\
Mətn ölçüsü:
  • 100%

\"Xəstəxanalarda yer yoxdur, dedilər ki...\" - Qapanmalar yenidən gündəmdə? - AÇIQLAMALAR

Son günlər əhali arasında yayılmış xəstəliyə görə, qapanmalara gediləcəyi barədə məlumatlar yayılır.

Bundan əlavə, azyaşlılar arasında virusun yayılmasına görə, bir sıra uşaq bağçalarında qapanmaların ola biləcəyi barədə rəhbərlik tərəfindən müəllimlərə xəbərdarlıq edilib.

Habelə Baş Prokurorluğun tədbirlərindən birində qurum əməkdaşlarının maskada olması, ağıllara qapanmanın yenidən aktuallaşacağı barədə sualları gətirib.

Əhali arasında yayılmış xəstəliyin influenza olduğu bildirilsə də, bəzi xəstəxanalarda həkimlər xəstəliyin koronavirus olduğunu söyləyirlər. 

“İki övladımı 39-40 dərəcə temperaturla xəstəxanaya yerləşdirdik. Əvvəlcə həkiminə zəng vurmuşduq, dərhal xəstəxanaya yerləşdirməyimizi tövsiyə etdi. Amma ardınca xəstəxanada yerin olmadığını bildirdi. Güclə xəstəxanalardan birində yer tapdıq. Orada da vəziyyət acınaqlı idi. Evə buraxılan uşaqlar yenidən xəstəxanaya qayıdırdı. Onların yanında qalmağa gələn yaxınları da yoluxurdu. Hətta bəzilərinin ailələri xəstələndiyinə görə başqa bir qohumları onları əvəzləyirdi. Bizə deyildi ki, müalicə koronavirusa yoluxanlara qarşı hansı üsulla aparılıbsa, övladlarımızın sağalması üçün də eyni metoddan istifadə edilib”, - valideynlərdən biri saytımıza açıqlamasında deyib. 

Mövzu ilə bağlı Ölkə.Az-a danışan Milli Məclisin Əmək və sosial siyasət komitəsinin sədri Musa Quliyev hazırkı şəraitdə qapanmalara ehtiyac olmadığını söyləyib:

“Məndə qapanmalarla bağlı elə bir informasiya yoxdur. Hesab etmirəm ki, Azərbaycanda indi qapanma üçün ciddi epidemioloji situasiya var. Amma istənilən halda payız-qış mövsümündə hər birimiz özümüzü qorumalıyıq. Çox sıx yerdə toplanmamalı, maskalardan istifadə etməliyik. Ümumi qapanmalara ehtiyac görmürəm”. 

Deputat həmçinin bildirib ki, qripə görə vaksinasiyanın genişlənməsi yaxşı olardı:

“Profilaktik tədbirlər bu istiqamətdə gedərsə, daha yaxşı olar. Vaksin olunmayanlar da koronavirusa qarşı peyvənd vurdursunlar.

Uşaq bağçalarını qapamaq yox, profilaktik tədbirləri gücləndirmək lazımdır. Valideynlərə xəbərdarlıq edilməlidir ki, uşaqlarda cüzi soyuqdəymə əlaməti olarsa, bağçaya gətirməsinlər”.

Tibb eksperti, professor Adil Qeybulla da Ölkə.Az-a açıqlamasında əhali arasında yayılan xəstəliyin respirator viruslar olduğunu vurğulayaraq, qapanmalara gərək olmadığını deyib:

“Düzdür, pandemiya hələ bitməyib və “Omikron” ştamının mutasiyaları davam edir. Digər tərəfdən də hər il olduğu kimi soyuq vaxtlarda müxtəlif soyuqdəymə xəstəlikləri yaradan respirator infeksiyalar mövcuddur. Bunlar koronavirusun 4 forması və hər zaman mövcud olan qrip kimi viruslardır ki, hər il müxtəlif formada peyda olaraq ayrı-ayrı areallarda epidemioloji vəziyyəti pisləşdirirlər. İndi də anoloji mənzərədir. Hər halda bu dəqiqə qapanmalara getməyə ehtiyac görmürəm. Hesab edirəm ki, mövcud karantin qaydalarına riayət etmək yetərlidir. Situasiyadan asılı olaraq müəyyən qərarlar verilə bilər”. 

Billurə Yunus