Plastik əməliyyatlar və dolğuların "ölümcül" zərərləri - bu halda çürümə gedir

Azərbaycanlı model və bloger Leyla Mirzəliyevanın etdirdiyi çoxsaylı plastik əməliyyatlardan sonra bədəninin çürüməsi ilə bağlı çıxışı bir çox insanlarda narahatlıq doğurub. Model bildirib ki, etdirdiyi dolğu və silikonlar nəticəsində bədəni çürüyüb.

Ölkə.Az xəbər verir ki, bu hadisə estetik və plastik əməliyyatın, kosmetik prosedurların fəsadlarını yenidən günəmə gətirib.

Əvvəlcə plastik və estetik cərrahiyyənin mahiyyətinə nəzər salaq.

Plastik cərrahiyyə tibbi problemləri müalicə etmək və ya görünüşü yaxşılaşdırmaq üçün bədəninizin müəyyən hissələrini dəyişdirir. Cərrahlar üz, boyun, döşlər, mədə, qollar və ayaqlarda prosedurlar həyata keçirə bilər. Rekonstruktiv cərrahiyyə qüsurları və ya zədələri düzəldir və funksiyanı bərpa edir. Estetik cərrahiyyə isə qeyri-tibbi səbəblərə görə görünüşü yaxşılaşdırır.

Plastik əməliyyatın riskləri nələrdir?

Bütün cərrahi əməliyyatların riskləri var. Plastik və rekonstruktiv cərrahiyyə prosedurları əsas orqanlara və ya incə toxumalara yaxın olan həssas strukturları dəyişdirə bilər.

Fəsadların ehtimalı müxtəlif amillərdən asılıdır. Bunlara əməliyyat növü, sağlamlıq tarixçəniz və siqaret kimi zərərli vərdişlərinizin olub-olmaması daxildir.

Bəzi ağırlaşmalar əməliyyat zamanı baş verə bilər, bəziləri isə sağaldıqdan sonra inkişaf edə bilər.

Plastik cərrahiyyənin potensial risklərinə anormal çapıqlar, qan laxtası, qan itkisi, prosedurunuz zamanı tənəffüs problemləri, maye yığılması (ödem), infeksiya, sinir zədələnməsi, neyropatiya daxildir.

Qeyd edilir ki, siqaret çəkənlərin ağırlaşma riski yüksəkdir. Bu cür əməliyyatlara ciddi yanaşırsınızsa, siqareti tərgitməyə çalışmalısınız.

İnsanların daha gözəl görünmək və qırışlardan xilas olmaq üçün üz tutduğu prosedurlardan biri də dolğu etdirməkdir. Adətən, dolğu etdirən insanlar bu prosesi sonradan davamlı şəkildə təkrarlayırlar.

Mütəxəssislər bildirir ki, hətta siz nə vaxtsa dolğu etdirməyi dayandırsanız belə heç vaxt əvvəlki vəziyyətinizə tam şəkildə qayıda bilməyəcəksiniz.

Nyu-Yorkda sertifikatlaşdırılmış plastik cərrah Dr. Lara Devqan deyir ki, çox sayda dolğu etdirmək üzün formasını dəyişə bilər.

Problem dərinin dərinliyindən daha çox ola bilər, həm üzün görünüşünə, həm də onun funksionallığına təsir göstərir. Həkimlər bunu, adətən, “dolğu yorğunluğu” adlandırır.

Tez-tez dolğudan istifadə edən insanlar bir müddət sonra bunu əritmək üçün müalicə axtarır. Həddindən artıq və ya pis yerləşdirilmiş dolğu üzün mexanikasını poza bilər. Beləliklə, üz əzələləriniz düzgün hərəkət etməyə və bu üzünüzün görünüşünü də dəyişə bilər.

Dolğu kiçik miqdarda tətbiq olunduqda zamanla toxumalarımızla inteqrasiya edə bilir. Dolğunun təsiri azaldıqca qırışlar və kölgələr üzə çıxa bilir. Üstəlik, bu, yaşa bağlı dəyişikliklərlə müşayiət olunur.

İnsanlar bilməlidir ki, dolğunu əritdikdən sonrakı görünüş əvvəlki halından daha pis və xoşagəlməz ola bilər. Çünki gel toxumaları zədələyir və müəyyən mənada yaşlandırır.

