Kerri: “ABŞ Suriyada atəşkəsin monitorinqinə dair yeni sistemi Rusiya ilə razılaşdırmaq istəyir”
ABŞ-ın dövlət katibi Con Kerri bildirib ki, ABŞ yaxın günlərdə Rusiya ilə Suriyada atəşkəs rejiminin icrasının 24 saatlıq monitorinqinə dair yeni sistemi razılaşdırmaq niyyətindədir.
Con Kerri bunu “New York Times” nəşrinə müsahibəsində bildirib.
“Biz hətta pozulmaz bir xətt çəkməyi təklif etdik və dedik: “Nə siz onu pozursunuz, nə də ki biz onu pozacağıq – belə olan halda oyun təmiz olacaq”, - deyə Kerri bildirərək, Rusiya tərəfinin hazırda bu təklifi nəzərdən keçirdiyini qeyd edib.
“Düşünürəm ki, gələn həftə ərzində bizə cavab veriləcək", - deyə o əlavə edib.
ABŞ-ın dövlət katibi qeyd edib ki, prezident Barak Obama aprelin 18-də Suriyanın Hələb şəhəri ətrafında hərbi qüvvələrin cəmləşməsi məsələsini rusiyalı həmkarı ilə müzakirə edib. (APA)
