Aşıq Namiq həmkarına

Ötən gün tanınmış aşıq Azər Xanlaroğlunun saytımıza verdiyi müsahibədəki bəzi məqamlar həmkarı Namiq Fərhadoğlunun narazılığına səbəb olub.

Aşıq Ölkə.Az-ın redaksiyası ilə əlaqə saxlayaraq, həmin məqamlara aydınlıq gətirmək istədiyini bildirib. Təbii ki, qarşı tərəf olaraq Fərhadoğlunun cavab haqqı olduğundan bu dəfə suallarımızı o cavablandırır.

- Namiq, istərdim əvvəlcə bu məsələyə aydınlıq gətirək. Aşıq Azər Xanlaroğlunun saytımıza verdiyi müsahibədən sonra mənimlə əlaqə saxladınız və müsahibə vermək, müəyyən məqamlara aydınlıq gətirmək istədiyinizi bildirdiniz. Buyurun...

- Əvvəla nə Azərin, nə də digər aşıqların başı üçün deyil ki, mənim sənətimə münasibət bildirələr. Onlar özləri nə gündədirlər, nə iş görüblər, nə bacarıblar? İndiyə qədər yerlərində addımlayırlar. Gənclərin içərisində öz üzərində işləyən Aqşin Tariyeloğludur. Var da, bir iki nəfər var. Hamısı qırx ildir "Baş sarıtel", bir də "Türkün bayrağı"nı çalır. "Baş sarıtel"i Azərin rəhmətlik atası aşıq Xanlar ifa etmişdi. Azər özü neçə ildir yerində addımlayır. Birincisi, Allah ona şəfa versin. Amma onun başı xəstəymiş, bədəni yox. Onun başında çatışmazlıq var ki, illərdir mənimlə oturub-durub, tonlarla çörək kəsmişik, dostluq, qardaşlıq etmişik, yeyib-içmişik.

- Müsahibədə də aşıq Azər münasibətlərinizin yaxşı olduğunu bildirir. Yəni, onun iradları sənətinizədir...

- Sən kimsən ki, mənim sənətimə söz deyirsən? Sən aşıq Ədalətsən, Əli Quliyevsən, aşıq Ulduzsan, Gülarə Azaflısan? Məndən də bir yaş balacasan, get "pampers"inlə oyna da. Bu və bunun kimi bir neçəsi məni həzm edə bilmir, gözləri götürmür. Bayaq "Instagram"da gördüm ki, Aqşin yeni mahnı ifa edib. Yazdım ki, xeyirli olsun. Belələrinin əksəriyyəti sosial şəbəkədə dostluğumda var, uğurlarımı görürlər. Konsertimin açılışına aşıq Ulduz gəldi. Qadın aşıqlar arasında ondan yuxarısı yoxdur. Əməkdar mədəniyyət işçiləri aşıq Ulduz, Gülarə Azaflı, Solmaz Kosayeva, Mədəniyyət və İncəsənət Universitetinin müəllimi, əməkdar mədəniyyət işçisi Nemət Qasımlı, aşıq İslam Aslanbəyli, ustad aşıq Qələndər, aşıq Zülfiyyə, Telli Borçalı gəlib. Bu dediklərimin hamısını yaz ha.

- Müsahibə diktofonla aparıldığına görə, diqqətdən qaçan nəsə ola bilməz...

"Köklə sazı" müsabiqəsi barədə aşıq Azər bildirir ki, orada bir çox ifaçılar sazı kökləməyi bacarmırlar. İstərdim bu barədə danışasınız.

- Qardaş, hər adam aşıq Ədalət, aşıq Namiq, Nemət Qasımlı olası deyil ki. Bunlar da gənclərdir. Aşıqlar Birliyinin sədr müavini Altay Məmmədli, əməkdar mədəniyyət işçisi aşıq Sərdar dəfələrlə layihəmizin münsifi olub. Şirvan aşıqlarının ən böyük ustadı, aşıq Şakir yadigarı Əvəzxan Xankişiyev də münsifimiz olub. Bəzi gənc aşıqlar deyiblər ki, mən də gəlim orada oturum. Demişəm, hələ gəncsiniz, gedin öyrənin, sizin münsif olmağınıza çox var. Deyiblər ki, bəs sən? Demişəm ki, bədbəxt uşağı, mən layihə rəhbəriyəm e, şəxsi büdcəmlə ortaya çıxan işdir.

