Bağırsaqlarımızdakı bakteriyalar nə üçün vacibdir? - XƏBƏRDARLIQ
Aparılan araşdırmalara görə, bağırsaqlarımızdakı bakteriyalar çəkimizi idarə edir.
Ölkə.Az “hürriyet”ə istinadla xəbər verir ki, bunu türkiyəli diyetoloq Öykü Kaçar deyib. O, xüsusilə bağırsaqlarda yaşayan bu mikroorqanizmlərin həzmdən tutmuş immunitet sisteminə qədər bir çox bədən funksiyalarında mühüm rol oynadığını bildirib.
Mütəxəssis deyib ki, kök insanların bağırsaqlarında arıq fərdlərdən fərqli bir mikrob quruluşunun olması müşahidə edilib.
“Bu fərq təkcə bakteriyaların növlərində deyil, həm də bu bakteriyaların sayında və onların istehsal etdiyi metabolitlərdə görünür. Çəkili insanlarda yüksək enerjili qidaları daha effektiv enerjiyə çevirən daha çox bakteriya var. Bu, bədənin çoxlu kalori qəbul etməsinə və onları yağ kimi saxlamasına səbəb olur”.
Kaçar mikrobiota ilə piylənmə arasındakı əlaqənin mürəkkəbliyinə də toxunub.
"Qidalanma vərdişləri mikrobiotaya təsir etsə də, mikrobiota da qidalanma seçimlərini formalaşdıra bilər.
Məsələn, müəyyən bir bakteriya növünün çoxalması bir insanın daha şirin və ya yağlı qidalara can atmasına səbəb ola bilər. Mikrobiota ilə piylənmə arasındakı əlaqəyə genetik faktorlar da təsir göstərir. Bəzi insanların genetik quruluşu müəyyən növ bakteriyaların artmasına və ya azalmasına daha çox meylli ola bilər. Bu, piylənmə riskini artıra bilər.
Diyetoloq deyib ki, antibiotik istifadəsi, ətraf mühitin çirklənməsi və stress kimi faktorlar da mikrobiotaya mənfi təsir göstərə və piylənmə riskini artıra bilər.
Kaçar emal edilmiş ərzaqlarla qidalanan və hərəkətsiz yaşayış tərzi olan şəxslərdə zərərləri bakteriya növlərinin çoxaldığını, faydalı bakteriyaların azaldığını söyləyib. O bildirib ki, bu da piylənmə riskini artırır.
Mütəxəssisin sözlərinə görə, sağlam həyat tərzi üçün sadəcə qidalanma və idmana yox, həm də bağırsaq sağlamlığına da diqqət yetirmək lazımdır.
Billurə
