Tramp dünyaya səs salan fərman imzaladı

“Ölkə.Az” xəbər verir ki, yeni fərman dini azadlıqlar haqqındadır. İmzalanmış yeni fərmana görə, dini təşkilatlara siyasi xadimləri  dəstəkləməyi, siyasətlə əlaqəli digər fəaliyyətlərlə məşğul olmağı icazə verilir.

Bu qərar ABŞ-da birmənalı qarşılanmayıb. Tramp administrasiyasının əleyhinə olanlar bu fərmanı ziddiyyətli qərar hesab ediblər.

Tramp isə öz növbəsində bu iddialara cavab verib. O, Ağ Evdə çıxışı zamanı qeyd edib ki, fərman ABŞ-da din və söz azadlığını təmin edəcək:

“Vergi qurumu siyasi çıxışlara görə dini təşkilatları bir daha təqib etməyəcək. Mənim administrasiyam dövründə söz azadlığı kilsə, sinaqoq və digər dini obyektlərin  kandarında qalmayacaq. Hökumət fikir ifadəsinə görə dini qurumları bir daha təqib etməyəcək. ABŞ heç vaxt dini diskriminasiya ilə məşğul olmayacaq”, - deyə Tramp bildirib.

Bundan əlavə, Tramp xüsusi vurğulayıb ki, ABŞ-da dini azadlıqlar müdafiə edilir:
“Biz dini etiqadlara hörmətlə yanaşırıq və bütün dini azadlıqları müdafiə edirik”.    
 
Qeyd edək ki, Trampın imzaladığı fərman “Consonun düzəlişləri” adlanan qanunu qüvvədən salıb. 1954-cü ildə qəbul olunan qanun kilsə və digər dini qurumlara siyasətə qarışmağı qadağan edib. 

Ziya Səccad
Ölkə.Az