Tahir İmanov Qorxmaz Əlilicanzadə qarşısında niyə susdu?

Tanınmış aktyor, sənətşünaslıq üzrə fəlsəfə doktoru Qorxmaz Əlilicanzadə unikal.org-a müsahibəsində KVN-çilər və onların serial çəkməsi barədə tənqidi ifadələr səsləndirib.

Aktyor bildirib ki, KVN-çilərin gördüyü iş pul yumaqdır:

"Bilirsiz, KVN uşaqlarının işi gənclər arasında özfəaliyyətdir. Onların işinə yaradıcılıq deməzdim. Bu, gənclər arasında bir məşğuliyyətdir. Onlara vaxtilə o qədər pul buraxdılar ki... KVN-ə verilən o pullar vaxtilə Hacıbaba Bağırova, Nəsibə xanım Zeynalovaya, Siyavuş Aslana və başqalarına ayrılsaydı bizim kinomuz çox inkişaf edərdi. Kino çəkilir, tarixdə qalır. KVN-çilərin oynadığı rol tarixdə qalmır. Onlar bu rolu oynadılar, getdi. KVN komandasının üzvü Bəhram Bağırzadə çox istedadlı adamdır. Amma o birilər bilmirəm hansı sənətlərindən danışırlar?"

Ölkə.Az-ın əməkdaşı səsləndirilən fikirlərlə bağlı əməkdar artist, "Planet Parni iz Baku" KVN teatrının rəhbəri Tahir İmanovla əlaqə saxlayıb. İmanov Əlilicanzadənin dediklərinə belə reaksiya verib:

"Ağsaqqal adamdır, fikrini deyib. Bu onun hüququdur. Mənim də hüququm var ki, susum, şərh etməyim. Susmağım o demək deyil ki, razıyam, yaxud narazıyam. Məsləhət görərdim ki, ara vurmayasınız".

Hər halda inanmaq istərdik ki, Tahir İmanov serial çəkməklə "pul yumur", sənətə xidmət edir.

İntiqam VALEHOĞLU
Ölkə.Az