Yayda yeyilməsi təhlükəli ola biləcək ərzaqlar açıqlandı

Yay aylarında bəzi qidaların istehlakını məhdudlaşdırmaq məsləhət görülür.

Ölkə.az xəbər verir ki, bu barədə rusiyalı endokrinoloq Aleksey Kalinçev "RBK Life"a danışıb.

Onun sözlərinə görə, isti havalarda yağlı qidaların, xüsusilə də yağlı ətin miqdarını azaltmaq vacibdir.

"Yayda yağlı qidaların istehlakını ciddi şəkildə məhdudlaşdırmağın tərəfdarıyam. İlk növbədə yağlı ətlərin miqdarını azaltmaq lazımdır", - deyə həkim qeyd edib.

Dietoloq Natalya Lazurenko isə mayonezlə hazırlanan hazır salatların rasiondan çıxarılmasını tövsiyə edib.

Onun sözlərinə görə, yüksək temperatur bakteriyaların çoxalmasını sürətləndirir. Bundan əlavə, məhsulun saxlanma müddətini artırmaq üçün əlavə edilən bəzi inqrediyentlər onun keyfiyyətinə təsir göstərə bilər.

Ekspert vurğulayıb ki, məhsulun təzə görünməsi və ya xoşagəlməz qoxunun olmaması onun təhlükəsiz olduğunu göstərmir. Bir çox xəstəlik törədən mikroorqanizmlər yeməyin dadını və görünüşünü dəyişmir.

Həkim qeyd edib ki, yayda belə məhsulların əsas təhlükəsi bağırsaq infeksiyaları, susuzlaşma və həzm sistemi pozuntularıdır. Xüsusilə uşaqlar, yeniyetmələr, yaşlı insanlar, hamilə qadınlar və immun sistemi zəif olan şəxslər daha diqqətli olmalıdırlar.

Onun sözlərinə görə, isti havalarda təzə hazırlanmış yeməklərə, ağır souslar əlavə olunmayan tərəvəz salatlarına və uzun müddət saxlanılmayan qidalara üstünlük verilməsi daha məqsədəuyğundur.(oxu.az)