Xurma orqanizmə necə təsir edir? - Həzm, ürək və hamiləlik üçün faydaları

Xurma min illərdir insanlara məlumdur və bu gün də bir çox ölkənin qida rasionunun vacib hissəsi olaraq qalır. Bundan əlavə, bu meyvələr yüksək qida dəyərinə malikdir və gündəlik qidalanmaya faydalı əlavə ola bilər.

Ölkə.az xəbər verir ki, xurmanın orqanizmə təsiri və faydaları barədə "Healthline” portalının ekspertləri məlumat veriblər.

Xurmanın əsas faydası nədən ibarətdir və niyə hamilələrə tövsiyə olunur?

Xurma geniş qida maddələri spektrini ehtiva edir: təxminən 40 qramlıq porsiyada 113 kalori, 30 qram karbohidrat, az miqdarda protein və 3 qramdan çox lif mövcuddur. Həmçinin tərkibində kalium, maqnezium, mis, dəmir və B6 vitamini var ki, bunlar ürək-damar və sinir sisteminin fəaliyyətində iştirak edir.

Bununla belə, xurmanın əsas faydası onun yüksək lif tərkibi ilə bağlıdır. Lif həzmi normallaşdırır, qəbizlik riskini azaldır və bağırsaqların düzgün işləməsinə kömək edir.

Bundan əlavə, 2015-ci ildə Kembric Universitetinin araşdırması göstərib ki, xurmanın müntəzəm qəbulu bağırsaq hərəkətlərinin tezliyini artırır və ümumi həzm sağlamlığını yaxşılaşdırır.

Xurma antioksidantlarla da zəngindir. Bu maddələr hüceyrələri zədələnmədən qoruyur və "Food Science & Nutrition” jurnalına görə, ürək-damar xəstəlikləri riskinin azalması ilə əlaqələndirilir.

Xüsusi olaraq hamilə qadınlar üçün xurmanın faydası diqqət çəkir. "BMC Pregnancy & Childbirth” jurnalında dərc olunan araşdırmaya əsasən, hamiləliyin son mərhələlərində xurma qəbul edən qadınlarda doğuşun daha sürətli keçməsi və stimulyasiyaya ehtiyacın azalması müşahidə olunub.

Xurmanın nə qədər tez-tez yeyilməsi olar? - Müntəzəm istifadənin fayda və ziyanı

Xurmanın faydası bir çox hallarda danılmaz olsa da, bu məhsul hər kəs üçün uyğun deyil. Təbii şəkərlərin yüksək olması səbəbindən şəkərli diabet, insulinə rezistentlik və karbohidrat mübadiləsi pozğunluğu olan insanlar onu ehtiyatla qəbul etməlidirlər.

Həmçinin xurmanın həddindən artıq birdəfəyə qəbulu şişkinlik, bağırsaq narahatlığı və ya ishala səbəb ola bilər, xüsusilə həssas həzm sisteminə malik insanlarda.

Bundan əlavə, yüksək kalorili olması səbəbindən xurmanın həddindən artıq istifadəsi zamanla çəki artımına gətirib çıxara bilər.

Əksər sağlam insanlar üçün təhlükəsiz gündəlik porsiya 3–6 ədəd xurma (təxminən 40–70 qram) hesab olunur. Bu miqdar bədənə lif, vitamin və minerallar qazandırır, eyni zamanda şəkər və kalori qəbulunu həddindən artıq artırmır.

Xroniki xəstəlikləri olan və ya xüsusi pəhriz saxlayan şəxslər üçün isə optimal norma həkim və ya dietoloqla razılaşdırılmalıdır.(qaynarinfo)