Qaraciyər sirrozunun ağır fəsadlarını aradan qaldırmağın ən sadə yolu 

"Ölkə.az" xəbər verir ki, bu, Vyana Tibb Universitetinin tədqiqatçılarının gəldiyi nəticədir. Tədqiqat Journal of Hepatology (JH) jurnalında dərc olunub .

Sirroz qaraciyərin tədricən çapıq toxuması ilə örtüldüyü və fəaliyyət qabiliyyətini itirdiyi bir xəstəlikdir. Qərb ölkələrində sirrozun əsas səbəblərindən biri uzun müddətli alkoqol istifadəsidir. Xəstəlik tez-tez qarın boşluğunda maye yığılması (assit), şüurun pozulması (qaraciyər ensefalopatiyası) və qida borusu venalarının genişlənməsindən qanaxma da daxil olmaqla ciddi fəsadlarla müşayiət olunur.

Əvvəllər bu cür ağırlaşmaların xəstəliyin geri dönməz mərhələsini göstərdiyi düşünülürdü. Lakin yeni tədqiqatlar göstərir ki, hətta bu hallarda belə qaraciyər sağlamlığı yaxşılaşa bilər.

Tədqiqatda Avropa və Asiyadakı 17 ixtisaslaşmış mərkəzdən alkoqol sirrozu olan 633 xəstə iştirak edib. Onların hamısı xəstəliyin ağırlaşmalarından sonra alkoqoldan tamamilə imtina etməyə başlayıblar.

Müşahidə müddəti beş ilə qədər davam edib. Bu müddət ərzində xəstələrin təxminən üçdə birində qaraciyər funksiyasının yaxşılaşması ilə yanaşı, sirroz ağırlaşmalarının tam aradan qalxması müşahidə edilib. 

"Məlumatlar göstərir ki, hətta ciddi fəsadlar inkişaf etdikdən sonra belə, sirroz mütləq geri dönməz bir proses deyil", - tədqiqatın aparıcı müəllifi Benedikt Hofer bildirib.

Alimlərin fikrincə, sağalmanın əsas amili spirtli içki qəbulunun tam və erkən dayandırılması idi. Xəstələr nə qədər tez imtina etməyə başlasalar, qaraciyər funksiyalarını yaxşılaşdırmaq şansları bir o qədər yüksək olar.

Tədqiqat həmçinin bərpanın sağ qalma müddətinə əhəmiyyətli təsirini nümayiş etdirib. Qaraciyər funksiyası bərpa olunan və spirtli içkilərdən imtina etməyə davam edən xəstələr arasında qaraciyər xəstəliyindən ölüm halları qeydə alınmayıb. Bundan əlavə, onların qaraciyər xərçənginə tutulma ehtimalı xeyli azalıb.

Tədqiqatın müəllifləri qeyd edirlər ki, alkoqoldan tamamilə imtina alkoqollu qaraciyər xəstəliyinin ən təsirli müalicəsi olaraq qalır. 

Elvin

Ölkə.az