Soyuq qəhvə içmək üçün daha uyğun vaxt hansıdır?

Ölkə.az xəbər verir ki, əksər insanlar günə enerjili başlamaq, səhərki yorğunluğu aradan qaldırmaq və ya günorta saatlarında yaranan zehni yorğunluğu azaltmaq üçün buzlu qəhvəyə üz tutur.

Yuxudan oyanan kimi qəhvə içməyin kortizol (oyanıqlıq və stress hormonu) səviyyəsinə təsir göstərdiyi məlumdur. Lakin səhər saat 08:00-09:00 arasında içilən qəhvə ən yaxşı halda oyanma prosesini bir qədər gecikdirə bilər.

Əsas risk isə günün yorğunluğunun hiss edildiyi, axşamın yaxınlaşdığı saatlarda ortaya çıxır.

Xüsusilə yay günlərində işdən çıxarkən və ya axşamüstü gəzintisi zamanı böyük ölçülü soyuq qəhvə sifariş etmək zərərsiz görünə bilər. Ancaq məhz bu vaxt orqanizm istirahət rejiminə keçməyə hazırlaşır.

Kofeinin orqanizmdən tam xaric olması üçün adətən 5-7 saat vaxt tələb olunur.

Məsələn, saat 17:00-da içilən buzlu latte gecə saat 00:00-da belə qanda aktiv qala bilər.

Axşamüstü saatları orqanizmin yuxu hormonu hesab edilən melatonin istehsalına başladığı mühüm dövrdür. Bu saatlarda qəbul edilən yüksək miqdarda kofein melatonin ifrazını azalda bilər.

Nəticədə insan dərin yuxuya getməkdə çətinlik çəkə və keyfiyyətsiz yuxu keçirə bilər.

Axşam saatlarında maddələr mübadiləsi təbii olaraq yavaşlayır. Bu zaman çox soyuq və kofeinli içkilər bəzi insanlarda həzm sisteminin fəaliyyətinə təsir göstərə, köp, qaz və həzmsizlik kimi narahatlıqlara səbəb ola bilər.

Əgər soyuq qəhvədən imtina etmək istəmirsinizsə, onu bioloji ritmə uyğun vaxtda qəbul etmək daha məqsədəuyğun hesab edilir.

Ən uyğun saatlar: 10:00-12:00

Mütəxəssislərin fikrincə, oyandıqdan təxminən 2-3 saat sonra içilən qəhvə diqqəti artırmağa kömək edə və kortizol balansına daha az təsir göstərə bilər.

Günün ikinci yarısında enerjinizi yeniləmək istəyirsinizsə, qəhvə üçün ən gec saat 14:00 hesab olunur. Bu saatdan sonra qəbul edilən kofein bəzi insanlarda gecə yuxusunun keyfiyyətini azalda bilər.

Qəhvə yaxşı enerji mənbəyi olsa da, onu düzgün vaxtda qəbul etmədikdə növbəti gün özünüzü daha yorğun hiss etməyinizə səbəb ola bilər.

Həmidə İbrahimova