- Telelayihə hazırlamaq böyük maliyyə tələb edir. Bu məsələdə sponsor var idi?

- Bütün layihələrimin sponsoru özüməm. Sponsor çıxıb, qəbul etməmişəm. Kişinin sponsoru olar? Özüm ona-buna, neçə-neçə gənclərə sponsorluq edirəm.

- Yanılmıramsa, qalibə bağışlanan avtomobili də özünüz almışdınız...

- Hər bir şeyi. Gördüyünüz kimi aparıcılar da tanınmış xanımlardır. Birində Təranə Səmədova, birində Lalə Mustafayeva aparıcıydı. Hətta "Dünya" televiziyasının aparıcılarını uzaqlaşdırdım, oradakı bütün işçilərim ATV və "Xəzər"in işçiləridir.

- Əgər belədirsə, niyə həmin layihəni məhz bu iki telekanaldan birində həyata keçirmədiniz?

- Çünki bu təzə açılmış kanaldır, bütün rayonlar, Rusiya baxır. Həm də ən əsası ona görə ki, Bakı kanallarında reklam çoxdur. Amma burada dayanmadan iki saatlıq efirdir. Xahiş edirəm, "Sənin ulduzun" layihəm haqda da yaz.

- İki saat reklam olmurdu?

- Çox qısa. Orada tanınmış müğənnilər iştirak edirdi, çox vaxt yanımda münsif kürsüsündə xalq artisti Teymur Mustafayev, əməkdar artistlər Cavanşir Məmmədov, Sabir Əliyev, Ruhəngiz Allahverdiyeva əyləşirdi. Dövlət tərəfindən ad almamış adamları ora çağırmıram. Dəfələrlə müğənnilər pul təklif ediblər. Demişəm ki, münsif kürsüsündə sanballı, dövlətin, prezidentin ad verdiyi adamlar olmalıdır. Kiminsə 200-300 manatına mənim ehtiyacım yoxdur.

- Özünüzün fəxri adınız varmı?

- Fəxri ad inşallah olacaq da. Aşıqlardan 32-33 yaşında heç kimə ad verməyiblər ki, mənə də versinlər. Allahın köməyilə bu yaşda ilk ad alan mən olaram.

- Bu layihəyə nə qədər vəsait xərcləmişdiniz?

- Hər layihənin ərsəyə gəlməsi üçün 25-30 min pul xərcləyirəm.

- Bir maşının puludur...

- Bəli, xeyir də götürmürəm. Bu mənim aşıq sənətinə xidmətimdir və indiyədək heç bir aşıq bunu etməyib.

- Belə anladım ki, toylardan qazanıb sənətə xərcləyirsiniz.

- Tələbələrimə dərsi də pulsuz keçirəm. Məktəbim, ofisim var, bunlar da pulsuzdur. Bunu edirəm ki, aşıq sənəti yaşasın. Baxıram, yazırlar ki, filan müğənni filan konserti verdi. Sən özün də bilirsən ki, həftə səkkiz, mən doqquz yetmiş sayt yazır məndən. Niyə yazırlar? Ona görə yazdırıram ki, aşıqların da içərisində ortalıqda bir nəfər olsun.

- O yazılar pul müqabilində yazılır?

- Dünən sənə dedim ki, iki mətbuat katibim var.

- Hətta xalq artistlərinin bir mətbuat katibi olur. Biri bu işi çatdırmırmı?

