Qida qablaşdırmasında olan kimyəvi maddələr xərçəngə səbəb ola bilər

İsveçrə, Fransa və ABŞ-dən olan beynəlxalq alimlər qrupu müəyyən edib ki, qida qablaşdırmalarında və yüksək dərəcədə emal olunmuş məhsullarda istifadə edilən sintetik kimyəvi maddələr insan sağlamlığına mənfi təsir göstərə bilər. Bu maddələr xərçəng, ürək-damar xəstəlikləri, maddələr mübadiləsi pozuntuları, neyrodegenerativ və reproduktiv sistem pozuntuları riskini artıra bilər.

Ölkə.az xəbər verir ki, tədqiqatın nəticələri "Nature Medicine" (NatMed) elmi jurnalında dərc olunub.

Bisfenollar, ftalatlar və PFAS kimi qida ilə təmasda olan kimyəvi maddələr (FCC) qidaya daşınma və emaldan tutmuş qablaşdırma və hazırlığa qədər müxtəlif mərhələlərdə daxil olur. Xüsusilə ultraemal olunmuş məhsullar təhlükə yaradır. Çünki bu məhsullar yalnız sintetik əlavələr deyil, həm də qablaşdırmadan zərərli birləşmələri daha asan şəkildə özünə çəkir.

Tədqiqatın aparıcı müəllifi Ceyn Munkenin sözlərinə görə, müasir qablaşdırılmış və ultraemal olunmuş məhsullar, hər nə qədər rahat və dadlı görünsə də, əslində mikroplastik və təhlükəli kimyəvi maddələrin əsas mənbəyinə çevrilir. Bununla belə, onların sağlamlığa real təsiri hələ də kifayət qədər araşdırılmayıb.

Alimlər bu sahədəki normativ hüquqi bazanın yenidən nəzərdən keçirilməsinə çağırırlar. Onlar qida sənayesində istifadə edilən kimyəvi maddələrin daha ciddi şəkildə nəzarətə götürülməsini, sağlam və təhlükəsiz qablaşdırma materiallarının hazırlanmasını, həmçinin ultraemal olunmuş məhsulların istehlakının azaldılmasını tövsiyə edirlər.

Həmidə İbrahimova