Əl qurutma aparatları sağlamlığınızı ciddi şəkildə təhdid edir - XƏBƏRDARLIQ

Mütəxəssislər ticarət mərkəzləri, benzindoldurma məntəqələri, restoran və s. obyektlərdə olan əl qurutma aparatları ilə bağlı xəbərdarlıq edir.

Ölkə.Az “Haber7”yə istinadla xəbər verir ki, Türkiyənin Beylikdüzü Medicana Xəstəxanasının yoluxucu xəstəliklər üzrə mütəxəssisi Prof. Dr. Vedat Turhan əl qurutma aparatlarının əsas iş məntiqini və risklərini belə ifadə edib:

“Bu cihazların iki əsas xüsusiyyəti var. Birincisi, onlar istilik istehsal edir və isti havanı istifadəçilərin əllərinə və ətraf mühitə böyük təzyiqlə yayırlar.
Bu proses iki əsas risk yaradır. Bu yüksək temperatura davamlı bakteriyaların çoxalması üçün rezervuar rolunu oynaya bilər ki, buna termomüqavimət deyirik".

Mütəxəssis bu cihazların sağlamlığı ciddi şəkildə təhdid etdiyini bildirib:

“Yüksək təzyiqlə bakteriyaların ətrafa yayılması ayrıca risk yarada bilər. Beləliklə, əl qurutma cihazlarının ən aşağı gücə malik modelləri belə sağlamlıq üçün böyük risk yaradır. Cihaz açıldıqda zərərli hissəcikləri birbaşa əlinizə ötürür. Bu cihazlara atdıqları hissəciklərin qarşısının alınması üçün HEPA filtrinin qoyulması yetərli deyil. HEPA filtri hissəciklərin 75%-ni bloklayır, lakin təhlükəli 25%-i qalır. Bu cihazlar xüsusən də böyük ticarət mərkəzləri kimi yerlərdə çox vaxt yaxşı təmizlənmir. Ona görə də ictimai yerlərdə belə aparatların istifadəsi sağlamlığa zərərlidir. Əvəzində dəsmal kimi alternativ sistemlərdən istifadə edilə bilər”.
Bu cür cihazlardan hər cür xəstəliyi olan insanların istifadə etdiyini xatırladan həkim deyib ki, əl qurutma aparatları tənəffüs yolları xəstəliklərinə, eləcə də dermotoloji problemlərə də səbəb ola bilər.

Billurə Yunus