Tural Abbaslı: "Hazırda Müsavatda qərar verəcək orqan yoxdur"

"Müsavat" partiyasının Gənclər təşkilatından 11 nəfərin ayrılması ilə bağlı yayılan xəbərləri MGT-nin keçmiş sədri Tural Abbaslı Ölkə.az-a şərh edib. 

Bundan əlavə Tural Abbaslı sabahkı mitinqə “Müsavat” partiyasının qatılıb-qatılmaması məsələsinə də aydınlıq gətirib.

Tural Abbaslı: "Gənclər də digər partiya üzvləri kimi vətəndaşlardır. Onların da partiyaya gəlmək qədər, çıxmaq hüquqları da var. 11 nəfərin gənclər təşkilatından istefa verməsindən məlumatım yoxdur. Əgər 11 nəfər MGT-dən istefa veribsə, bu partiyadan istefa vermək demək deyil. Gənclər təşkilatı partiyanın daxilində xüsusi statusa malik bir təşkilatdır. Partiyanın hər bir gənc üzvü MGT-nin üzvü sayılmır. 11 gəncin təşkilatdan ayrılmağı ilə bağlı məndə məlumat olsa idi, MGT-nin keçmiş sədri kimi maraqlanardım və belə şeyin ən azından indiki mərhələdə olmamasına çalışardım".

- "Müsavat" partiyası Milli Şuranın sabahkı mitinqə qatılacaq?

- Partiyanın səlahiyyətli orqanları tam olaraq formalaşmayıb. Məclis bu gün ilk iclasın keçirir. Divan yoxdur, müavinlik yoxdur, başqan var. "Müsavat" partiyası kollegial qərarlarla idarə olunur, hansısa şəxsin qərarı ilə yox. Partiyada qərar verəcək orqan yoxdur. Bu gün məclis qərar vercəkmi ki, biz orda rəsmi iştirak edəcəyik, bunu bilmək olmaz. Məclisdə hələ başqa məsələlərə baxılır. Rəsmi iştirakın altında çox şey yatır. Bu daha böyük məsuliyyətdir. "Müsavat" partiya olaraq rəsmən mitinqə qatıldığını elan eləsə gərək mitinqdəki kütləviyin yarısını öz üzərinə götürsün ancaq 1 günə biz onu çatdıra bilmərik. Bu gün üçün önəmli deyil Tural Abbaslı orda şəxsi qərarla ya da rəsmi qərarla iştirak edəcək, əsas odur ki, iştirak edəcəm. Lazım gəlsə siyasi məhbuslarımızın rəsimləri olan plakatları da tutacağıq, şüarlarını da qışqıracağıq.

Səxavət Məmməd

Ölkə.az