\"Bu yaxınlaşma ilə Ərdoğan Qərbi qorxudur\"

Rusiya və Türkiyə prezidentləri Rusiyanın Sankt-Peterburq şəhərində görüşüblər.

Ötən ilin noyabr ayında Türkiyənin Rusiya hərbi təyyarəsini vurmasından sonra iki ölkə arasında gərginlik üst səviyyəyə çıxmışdı. Hətta bəzi ekspertlər lokal müharibənin ola biləcəyini də bildirirdi.

Son zamanlar Türkiyə və Rusiya arasında münasibətlər normallaşmağa doğru gedir. Bunun məntiqi nəticəsi olaraq iki ölkənin prezidentləri Rusiyada görüş keçirir. Bəzi ekspertlər iddia edir ki, hazırkı dövrdə iki ölkənin yaxınlaşması Türkiyəni çətin vəziyyətə salacaq. Səbəb isə Qərbin bu münasibətlərə qarşı olmasıdır.

Politoloqlar hesab edir ki, Rusiya ilə Türkiyənin isti münasibəti Azərbaycana da yaxşı mənada təsir edəcək. Türkiyə ilə Rusiya arasındakı münasibətlərin düzəlməsində hər iki tərəfin də bildirdiyi ki, vasitəçi Azərbaycandır.

Türkiyə Rusiya münasibətləri haqda Ümid Partiyasının sədri İqbal Ağazadə özünün Ölkə.Az-a verdiyi açıqlqmasında danışıb:

"Rusiya və Türkiyə bu münasibətlər sistemində səmimi deyil. Ərdoğana da bəllidir ki, Putinin ona münasibəti necədir. Putinə də bəlldir ki, Ərdoğanın ona münasibəti necədir. Bu əslində zorən bir müttəfiqlikdir.

Bu müttəfiqlik üst qatda nə qədər parıltılı görünsə də, alt qatda problemlərlə doludur. O problemləri heç nə həll edə bilməyəcək. Çox qısa zamandan sonra tərəflərin münasibətində yeni gərginliklər ortaya çıxacaq.

15 iyul hadisələrindən sonra Ərdoğan hakimiyyəti Türkiyədə bir az fərqli müstəviyə çıxıb deyə Rusiya ilə yeni münasibətlər sistemində Qərb ölkələri qarşısında Ərdoğan müəyyən üstünlük əldə etmək istəyir. Güman etmirəm ki, bu ciddi bir üstünlük olacaq.

Türkiyə-Rusiya münasibətlər sistemi dərinləşməyəcək. Əksinə qeyri-səmimi münasibət Azərbaycana da ziyan vuracaq. Qeyri-səmimi münasibətlərin arxasında Azərbaycanın maraqlarını gözləmək çox çətin olacaq. Münasibətlərin yenidən gərginləşən dövründə roblemlər yaşanacaq".

Səxavət Məmməd
Ölkə.Az