Qətərin vətəndaş və təşkilatları terrorçular siyahısına daxil edildi

"Ölkə.Az" xəbər verir ki, Səudiyyə Ərəbistanı, BƏƏ, Bəhreyn və Misir Qətərin 59 vətəndaşını və 12 təşkilatını terrorçular siyahısına əlavə edib.

Dörd ərəb dövlətinin bəyanatında deyilir ki, göstərilən şəxs və təşkilatların Qətərin ikili standartı ilə əlaqəli olduqları barədə faktlar var. Qətərin ikili standart siyasəti isə bir tərəfdən terrora qarşı mübarizə deklarasiyası, digər tərəfdən isə müxtəlif terror təşkilatlarını maliyyələşdirməsidir.

Siyahıya Qətər vətəndaşları ilə yanaşı İordaniya, Yəmən, Liviya və Küveyt vətəndaşları da daxil edilib. 4 ərəb dövləti hakimiyyətinin fikrinə görə, bu şəxslər də terrorçulara maliyyə yardımı göstərir. Siyahıda Qətərin sabiq xarici işlər naziri Abdulla bin Halid əl Taninin də adı var.

Terrorçulara kömək edən təşkilatlar arasında Qətər, Bəhreyn və Liviyaya məxsus hüquqi şəxslər var. Onlar arasında xeyriyyə fondları, könüllülər mərkəzi və bir neçə siyasi müxalifət hərəkatının adı var.

Qeyd edək ki, siyahının yenilənməsi gözlənilir.

Qətər tərəfi siyahı barədə heç bir açıqlama verməyib.

Hikmət
Ölkə.Az