- Bəzi saytlar bir mətbuat katibimi eşidir, bəziləri digərini. Biri musavat.com-da, digəri big.az saytında çalışır. Bu saytlar Azərbaycan xalqına xidmət edir. Mən də bilirəm ki, nədir, nə deyil. Qəzeti arxasından oxuyan bir adamam. Adam var burnunun ucunu görə bilmir, amma mən divarın o üzünü görə bilirəm. Hasarın o üzünü görməyi bacarıram. Nə iş görmək lazımdırsa, bilirəm. Azər də mənim dostumdur. Deyir ki, duet oxumamışıq, dinləmirəm. Nəinki Azər, bir çoxları məni qəbul edə bilmirlər. Görürlər ki, Namiq kanallarda xalq artistləriylə, deputatlarla birgə münsif kürsüsündə oturur...

- (Sözünü kəsirəm) Yeri gəlmişkən, aşıq Azər sizin konsertlərin birində deyir ki, Namiq sabah deputat, nazir olsa təəccüblənməyin. Belə bir fikriniz, iddianız varmı?

- (gülür) Yazacaqsan ki, aşıq Namiq deputat olmaq istəyir?

- Zarafatsız soruşuram.

- Deputat xalqın vəkilidir də. Namizədliyimi versəm, bilirəm ki, yetərincə səs alaram. Çünki xeyriyyəçi insanam, qazandığımın doxsan faizini sənətin inkişafına, gənclərin sənətdəki yeni addımlarına xərcləyirəm. Sabir Əliyev, Cavanşir Məmmədov kimi sənətkarlar deyirlər ki, sən bu boyda işləri görən yeganə aşıqsan. Onların bu sözləri demək üçün məndən asılacaqları yoxdur. (telefonda həmin sənətçilərin dediklərini dinlətdirir-İ.V.) Sabir Əliyevin reklama ehtiyacı varmı?

- Özünüz də 4-5 il əvvəl "Virtuoz" layihəsindən üzə çıxdınız...

- Səhvin var.

- Şəxsən mən ilk dəfə sizi həmin layihədə görmüşəm.

- Yox e, qulaq as, deyim, yaz.

- Deyin...

- Problem yoxdur e. Görünür, sən məni yaxşı tanımırsan, ona görə deyirəm bunları. Bu sözləri heç bir sayta demirəm.

Birincisi, on dörd yaşımdan AZTV-də oxuyuram, atam da, babam da aşıqdır. Qızıl fondda oxumaqlarım var, gözəl səsim olub. Bu yaxınlarda arxivdən öz ifamda "Qarabağ şikəstəsi" çıxartdım. Bu ifanı on dörd yaşımda etmişəm.

- Bəs indi niyə oxumursunuz?

- İndi də oxuyuram. "Bir maral var imiş" adlı mahnını görün necə gözəl oxumuşam. Sabir Əliyev hər adamı bəyənməyən sənətkardır, mənə deyir ki, sənin gül kimi səsin, bal kimi tembrin var, oxu da. Deyir ki, ifana söz yox, virtuozdu, bir nömrədir. Amma sənin gözəl oxumağın da var. Qışqırmaqla deyil, gərək ürəkli oxuyasan. "Xəzər" TV-də Azərlə Vüsalənin "Eldən-elə" verilişiylə on dörd ölkəyə getdim. Şimali Kiprin prezidenti Rauf Denktaşla görüşdük. Bunlar elə-belə deyil e, hamısı "Youtube"da var.

- O verilişə də maddi dəstəyiniz var idi?

- Öz şəxsi pulumla gedirdim. Dedim axı sənətimə pul yatırıram. Özün bir konsertimdə olmusan. Şadlıq Saraylarının birində 100 manatlıq stolu 50 manata endirmişdim. Orada heç camaat toy eləyə bilmir, mən konsert verdim. Həmin konserti də 7-8 kanal gəldi çəkdi, efirdə anonslarım getdi. Qazancımın böyük qismini sənətə qoyuram və qoyacam da. Mənim də 70-80 minlik maşınlarım olub. Sonra görmüşəm ki, bunlar heç nədir.

- Söhbəti özünüz yaxşı yerə gətirib çıxardınız.

- Mənim özüm jurnalistəm də.

