Almaniya İncirliyin müqabilində "erməni soyqırımı"nı tanımayacaq

Ölkə.Az xəbər verir ki, Almaniya mətbuatında yayılan xəbərlərə görə, Almaniya hökuməti Bundestaqın qəbul etdiyi qondarma "erməni soyqırımı" ilə bağlı qətnaməni tanımaq niyyətində deyil.

Verilən xəbərlərə görə, yaxın günlərdə hökumətin rəsmi nümayəndəsi Şteffan Zaybertin xüsusi bəyanatla çıxış edərək parlament tərəfindən qəbul edilən qətnamənin hökumət üçün məcburi xarakterə malik olmadığını bəyan edəcək. Hökumət nümayəndəsinin Bundestaqın sözügedən sənədini hüquqi qiymətə malik olmayan siyasi bəyanat kimi qiymətləndirməsi gözlənilir.

Almaniya hökuməti buna cavab olaraq Türkiyə hökumətinin alman deputatların “İncirlik” hərbi bazasına daxil olmasına razılıq verəcəyinə ümid edir.

TASS agentliyi isə bildirib ki, Almaniya Xarici İşlər Nazirliyinin nümayəndəsi Martin Şefer Almaniya xarici işlər naziri Frank Valter Ştaynmayerin Bundestaqın "erməni soyqırımı"nın tanınması haqqında qətnaməsini dəstəklədiyini bildirib.

Qeyd edək ki, iyunun 2-də Almaniya Bundestaqı qondarma “erməni soyqırımı” ilə bağlı qətnamə qəbul edib. Qətnamə “101 il əvvəl Osmanlı imperiyasındakı erməni və digər xristian azlıqların soyqırımının anılması” adlanır.

İlhamə
Ölkə.Az