Monteneqro NATO-nun rəsmi üzvü oldu

Monteneqro rəsmi olaraq NATO-ya üzv olub.

"Ölkə.Az" xəbər verir ki, bununla bağlı tədbir təşkil olunub. Tədbir ABŞ Dövlət Departamentin binasında keçirilib. Bununla da, Monteneqro Şimali Atlantika Alyansının 29-cu üzvü olub.

Ölkənin baş naziri Duşko Markoviç bununla bağlı protokolu ABŞ dövlət katibinin müavini Tomas Şennona təqdim edib. Tədbirdə Tomas Şennon Monteneqro rəhbəliyini təbrik edib və üzvlüklə bağlı çıxış edib.

“Monteneqronun bu təşkilata daxil olması o deməkdir ki, NATO o ölkələr üçün qapılarını açır ki, həmin dövlətlər yeni islahatlar təqdim edə bilirlər. Əsas odur ki, Alyansın qaydalarına hörmətlə və məsuliyyətlə yanaşılsın. Həmin ölkələr üzvlüklə bağlı bütün riskləri qəbul etməyi bacarmalıdırlar. Öhdəliklər yerinə yetirməlidirlər”, - deyə Tomas Şennon bildirib.

Qeyd edək ki, NATO (Şimali Atlantika Müqaviləsi Təşkilatı) 1949-cu ildə qurulmuş hərbi ittifaqdır. NATO sülhün qorunmasını, azadlıqların müdafiəsini siyasi həmrəylik yolu ilə təmin edən və üzvlərinə qarşı yönəlmiş istənilən aqressiya formalarının dəf edilməsini, lazım gəldikdə isə hərbi gücdən istifadə edilməsini nəzərdə tutan müstəqil dövlətlərin alyansıdır. NATO-nun 28 üzvü var. 28 üzv ölkənin ikisi Şimali Amerikada (ABŞ və Kanada), iyirmi altısı isə Avropada yerləşir. İslandiyadan başqa qalanların ordusu vardır. NATO üzvü üç ölkə (ABŞ, Böyük Britaniya və Fransa) nüvə silahına sahibdir.

Ziya Səccad
Ölkə.Az