- Böyük məbləğlərdən danışırsınız. Bir aşıq sənətiylə bu qədər pul qazana bilərmi? Yoxsa dostların, tanışların köməyi var?

- Dost-tanışlarım heç vaxt sponsorum olmayıb. Heç vaxt pul dalınca qaçmamışam. Məsələn, dostum deyib ki, Tovuzda bir toy var. Orada pul veriblər götürməmişəm. Demişəm ki, dostumun adına gəlmişəm. Yanımdakı Mənzurə Musayeva deyib ki, heç olmasa 3-4 yüz manat yol xərcini götür də. Demişəm ki, lazım deyil. Bakıya gələndə də o adama demişəm ki, getdim, iştirak elədim, gəldim. Soruşub ki, nə verdilər, dedim heç nə götürmədim. Mən siyasətciləm, bilirəm nə etmək lazımdır. İki-üç yüz manat ardınca qaçmıram.

- O da çıxarıb on min verib ki, sağ ol, gedib adımdan iştirak elədin.

- İndi hər nə edib də. Söhbət puldan getmir. O vaxt mənim efirdə konsertimin anonsu getdi, əlli bilet satıldı, camaatın kasıb vaxtıydı.

- Nə vaxt?

- İki-üç il əvvəl. Bilet əlli manat idi. Dostlarıma zəng vurdum, dörd yüz nəfər gəldi, dedilər ki, ölməmişik. Hamısı da dövlət məmurları, babat vəzifədə işləyən adamlardır. Özümü digər aşıqlardan xoşbəxt hesab edirəm. Çünki əhatəm var. O əhatəmi də mərdliyimlə, kişiliyimlə qazanmışam, puldan ötrü sənətimi satmamışam.

- Konsertlərinizin əksəriyyəti şadlıq saraylarında olub. Bəs konsert salonunda nə zaman konsert verəcəksiniz?

- Opera və Balet Teatrının, Dövlət Filarmoniyasının qiyməti ən yuxarısı iki min manatdır. Düzdür, Heydər Əliyev adına Sarayın icarə qiyməti bahadır. Məsələn, şadlıq sarayında olan konsertlərimin birində on bir min ziyan elədim.

- Bahoo...

- Hazır o məbləğin iki minini filarmoniyaya, hər maqazin verilişinə də min manat verərdim gəlib çəkərdilər. Bilirsiniz ki, ödənişlədir də. Ya dövlət etməlidir, ya da özün ödəməlisən.

- Restoranda tamaşaçının qarşısında yemək olanda bir az başqa cür alınır. Bir də var sırf konsert salonunda çıxış edirsən...

- Əvvəl konsertlər eləydi də. Əvvəl Dərnəgüldə bir restoran vardı, biletin biri 5-10 manat olurdu. Bilet 15 manat olanda içində lülə kabab da olurdu. Yüz nəfər yığışıb gəlirdilər, konsertə qulaq asırdılar. Restoran müdirinə də iki yüz manat verirdilər.

- Sarayda konsert verəcəksinizmi?

- Dedimsə, edərəm.

- Amma Heydər Əliyev adına Saray iki min tamaşaçı tutur. Oranı dost-tanışla doldurmaq çətin olar axı.

- Mənim yüzdən çox tələbəm, onların qohum-əqrəbaları var. Hər yarışmamda 25-30 nəfər iştirak edir, öz sevənlərim də var. "Youtube"da milyondan çox izləyicim var. Zülfiyyədən başqa hansı aşığın videosuna milyon izləyici baxır?

Deyirsən ki, "Virtuoz" yarışından tanındın. O beş il əvvəl olub. Ondan əvvəl ATV-də "Yağ kimi", Aygün Kazımovanın "Xeyir ola" verilişi vardı. Bir on dəfə ora çıxdım, "Eldən elə"ylə on dörd ölkəyə getmişdim, Könül Kərimovanın verilişlərinə çıxmışdım. "Virtuoz" verilişinə aparıcı Mikayılın xahişiylə getmişdim. Həmin layihədə xalq mənə altmış beş min səs göndərdi.

