Soyuq əllər təhlükəli xəstəliklərin əlamətidir

Ölkə.az xəbər verir ki, mütəxəssislərin sözlərinə görə, soyuq əllərin ən geniş yayılmış səbəblərindən biri qan dövranının pozulmasıdır.

Bu vəziyyət qan damarlarının fəaliyyətindəki xüsusiyyətlər, əzələ spazmları və ya ətraflara normal qan axınını zəiflədən digər amillər nəticəsində yarana bilər.

Həkimlər həmçinin Reyno sindromuna da diqqət çəkirlər. Bu zaman soyuğun və ya stressin təsiri altında əl barmaqları qəfil ağara, hətta göyümtül rəng ala bilər. Qan dövranı bərpa olunduqdan sonra isə dəri qızarır, insan ağrı, yanma və ya iynəbatırma hissi keçirə bilir.

Mütəxəssislərin fikrincə, soyuq əllərin digər mümkün səbəblərindən biri də dəmir çatışmazlığı anemiyasıdır. Dəmirin azlığı toxumaların oksigenlə təminatını zəiflədir və nəticədə əllərin soyuq olması ilə yanaşı, tez yorulma, başgicəllənmə, ürək döyüntülərinin sürətlənməsi və dərinin solğunlaşması kimi əlamətlər də müşahidə oluna bilər.

Bundan başqa, soyuq əllər qalxanabənzər vəzi xəstəlikləri, şəkərli diabet, ateroskleroz, osteoxondroz, damar xəstəlikləri olan insanlarda, eləcə də siqaret çəkənlərdə daha tez-tez rast gəlinə bilər. Bəzi hallarda isə bu vəziyyət sərt pəhrizlər və ya qida maddələrinin çatışmazlığı ilə əlaqəli olur.

Həkimlər bildirirlər ki, əgər soyuq əllər uzun müddət davam edirsə və ya digər narahatedici əlamətlərlə müşayiət olunursa, bunu diqqətdən kənarda qoymaq olmaz. Belə hallarda səbəbin müəyyənləşdirilməsi üçün həkimə müraciət etmək və müvafiq tibbi müayinədən keçmək tövsiyə olunur.(lent.az)