“Qadınlar ailədə mənəm-mənəmlik edir, kişi ağlayaraq deyir ki…” – Vəkil boşanmalardan danışdı

"Statistika göstərir ki, gün ərzində təkcə bizim təşkilata nikahın pozulması işi üçün müraciət edən 10 nəfərdən 9-u qadınlardır". 

Ölkə.Az xəbər verir ki, bu sözləri vəkil-mediator Gülnar Qulizadə deyib. O bildirib ki, son zamanlarda qadınlar baş verən hadisələrə, ailədə olan çatışmazlıqlara dözümsüzlük göstərirlər:

"Bu günün qadını seriallarda, sosial şəbəkələrdə olan ailə modelini öz ailəsinə gətirmək istəyir. Hansı ki, bu, pərdənin görünən tərəfidir. Amma o, görünməyən tərəfini görmür. Nəticədə ailə faciəyə uğrayır. Bu gün qadınlar ailədə mənəm-mənəmlik prinsipi ilə yaşayır, ailəni idarə etmək ruhunu özündə görür və kişiyə tabe olmur".

Mediator deyib ki, gün ərzində apardığı 5 mediasiya prosesindən 2-nin sırf kişinin maddi qazancının aşağı olması səbəbindən baş verir:

"Kişi əvvəlcə 400 manatlıq işdə çalışır, qadın evdə deyinməyə başlayır. Ər işdən çıxır 600 manatlıq yerdə işləyir, yenə də alınmır. Artıq vəziyyət o həddə çatır ki, kişi ovuc-ovuc ağlamağa başlayır. Deyir ki, mən indi nə edim, digərləri qarşısında hər gün sıxılıram, əzilirəm alçalıram. Qadın deyir ki, filankəsin ailəsində belədir, bizdə niyə elə deyil. Onlar filan xarici ölkəyə getdi, biz getmədik. Yəni digərlərinin ailələrində olan yüksək həyat tərzini bizim qadınlar öz ailələrində tətbiq etməkdən ötrü çıxış yolunu nikahın pozulmasında görürlər". 

G.Qulizadə bildirib ki, bu gün qanunlarda digər boşluq ondan ibarətdir ki, hər uşaq üçün sabit məbləğdə aliment təyin edilir:

"Ailədə 2-3 uşaq varsa, bu məbləği hesablayanda gəlir 500-600 manata çıxır. Qadın da fikirləşir ki, mən bu pulla rahat şəraitdə "öz əlim, öz başım" deyib yaşayaram. 

Sual verirəm ki, yoldaşınızın pis vərdişləri varmı? "Yox" deyirlər. "Yaşamağa eviniz varmı", "işləyirmi" sualına "hə" cavabını verirlər. Deyirlər ki, karyera qurmaq istəyirəm. Dərhal beynimə gəlir ki, bəlkə hansısa ali təhsil müəssisəsini bitirib, işləmək arzusu var. Fikirləşirəm ki, bəlkə yoldaşı ilə danışım, onu yola gətirsəm, ailə dağılmaz. "Hansı karyera" soruşanda deyirkər ki, ya dırnaq ustası olacağam, ya da lazer ustası. Fikirləşir ki, aliment alaram, kirayədə yaşayaram və hər hansı bir kursa getməklə sərbəst həyat sürərəm". 

Billurə Yunus