Soyuqdəymənin qənimi: 15 dəqiqəyə hazırlanan MÖCÜZƏ

Soyuq qış aylarının ən əvəzedilməz yeməklərindən biri də "əvəlik şorbası"dır. El arasında şəfa mənbəyi kimi dəyərləndirilən bu yemək zökəm və soyuqdəymənin təbii dərmanı kimi tanınır. Yeməyi müalicəvi edən əvəlik bitkisidir. Yabanı halda bitən bu bitki yay aylarında yığılaraq saç hörüyü, yaxud yarpaq şəklində qurudularaq saxlanılır.

Ölkə.az əvəlikli-əriştəli şorbanın bişirilmə qaydasını təqdim edir.

Lazım olan ərzaqlar:

- 3 ədəd baş soğan

- 100 qram yağ

- 100 qram maş lobya

- 200 qram un

- bir boşqab qurudulmuş əvəlik

- qaynar su

Yeməyi hazırlamaq üçün əvvəl maş lobya suda qaynadılır. Sonra əvəlik yumşalması üçün qaynar suda isladılır. Bundan sonra 1 kündəlik xəmir yoğurulur və əriştə kəsilir. Əriştə üçün hazırlanan xəmirin bir qədər bərk olması məsləhətdir. Əriştə kəsiləndən sonra üzərinə un səpilərək qarışdırılır ki, qaynar suda bir-birinə yapışmasın.

Əriştə hazırlandıqdan sonra yağ-soğan edilir. Hazır olandan sonra üzərinə qaynanmış su tökülür. Qaynayan suya maş lobya əlavə edilir. Ardınca əvvəlcədən isladılmış əvəlik sıxılıraraq qazana tökülür.

Qazanın qapağı örtülü halda 10 dəqiqə əvəliyin bişməsi gözlənilir. Daha sonra qazana kəsilmiş əriştə və duz əlavə edilirək vam odda 5 dəqiqə qaynadılır.