Uşaqlarda yoluxucu xəstəlik: Yeni infeksiya təhlükəsi

Uşaqlar arasında "qulaqdibi" və ya "svinka" adlanan xəstəlik yayılıb.

Ölkə.Az xəbər verir ki, bunu pediatr Aytən İsmayılzadə deyib. O xəstəliyin əlamətləri və fəsadları barədə məlumat verib:

"Bu gün iki uşaq qulaqdibi nahiyəsinin şişməsi və ağrılı olması şikayəti ilə müraciət etdi. Demək ki, bu xəstəlik yayılır. Xəstəlik elmi dildə "epidemik parotit" ya sadəcə "parotit" adlanır. El arasında "qulaqdibi" kimi tanınır. Virus törətdiyi bu xəstəlik yoluxucudur. Virus ağız suyu vəzisini zədələyir, iltihablandırır. "Parotideus" yəni ağız suyu vəzinin iltihabı deməkdir. Bu zaman qulaqla çənə arasında olan nahiyədə bərklik yaranır, ağzı açanda ağrılı olur. Getdikcə şişlik yayılır, yumşaq olur, hərarət elə yüksək olmur. Ümumi halsızlıq və intoksikasiya əlamətləri az olur. Mədəaltı vəzi, qızlarda yumurtalıq, oğlanlarda yumurtalıqlar da zədələnə bilir".

Pediatrın sözlərinə görə, uşaqlar arasında qarışıq infeksiyalar təhlükəsi var:

"Uşağın ümumi vəziyyətinə diqqət yetirmək, dəyişikliklər haqqında həkimə məlumat vermək lazımdır. Yerli kompres etmək lazım deyil. Virus xəstəliklərində olduğu kimi ümumi müalicə yetərlidir. Bir məqamı da qeyd edim ki, hazırda qızılca virusu, hətta Hepatit A virusu da yayıldığını nəzərə alsaq, "mix" yəni qarışıq infeksiyalar təhlükəsi var. Uşaqları peyvəndsiz olanlar, ya da ikinci doza MMR peyvəndi qalanlar indi etdirir. MMR peyvəndi tərkibində isə həm qızılca, məxmərək, həm də epidemik parotit əleyhinə peyvənd olduğu üçün yeni peyvənd olunanlar ilk 21 gün ərzində parotitin yüngül əlamətlərini yaşaya bilər.
Epidemik parotit peyvəndi qızılca ilə birgə bir və 6 yaşında edilir. Yalnız bir doza peyvənd alan uşaqların da yoluxma və xəstəliyi keçirmə ehtimalı var".

Həkimin sözlərinə görə, müalicənin ev şəraitində aparılması məsləhətlidir:

"Həmişəki kimi ilk növbədə bol maye qəbul etmək lazımdır. Hərarət yüksək olmadığı üçün dərmana çox müraciət etməyin. Qidada xüsusi pəhriz lazım deyil. Sağlam və zəngin qidalanma vacibdir. Ev şəraitində müalicə almaq məsləhət görülür. Ağırlaşma olarsa, yoluxucu xəstəxanaya yerləşdirmək lazım olur".

A.İsmayılzadə əlavə edib ki, digər uşaqların da bu xəstəliyə yoluxmasının qarşısını almaq üçün hr hansı bir vasitə yoxdur. Yeganə həll yolu uşaqları vaxtlı-vaxtında peyvənd olunmasıdır.

Billurə Yunus