Moskvada terror törətməyi planlaşdıran İŞİD-in 4 üzvü yaxalandı

Rusiya polisi Moskvada terror törətməyi planlaşdıran İŞİD terror təşkilatının üzvlərini yaxalayıb.

“Ölkə.Az” xəbər verir ki, Rusiya hüquq-mühafizə orqanlarının keçirdiyi əməliyyat nəticəsində ilk əvvəl Abduşükür Gülmirzəyev yaxalanıb. Əməliyyat mayın 25-də keçirilib. Yaxalan şəxsin ifadəsinə əsasən onunla əlbir olan digər 3 terrorçu da ifşa olunaraq saxlanılıb.

Saxlanılanlar Məhəmmədyusif Aşurov, Furkat Kuşayev, Maqamed Davudovdur. Saxlanılan şəxslərin məhkəməsi keçirilib.

Məhkəmədə ifadə verən A.Gülmirzəyev deyib ki, Məhəmmədyusif Aşurov Moskvada güclü partlayış törətməklə bağlı planlar hazırlayırmış.
“M.Aşurov partlayış törətmək üçün plan hazırlayırdı. Daha dəqiq bilmirəm, lakin o bu barədə danışırdı. O, içərisində partlayıcı maddələr olan yeşiklər hazırlamışdı. Onun Suriyada dostları var. Aşurov tez-tez onlarla telefonla danışırdı”, - deyə Gülmirzəyev bildirib.

Saxlanılan şəxslər Moskvada yaşayış və inzibari binaların, eləcə də, ictimai nəqliyyatda terror aktları törətməyə cəhddə ittiham ediliblər. Araşdırmalar zamanı məlum olub ki, saxlanılan şəxslərə Suriyada İŞİD tərəfindən xüsusi hazırlıq kursları keçiblər. Onların Rusiyada və digər ərazilərdə törədilən terrorda iştirka edib-etmədikləri araşdırılır.

Qeyd edək ki, saxlanılan şəxslər Rusiya və Orxa Asiya vətəndaşlarıdır.

Ziya Səccad
Ölkə.Az