Bill Klinton yazacağı kitabda Amerikanın sirrlərini açacaq

“Ölkə.Az” xəbər verir ki, bu barədə Bill Klinton “Hollywood Reporter” nəşrinə məlumat verib. Onun sözlərinə görə, yazılacaq roman "Prezident itkin düşüb" adlanacaq. Romanın əsas qəhrəmanı Amerika prezidenti olacaq.

Kitab "Alfred A. Knopf" və "Hachette" nəşriyyatları tərəfindən dərc olunacaq. Bildirilir ki, əsər özündə "yuxarı hakimiyyət dairələrində dünya miqyaslı nadir intriqalar, həyəcanlı gözləntilər və gizli dramın vəhdətini" əks etdirir.

“Kitabın üstünlüyü onda olacaq ki, burada baş verənlər real həyatı əks etdirəcək. Çünki mən Ağ Evdə baş verənləri, Vaşinqtonda qəbul edilən qərarların əsas mahiyyətini və digər qaranlıq məsələləri əla bilirəm”, - deyə B.Klinton bildirib.

Kitab barədə digər müəllif, peşəkar yazıçı, dedektiv və triller əsərlərinin mahir yaradıcısı olan Ceyms Patterson isə əsər barədə belə açıqlama verib.

“Romanda mən cərəyan edən hadisələri nəql edən rolundayam. Baş verən hadisələri Bill Klintonun köməkliyi ilə daha yaxşı və ətraflı dərk edir və oxuculara çatdıracağam”, - deyə Ceyms Patterson bildirib.

Qeyd edək ki, kitab 2018-ci ilin yayında işıq üzü görəcək.

Ziya Səccad
Ölkə.Az