Mütəxəssislər hesab edir ki, ixtisasca dermotoloq olmayan şəxslərin kosmetoloji prosedurlar həyata keçirməsi düzgün deyil. Çünki onlar dərinin xüsusiyyətlərini bilmirlər və invaziv prosedur apara bilməzlər.

Kosmetoloq Aytac Əsədova bildirib ki, dolğu prosedurlarından yaranan problemlər kosmetoloqların qeyri-peşəkarlığından və pasiyentlərin ucuz dolğulara üstünlük verməsindən yaranır. Onun sözlərinə görə, dolğularla bağlı problemin yaranmasının əsas səbəbi bədən dolğularının üzə vurulmasıdır:

“Üz, dodaq, bədən dolğularının tərkibi müxtəlifdir. Təəssüf ki, kosmetoloqlar ucuz olsun deyə, bədən dolğularını qadınların üz nahiyəsinə tətbiq edirlər. Bu, çox təhlükəlidir. Çünki bədən dolğularının tərkibində sintetik maddələr daha çoxdur. Bu isə ciddi fəsadlara səbəb olur”.

Kosmetoloq bu halda dolğuların tətbiq edilən nahiyədə kistozlaşdığını, infeksiyalaşdığını söyləyib.

Türkiyədə çalışan azərbaycanlı üz-çənə cərrahı Elmir Seyidli isə deyib ki, dolğunun ən böyük təhlükəsi maddənin damara düşüb onu tıxaması, emboliyaya səbəb olmasıdır. Damar tıxananda da toxumanın çürüməsi baş verir. Burun dolğuları dolğular içərisində ən təhlükəlisidir. Bu orqan gözlərə, beyinə yaxındır. Səhv icra olunarsa, damarla gözlərə gedib onları kor edə bilər.
Bəzən damar emboliyası nəticəsində burunda çürümə, nekrozlaşma baş verir. Bunun qarşısını almaq üçün artıq kiçik Ultrason cihazları çıxıb, prosedur zamanı USM ilə baxılır, əgər damara maddə düşübsə, problemi yerindəcə həll edir.

El arasında sintetik dolğu kimi tanınan biopolimerlərin bədənin hansısa bir hissəsinə vurulması qadağandır. Bu dolğular, ümumiyyətlə, icazəsiz istehsal edilir. Qalıcı olduğundan bir çox kosmetoloq müştəriyə bunu məsləhət görür. Amma dünyada qalıcı dolğu anlayışı yoxdur və heç bir peşəkar-kosmetoloq müştərisinə bunu məsləhət görmür.

Rekonstruktiv və estetik cərrah Dilqəm Məmmədov bildirib ki, biopolimerlər orqanizmdə bir çox problemlərin yaranmasına səbəb ola bilər. Onun sözlərinə görə, plastik cərrahiyədə “təhlükəli bölgələr” anlayışı var:

“Buralara hansısa bir müdaxilədən uzaq durmağa çalışırıq. Məsələn, alt və üst dodağı qidalandıran damarın haradan keçdiyini bilmirsinizsə, dodaq haqqında anatomik biliyə sahib deyilsinizsə, müdaxilə düzgün deyil. Düzgün vurulmayan dolğu mexaniki olaraq damarı tıxamış olar. Bu zaman dodağı qidalandıran damar pozulduğu üçün hüceyrələr ölür və yaralar əmələ gəlir”.

D.Məmmədov bildirir ki, sintetik dolğudan xilas olmağın tək əlacı plastik müdaxilədir.

“Əgər kosmetoloq deyirsə ki, bir iynə vurmaqla sintetik dolğudan xilas olacaqsınız, yalandır. Bu maddə sintetik dolğuya vurulduqda qidalandırıcı mikozası – selikli gişası və dərisi pozulur. Bəslənmə pozulur, hüceyrələr ölür. Kimyəvi olaraq problemlər ortaya çıxır. Damar ölməyə başlayır, yaralar açılır, qan gəlir. Ölmüş hüceyrəyə qan gəlirsə, o yaşamır, daha da parçalanır. Dodaq çürüməyə doğru gedir”.