Avokado hər kəs üçün faydalı deyil

Ölkə.az "Lenta.ru"ya istinadən xəbər verir ki, bunu rusiyalı endokrinoloq Anastasiya Altunina deyib. 

Onun fikrincə, avokado olduqca kalorili məhsuldur. Mütəxəssis vurğulayıb ki, bir orta ölçülü avokadoda təxminən 300-350 kilokalori və 30 qram yağ var. Enerji dəyərinə görə bu, bir plitə şokoladla müqayisə oluna bilər. Bu səbəbdən hər gün bir və ya iki avokado yemək zamanla artıq çəki riski yaradır. 

Endokrinoloq əlavə edib ki, avokado tərkibindəki yağların həzmi üçün həzm sisteminin daha aktiv işləməsi tələb olunduğundan öd ifrazını stimullaşdırır. Onun sözlərinə görə, bu, əksər insanlar üçün problem yaratmasa da, öd daşı xəstəliyi və ya öd durğunluğuna meyilli şəxslərdə çox miqdarda avokado qəbulu öd kisəsinin yığılmasına və daşların hərəkət etməsinə səbəb ola bilər.

“Bu zaman sağ qabırğaaltı nahiyədə kəskin ağrı, ürəkbulanma və ağızda acılıq hissi ilə müşayiət olunan öd sancısı yarana bilər”, - həkim xəbərdarlıq edib.

Anastasiya Altunina həmçinin bildirib ki, avokado qanın laxtalanmasına təsir edən bəzi dərmanların, xüsusilə də varfarinin effektivliyini azalda bilər. Bundan əlavə, bu məhsul qarında köp, qazın artması, qurultu və narahatlıq hissi yarada bilər.

Həmidə İbrahimova