- O səsləri də dost-tanışlar göndərirdi?

- Orada özümə bir qəpik də səs vurmamışdım. Nəyimə lazım idi?

- Bildirdiniz ki, o layihəyə qədər tanınırdınız. Adətən tanınan sənətçilər bu tip layihələrə qatılmırlar...

- Orada Röyanın sintezator çalanı, Abbasın, Ayazın, Eltonun musiqiçiləri vardı və hamısını SMS-də uddum. Onlar yaxşı musiqiçilərdir. Amma ondan əvvəl Bakının babat restoranlarında işləmişdim, dövlət məmurlarıyla ünsiyyətdə olmuşam, məni tanıyırdılar. Onlar isə arxa planda qalıblar, yüz-iki yüz manatlarını alıb gediblər. Saz isə daha populyar alətdir.

- Demək istədiyim o idi ki, indi bir tanınmış saz ifaçısını hansısa müsabiqəyə cəlb etmək çətin olardı. O dövrdə nə əcəb razılıq verdiniz?

- Mikayılın, oradakı dost-tanışın xahişiylə qoşuldum, yoxsa nəyimə lazım idi ki? Kanala gedəndə "zonnu" (bu ifadəni özümüz müsahibin dediyi kimi təqdim edirik) içəri girirdim, o birilər bir saat gözləyirdilər ki, görək qapı açılacaqmı? Mənə deyirdilər, sən niyə bizdən tez içəri girirsən. Efirdə də demişdim ki, siz uşaq-muşaqsız (gülür). Dedim, sizin aşıq Namiq olmağınıza çox var. Bura da özümü sınamaq üçün gəldim ki, görüm xalqım, millətim məni necə dəstəkləyir. Sonra da bir neçə konsert verdim, müasir kliplər çəkdirdim. Məni tənqid edən adamlar isə yerində addımlayanlardı.

- Sazda müxtəlif yeniliklər etdiyinizi bildirdiniz. Bundan sonra bir ərəb musiqisi, yaxud braziliyasayağı rəqs gözləyə bilərikmi?

- Qardaş, mən kökü bilirəm. Aşıq Azər isə beş mahnı bilir, telefonda özünə də dedim ki, sən "İrəvançuxur", "Keşişoğlu"nu, "Şamlar yandı" havasını, güllü qafiyəni bilmirsən. Azər vaxtilə atasının yanında sintezatorçalan gedirdi. Dostumdur deyə, çox üstünə getmirəm. Mənə təsir edən odur ki, deyir, Namiqə qulaq asmamışam. Halbuki mənimlə ANS-də Sərxanın verilişində duet ifa etmişik.

- Dediyim yenilikləri edəcəksinizmi?

- Bunları da yaz ki, o yalan deyir. Dəfələrlə mənimlə gündəmə gəlmək istəyən, vurmağa cəhd edənlər olub. Heç biri qalib gələ bilməyib. Çünki həmişə faktla, sübutla iş görürəm.

- Sualım cavabsız qaldı...

- Sosial şəbəkədə bir ifamı paylaşıram, məndən əvvəl ideyamı oğurlayırlar. Zamanı gələndə deyəcəyəm. Məqsədim sazı dünya səhnəsinə çıxarmaqdır, imkanları genişdir. Burada rus, türk, ərəb mahnıları ifa etmək olar. Cavanşir Məmmədov özü qarmon ifaçısı olub və dedi ki, Namiq sazın imkanlarını göstərir. Sazda "vorobskoy" mahnılar da ifa etmişəm, Üzeyir Mehdizadəylə duetimiz də olub. Sazı hamı tanıyır, amma imkanlarını görsünlər. Bu alət çayxana-meyxana üçün deyil. Düzdür, onlar da çörək qazanmalıdır. Ancaq bir pedaqoq kimi hər zaman tələbələrimə göstərirəm ki, bunları da öyrənin.

İntiqam VALEHOĞLU
Ölkə.Az