Egemen Bağış: “Rusiya Qarabağ münaqişəsinin həllini özü istəmir”
“Ermənistanın Azərbaycanın mülkü əhalisinə qarşı törətdiyi təxribatlar və təmas xəttində atəşkəs rejimini tez-tez pozması beynəlxalq hüququn tələblərini kobud şəkildə pozmaq və heçə saymaqdır”.
Bu fikirləri Ölkə.Az-a eksklüziv açıqlamasında Türkiyənin Avropa İttifaqı işləri üzrə sabiq naziri və beynəlxalq məsələlər üzrə şərhçi Egemen Bağış bildirib.
Türkiyəli siyasətçi deyib ki, Ermənistanın bu cür hərəkətləri beynəlxalq ictimaiyyət üçün də yeni deyil və dünya birliyi bunu yaxşı anlayır. Onun sözlərinə görə, Ermənistanın işğalçı siyasəti uzun müddət davam edə bilməz:
“Ermənistan rəhbərliyi yaxşı bilməlidir ki, nə əkərsənsə, onu da biçərsən. Azərbaycan yalnız deyil. Azərbaycanın yanında ilk növbədə haqq-ədalət, beynəlxalq hüquq, daha sonra isə güclü Türkiyə dövləti var. Bizim Ermənistan torpaqlarında və malında gözümüz yoxdur. Ancaq bizim torpaqlarımıza, tariximizə də heç kəsin tamah salmasına imkan vermərik. Türkiyə Azərbaycan ilə “bir millət, iki dövlət” siyasəti aparır. Bizim çətin günümüzdə Azərbaycan Türkiyənin yanında, Azərbaycanın çətin günüdə isə Türkiyə hər zaman Azərbaycanın yanında olacaq. Bunu da hər kəs yaxşı bilməlidir”.
E.Bağış qeyd edib ki, Ermənistan hərbi birləşmələrinin Azərbaycanın mülkü əhalisinə qarşı iriçaplı və artilleriya silahlarından atəş açması beynəlxalq hüququn tələblərinin kobud şəkildə pozulmasıdır:
“Çox təəssüf ki, bu faktlara beynəlxalq təşkilatlar nədənsə göz yumurlar. Necə olur ki, beynəlxalq təşkilatlar 100 il öncəki hadisələri araşdırmağı özlərinə vacib sayırlar, ancaq bu gün Ermənistan hərbiçilərinin Azərbaycan torpaqlarında günahsız və mülkü əhaliyə qarşı silah işlətməsini, insanların öldürülməsi faktlarına göz yumurlar? Beynəlxalq təşkilatlar bu gün baş verənləri yaxından izləməli və işğalçı Ermənistanı yerində oturtmalıdır. Artıq dünyada ədalətli qərarların verilməsi və onun icra edilməsi ilə bağlı BMT-nin üzərində böyük məsuliyyət düşür”.
Rusiyanın Ermənistana dəstək verdiyini vurğulayan E.Bağış bildirib ki, rəsmi Moskva bölgədə mövcud olan münaqişələrin ədalətli həllinə mane olur və gərginliyi daha da artırır:
“Rusiya bölgədə sülhü və sabitliyi dəstəkləmək əvəzinə, işğalçı ölkəni dəstəkləyir və hərbi münaqişələrin ömrünü uzadır. Əgər Rusiya doğrudan da Ermənistan ilə Azərbaycan arasında ədalətli vasitəçi olmaq istəsəydi, o zaman ATƏT-in Minsk qrupunun səylərini 20 il öncə artırardı. Ancaq Minsk qrupunun həmsədr ölkələri olan Rusiya, ABŞ və Fransa Dağlıq Qarabağ probleminin həlli istiqamətində 20 ildən çoxdur ki, hər hansı ciddi addımlar atmayıb. Buna görə də bu gün Dağlıq Qarabağ və qaçqınlar problemi hələ də həll olunmamış qalır. Bu gün Ermənistan Azərbaycan torpaqlarını hələ də işğalda saxlayır. Bütün bunlar onu göstərir ki, Rusiya 20 ildən çoxdur ki, bu regionda Qarabağ münaqişəsinin həllini özü istəmir. Bunu görməmək mümkün deyil. Rusiya indi də Türkiyənin onun hərbi təyyarəsini vurmasını bəhanə gətirərərək, guya buna görə məhz Ermənistanın yanında olmasını söyləyir. Ancaq Rusiyanın bu bəhanəsinə körpə uşaqlar belə inanmaz və gülər. Bu gülünc doğuran səbəbə Rusiyadan savayı heç kəs inanmaz”.
Elçin Əli
