Ümid Partiyası bəyanat verdi
Ümid Partiyasının gənc fəalları Bayram Məmmədov və Qiyas İbrahimovun həbsi və işgəncəyə məruz qalması ilə bağlı bəyanatı
NİDA Vətəndaş Hərəkatının üzvləri Bayram Məmmədov və Qiyas İbrahimov mayın 10-da polis tərəfindən saxlanılıb. Onlar səbəb olaraq sosial şəbəkədə paylaşdıqları Heydər Əliyevin Mərkəzi Bankın qarşısındakı abidəsinin postamentinə yazılan şüarlara görə saxlanıldığını açıqlamışdılar. Lakin mayın 12-də Xətai rayon Məhkəməsi gənc fəallar haqqında 4 aylıq həbs-qətimkan tədbiri seçib. Daxili İşlər Nazirliyinin məlumatına görə, gənclərin hər birinin üstündən 2 qram, evlərindən isə 1 kiloqramdan artıq heroin çıxıb.
Gənclərin vəkili isə həbsdən sonra onların bədənlərində qançırlar gördüyünü deyib, B.Məmmədov isə işgəncəyə məruz qalması ilə bağlı ətraflı yazıb.
Ümid Partiyası gənclərin həbsini pisləyir və baş vermiş işgəncə faktını qəti şəkildə qınayır. Partiya hesab edir ki, ictimai-siyasi aktiv gənclərə qarşı bu metodlardan istifadə yolverilməzdir.
Ümid Partiyası hakimiyyəti insan haqları ilə bağlı beynəlxalq təşkilatlar qarşısında götürdüyü öhdəlikləri yerinə yetirməyə, istintaq dövründə prosedur qaydalara əməl etməyə, obyektiv araşdırma aparmağa çağırır. Ədalətsiz məhkəmə qərarının ləğv edilməsini və hər iki gəncin dərhal azadlığa buraxılmasını tələb edir.
