Yaddaş itkisinin gözlənilməz SƏBƏBİ
ABŞ-ın "Virginia Commonwealth" Universitetinin Tibb fakültəsinin və "Richmond" Tibb Mərkəzinin alimləri müəyyən ediblər ki, idrak qabiliyyəti zəif olan insanların 13%-də yaddaş pozğunluğu qaraciyər sirrozu səbəbindən yaranır.
"Ölkə.az" Medicina.az-a istinadən xəbər verir ki, tədqiqatda 2009-2019-cu illər arasında demensiya ilə üzləşmiş təxminən 69 min könüllü iştirak edib. Alimlər iştirakçıların həyat tərzi və sağlamlıq vəziyyəti haqqında məlumat toplayıb, sonra onların hər birinin qaraciyər toxumasının vəziyyətini qiymətləndiriblər.
Alimlər müəyyən ediblər ki, demensiyalı xəstələrin 13%-də koqnitiv geriləmə beyindəki spesifik dəyişikliklərlə deyil, qaraciyərdəki çapıqlarla əlaqəlidir.
Tədqiqatçıların fikrincə, yaddaş və diqqətin pisləşməsi qaraciyər ensefalopatiyası nəticəsində mərkəzi sinir sisteminə dəyən ziyana görə baş verə bilər. Qaraciyər ensefalopatiyası normalda qaraciyər tərəfindən təmizlənməli olan zəhərli maddələrin qanda toplanması və beyinə getməsi ilə baş verir.
Alimlər deyirlər ki, qaraciyərin zədələnməsi nəticəsində yaranan demensiyanı müalicə etmək mümkün ola bilər.
Qaraciyərdə iltihab prosesinin aktivliyini azaltmaqla yaddaşı yaxşılaşdırmaq mümkündür.