Rio-2016: Bu gün üçün idmançılarımızın təqvimi
2016-cı il Rio-de-Janeyro Yay Olimpiya Oyunlarında bu gün Azərbaycanın 7 təmsilçisi mübarizə aparacaq.
Ölkə.Az xəbər verir ki, onlardan 5-i müxtəlif vaxtlarda dünya çempionu olub.
İlk olaraq kanoe üzrə 4 qat dünya və 4 qat Avropa çempionu Valentin Demyanenko start xəttinə çıxacaq.
Bakı vaxtı ilə saat 16:37-də başlanacaq seçmə yürüşdə Demyanenkonun rəqibləri bolqar Angel Kodinov, italiyalı Karlo Taççini, “Bakı 2015” I Avropa Oyunlarının qalibi, litvalı Henrikas Justautas, iranlı Adel Mojallalimoğadam və avstraliyalı Ferents Şekşardi olacaq.
Saat 17:00-da taekvondoçu Patimat Abakarova dayanq üzərinə çıxacaq.
Saat 17:19-da kayakçı İnna Osipenko-Radomskaya 1 nəfərlik qayıqla (K-1) 500 metr məsafəyə seçmə yürüşə çıxacaq.
Saat 17:05-də atlet Hayle İbrahimov 5000 metr məsafəyə qaçış yarışında iştirak edəcək.
Saat 17:48-də Azərbaycanın qadın güləşçilərindən dünya və beşqat Avropa çempionu, eləcə də “Bakı 2015” I Avropa Oyunlarının qalibi Mariya Stadnik 48 kq. çəki dərəcəsində ilk görüşünü keçirəcək. Onun 1/8 finalda rəqibi Patrisia Alexandra Bermudes olacaq.
Saat 17:56-da isə daha bir dünya və Avropa çempionu Yuliya Ratkeviç 58 kq. çəkidə 1/8 final qarşılaşmasında çıxış edəcək. O, ukraynalı Oksana Herhellə üz-üzə gələcək.
Nəhayət, saat 22:30-da boksçu Elvin Məmişzadə 52 kq. çəki dərəcəsində özbək Şaxobidin Zoirovla 1/4 final görüşündə üz-üzə gələcək. 2015-ci ilin dünya çempionu və I Avropa Oyunlarının qalibi olan Məmişzadə qələbə qazansa, yarımfinala yüksələrək, ən azı bürünc medalı özünə təmin edəcək.
