Tanınmış kinorejissor Putinin ABŞ-la dialoqa hazır olduğunu bildirib
"Ölkə.Az" xəbər verir ki, Oliver Stounun fikrincə Putin ABŞ rəhbərliyi ilə dialoqa girməyə hazırdır.
Kinorejissorun çəkdiyi film bu həftə “Showtime” kanalında efirə verilib. Filmin təqdimatında çıxış edən Oliver Stoun Putinlə yaxından tanış olmağına görə şad olduğunu bildirib.
“Putin Rusiya və ABŞ arasında korlanmış münasibətləri nə vaxtsa düzəldə biləcəkmi?” sualına kinorejissor nikbin cavab verib.
“Ümid edirəm ki, iki ölkə arasında münasibətlər düzələcək. Əminəm ki, Putin ABŞ ilə dialoqa hazırdır”, - deyə Oliver Stoun bildirib.
Kinorejissor hesab edir ki, vəziyyət nə qədər pis olsa da, həmişə çıxış yolu var və heç vaxt ümidsiz olmaq olmaz:
“Əsas odur ki, işlərin düzəlməsi üçün cəhd edəsən. Çalışmaq lazımdır ki, sülh yaradaq. Putin neçə ildir ki, sözlərini dəyişməyib. Putin terrorla mübarizə etmək istəyir. O da nüvə silahı istehsal etməyin əleyhinədir. Putin də dünyada sülh olmasını istəyir”.
Qeyd edək ki, Putin tanınmış kinorejossora böyük müsahibə verib. Müsahibə bu həftə Amerikanın “Showtime” kanalında yayımlanmağa başlayan filmdə yer alıb. Filmdə Putinin 2000-ci ildə ilk dəfə Rusiya prezidenti seçildikdən sonra dünyada baş verən hadisələrə münasibəti göstəriləcəkdir.
O.Stoun kəskin siyasi mövzularda filmlər çəkən rejissor kimi məşhurdur. Onun qəhrəmanları arasında ABŞ prezidentləri Riçard Nikson, Con Kennedi, Corc Buş var.
Ziya Səccad
Ölkə.Az
