.Az xəbər verir ki, bunu APA-ya açıqlamasında Dilarə Əliyeva adına Qadın Hüquqlarını Müdafiə Cəmiyyətinin sədri, hüquq müdafiəçisi Novella Cəfəroğlu bildirib.
N. Cəfəroğlu üçüncü ölkənin adını açıqlamayıb.
Qeyd edək ki, Ermənistan “Milli Azadlıq Hərəkatı” təşkilatının rəhbəri Vaan Martirosyan Azərbaycandan siyasi sığınacaq istəyib. O, rəhbərlik etdiyi müxalif yönümlü qurumun fəaliyyətinə görə Ermənistanda dövlət orqanlarının və ayrı-ayrı səlahiyyətli şəxslərin təzyiqlərinə məruz qalıb. V. Martirosyan özünün və ailəsinin şəxsi təhlükəsizliyi ilə əlaqədar həyat yoldaşı və azyaşlı övladı ilə birlikdə bu ilin sentyabrında Ermənistandan qaçaraq, Azərbaycana gəlib.
Polkovnik Həmidova Milli Qəhrəman adı verildi — FOTO
22.04.2016
Azərbaycan Respublikasının ərazi bütövlüyünün qorunub saxlanması, erməni işğalçılarının 2016-cı il aprelin 2-dən 5-dək qoşunların təmas xəttində törətdikləri silahlı təxribatların qarşısının alınması və düşmənin dinc əhaliyə hücumlarının dəf edilməsi zamanı göstərdiyi qəhrəmanlıq və igidliyə görə polkovnik–leytenant Həmidov Şükür Nəriman oğlu prezident İlham Əliyev tərəfindən Milli Qəhrəman adına layiq görülüb.
Ölkə.Az AzVision.az-a istinadən xəbər verir ki, polkovnik–leytenant Şükür Həmidov Ermənistan ordusu tərəfindən işğal edilən Qubadlı rayonundandır.
Türkmənistan sahilində tapılmış neftçinin meyiti Bakıya gətirildi
22.04.2016
Xəbər verildiyi kimi, aprelin 18-də Xəzər dənizinin Türkmənistan sektorunda tapılmış və ilkin olaraq, “Günəşli” yatağındakı 10 saylı dərin dəniz özülündə baş vermiş qəza nəticəsində itkin düşmüş neftçilərdən birinin olduğu ehtimal edilən meyitin tanınması və Vətənə gətirilməsi üçün aprelin 22-də Fövqəladə Hallar Nazirliyinin “BE-200ÇS” amfibiya tipli təyyarəsi istintaq qrupu ilə Türkmənistana yola düşüb.
Ölkə.Az Fövqəladə Hallar Nazirliyinin saytına istinadən xəbər verir ki, təyyarə artıq geri dönüb və cəsəd aidiyyəti üzrə təhvil verilib.
Avropa Parlamentində Ermənistan işğalçı adlandırıldı
23.04.2016
Avropa Parlamentində Azərbaycan-Ermənistan Dağlıq-Qarabağ münaqişəsinə dair Avropa üzrə Liberallar və Demokratlar Alyansı siyasi qrupununun üzvləri İvo Vayql (Sloveniya) ve Hannu Takkulanın (Finlandiya) ev sahibliyi ilə “Dağlıq-Qarabağda çəkişmələrin eskalasiyası: Aİ üçün narahatlıq səbəbi?” mövzusunda dinləmələr keçirilib.
Dinləmələrdə həmçinin AP-nin digər üzvləri Norika Nikolai (Rumıniya), İveta Qriqule (Latviya) və Anneli Yaatenmaki (Finlandiya) iştirak ediblər.
Tədbiri giriş sözü ilə açan AP üzvü İ.Vayql Azərbaycan-Ermənistan münaqişəsinin tezliklə həll olunması vacibliyini vurğulayıb, eləcə də Azərbaycanın Ağdam rayonunda yerləşən köçkün şəhərciyinə səfərini yada salıb. O, Aİ-nin daha böyük enerji ilə ən yüksək siyasi səviyyədə məsələyə diqqət ayırmasının vacib olduğunu bildirib
