Xədicə İsmayılın həbsinə baş redaktorlar nə dedi?
Araşdırmaçı jurnalist Xədicə İsmayılın həbsi son günlər medianın və siyasətin gündəmini zəbt edib. Bununla bağlı Ölkə.Az baş redaktorların fikrini öyrənib.
Jurnalistlərin həmkarları barədə səsləndirdiyi fikirləri sizə təqdim edirik:
"Yeni Müsavat" qəzetinin baş redaktoru Rauf Arifoğlu: "Jurnalistin həbsi arzuolunan bir hal deyil. İki dəfə həbsdə olan bir jurnalist kimi istəməzdim ki, hansısa bir jurnalist həbs edilsin".
"Qaynar.info"-nun baş redaktoru Zahir Əzəmət: "Jurnalistin həbsini pisləyirəm. Əgər biz ölkəmizin demokratiya yolunda getdiyini deyiriksə, jurnalistin, söz adamlarının əlbətdə həbsini pisləyirik. Hakimiyyət tərəfi bu həbsi yazılarla, araşdırmalarla əlaqələndirmir. İctimai rəy isə bu yanaşmanı qəbul etmir. Bu həbsi pisləyirik və Xədicə xanımın azadlıqda olmasını arzulayırıq".
"Arqument.az"-ın baş redaktoru Şəmşad Ağa: "Jurnalistlərin həbsi təbii ki, xoşagəlməz haldır. Xədicə İsmayılın həbsi ilə bağlı irəli sürülən ittiham isə absurddur. Ona qarşı səsləndirilən bu ittiham, əslində, siyasi ittihamları pərdələmək məqsədilə irəli sürülüb. Yəni həbsinin arxasında siyasi sifarişin olduğu qənaətindəyəm. Guya kimisə mart ayında intihar həddinə çatdırıb. Sual yaranır ki, bəs bu adam o vaxt niyə şikayət etməyib? İntihar həddinə çatdırmaq məsləsinə gəlincə, Qarabağ qazisi günün günorta çağı özünü yandırdı, amma kiməsə cinayət işi açmadılar. Hələ ad da çəkmişdi və özünü də dövlət qurumunun qarşısında yandırdı. Bu baxımdan, hesab edirəm ki, belə bir ittihamla Xədicə İsmaylın həbsi qəbuledilməzdir və qanunsuzdur".
Fəaliyyətini dayandırmış "Ayna" və "Zerkalo" qəzetinin baş redaktoru Elçin Şıxlı: "Bu həbsi pisləyirəm. Jurnalistin həbsinə heç bir halda yaxşı yanaşmaq olmaz. Xədicə İsmayılı uydurma ittihamla həbs ediblər. Belə ittihamlar zamanı heç də həbs qəti imkan tədbiri seçilməsi labüd deyildi".
"Azxeber.com"-un baş direktoru Əfsələddin Ağalarov: "Heç kəsin həbs olunmasını istəməzdim. Hər bir şəxsin vətəndaşlıq borcu var, əgər onu xarici maraqlara satırsa və bu qanunla aşkarlanırsa təbii ki, hər bir şəxs, istər jurnalist, istər siyasətçi qanun qarşısında cavab verməlidir. Xədicə İsmayılın faliyyətini izləyən bir insan kimi deyə bilərəm ki, o, Azərbaycanı xarici təşkilatlara, Avropa və Amerikanın maraqlarına satan bir insandır. Hal hazırda bu haqda başqa heç nə demək olmaz. Məhkəmə prosesini gözləyək. Xədicə İsmayılın işi jurnalist fəaliyyəti yox, Azərbaycanı xarici təşkilatlara satmaq və xaricdən sığınacaq almaq idi".
"Yeni Çağ" qəzetinin baş redaktoru Aqil Ələsgər: "Hesab edirəm ki, fikirlərinə görə heç bir jurnalist həbs edilməməlidir. Jurnalist əgər fikrini bildirirsə və haqsızdırsa onun haqsız olduğu sübut edilməlidir. Bu təkcə Xədicə İsmayılla bağlı deyil, istənilən halda jurnalistin həbsini düzgün hesab etmirəm. Xədicə İsmayılın şəxsinə gəldikdə isə hesab edirəm ki, hansısa axmağın iddiası ilə həbs olunmağındansa onun fəaliyyəti araşdırılsaydı, daha yaxşı olardı".
"Azvizion.az" saytının baş redaktoru Vüsal Məmmədov: "Xədicə İsmayılı jurnalist saymıram. Onun kimi insanlar bütün dünyada “maraq agenti” hesab olunurlar. Xədicə İsmayıl informasiya müharibəsində bir siyasi mövqedə durub, digərinə hücuma keçən əsgərdir. Söhbət daxili siyasətdən getmir. Onun missiyası məhz beynəlxalq müstəvidə Azərbaycan dövlətinin maraqlarına zərbələr vurmaqdır. Azərbaycan əleyhinə hazırlanan bütün hesabatlarda Xədicənin və daxil olduğu qrupun xidmətləri olurdu. Bu, dövlətə qarşı patoloji nifrəti olan bir qrupdur".
Səxavət Məmməd
Ölkə.Az
