Türkiyədə hərbi çevriliş cəhdi

Türkiyədə fövqəladə vəziyyət rejimi tətbiq olunandan sonra bir sıra strukturlar fəaliyyətini dayandırıb. Paytaxt da daxil olmaqla, iri şəhərlərdə, ümumilikdə 35 səhiyyə müəssisəsi, 104 fond, cəmiyyət və dərnək, 43 özəl təhsil müəssisəsi bağlanıb. Bununla yanaşı, bir sıra nüfuzlu universitetlər də daxil olmaqla, 15 ali təhsil müəssisəsinin lisenziyası ləğv edilib.

Ölkə.Az xezerxeber.com-a istinadən bildirir ki, Ankara Respublika Prokurorluğu isə hərbi çevriliş cəhdi ilə bağlı aparılan istintaq çərçivəsində Prezident Administrasiyası Mühafizə Alayının 283 əsgərini saxlayıb. Tutulan hərbçilərdən 1200 siravi əsgər isə azadlığa buraxılıb. Ankara şəhər prokuroru Harun Kodalak bildirib ki, həmin əsgərlərin baş verənlərdən xəbəri olmayıb. O qeyd edib ki, xalqa atəş açmayan, baş verənlərin təfərrüatlarını bilməyən əsgərlər tezliklə sərbəst buraxılacaq.

Türkiyə Ali Hərbi Şurasının  toplantısının tarixi də açıqlanıb. İclas iyulun 28-də keçiriləcək. Toplantı Türkiyə tarixində ilk dəfə olaraq Silahlı Qüvvələrin Baş Qərargahında deyil, Çankayadakı hökumət evində baş tutacaq.