Zahid Oruc: "Danışıqlardan sonra Azərbaycanın siyasi mənzərəsi xeyli dəyişəcək"

Azərbaycanın bəzi müxalifət partiyalarının sədrləri dekabrın 13-də Prezident Administrasiyası ictimai-siyasi məsələlər şöbəsinin müdiri Əli Həsənovla görüşəcəklər.

Görüşdə Klassik Xalq Cəbhəsi Partiyası, Azərbaycan Demokrat Partiyası, Azərbaycan Liberal Demokrat Partiyası və Azərbaycan Xalq Partiyası sədrlərinin iştirak edəcəyi gözlənilir.

Millət vəkili Zahid Oruc Ölkə.az-a bu danışıqlardan sonra Azərbaycanın siyasi mənzərəsinin xeyli dəyişəcəyini bildirib.

"Nəhayət uzun müddətdən bəri, yalnız mətbuat üzərindən aparılan polemikalardan sonra müxalifət və iqtidar nümayəndələrinin bir masa ətrafında toplanması işgüzar bir atmosfer formalaşdıracaq. Bu bir sıra anlaşılmazlıqları, qeyri-real məsələlərin ortadan qaldırılması və normal siyasi mədəniyyət sisteminin formalaşmasına səbəb olacaq.

Ümumilikdə partiyalararası dialoq çox yaxşı bir hadisədir. Keçmişdə bunun baş tutmamasının əsas səbəblərindən biri guya dövləti, onun rəhbərliyini qəbul etməmək, legitimlik söhbətləri, şərt qoymaq və.s kimi mövzular idi.

İndi düşünürəm ki, milli problemlər, milli məsələlər ətrafında bu danışıqlar və diaoqların keçirilməsi mümkündür. Yenə də hər kəs özünün müxalif platformasını saxlamaqla bərabər əsas məsələlər ətrafında vahid mövqeyini hakimiyyətlə birgə olduqlarını dünyaya göstərə bilərlər, əks halda buna yalnız xainlər bəhrələnmiş olur.

Son dövrün ən əsas mövzusu siyasi mübarizədə 5-ci elementdir. Obrazlı söyləsək bu belədir. Vaxtı ilə 4 ordu birləşmələrinin savaş apardığı zaman 5-cilərin də düşmən tərəfdə işləməsi, üzərindən 70 il keçəndən sonra müxtəlif ölkələrin həyatında və siyasi praktikasında yenidən dirçəlib, üzə çıxıbdır.

Qısacası düşünürəm ki, bu dialoq müsbət bir işdir. Və əminəm ki, dövlət təmsilçiləri ilə aparılan bu danışıqlardan sonra Azərbaycanın siyasi mənzərəsi xeyli dəyişmiş olacaq".

Fatimə İbrahimova
Ölkə.az