Dırnaq kənarında dəri soyulur, qanayırsa, bunları edin!

Ölkə.Az xəbər verir ki, bunu pediatr aytən İsmaylızadə deyib. O bildirib ki, bunun səbəbi “kutikula” adlanan dırnaq kənarındakı dərinin nazik olması və dırnağa yapışıq olması ilə əlaqəlidir:

“Dırnaq uzandıqca kutikula da dartılır və nazik olduğu üçün bəzi yerlərdən zədələnir. Bu zədələnmə səthi və ya dərin ola bilir. Həm də uşaqların əlləri ora-bura çox dəyir və nazik kutikula tez zədələnir. Uşaqlar özü də didərək bu zədələnməni artıra bilir”. 

Həkim belə hallarda valideynlərə övladları infeksiyadan qorumaq üçün tövsiyə də verib:

“Profilaktika üçün hər axşam yatanda barmaq kənarlarına vazelin, badam yağı və ya kokos yağı çəkmək olar. “Aevit” kremi də yaxşıdır. Zədələnməyə kənardan infeksiya düşərsə, dırnaq ətrafında qızarıqlıq, şişmə və ağrı olur. Bu zaman “levomikol” və “vişnevski” məlhəmləri yaxşı təsir edir. Yəni infeksiyalaşmanı yayılmağa qoymur. Dırnaq ətrafı zədələnmə qanama ilə müşahidə olunursa, torpaqla təmasdan qaçmaq lazımdır.

Nəzərə almaq lazımdır ki, çox uşaqların tetanusa qarşı peyvəndi yoxdur.
Vitamin azlığı, əsasən də dəmir və A vitamininə bağlı problemlər özünü dırnaqlarda tezsınma, barmaq yastıqlarında ağrılı çatlar, dərinin dərin soyulması ilə özünü göstərir. Bu zaman həkim müayinəsi, dəmir deposunun analizi lazımdır. Bağırsaq mühitini düzəltmək, balıq yağı, vitamin kompleksi təyin olunur”.

Billurə Yunus