Vurğun Əyyub: "Mən şəxsi fikirlərimi müzakirələrdən sonra deyəcəyəm"

"Müsavat" partiyasında söz-söhbətlər səngimir. Belə ki, Arif Hacılının başqan olmasına Qubad İbadoğlu tərəfdarlarının ciddi etirazları davam etməkdədir.

Ölkə.az xəbər verir ki, partiyanın gənc üzvləri Tural Abbaslı seçkilərin nəticələrini tanıdıqdan sonra kənara çəkilsələr də, Qubad İbadoğlu tərəfdarları heç də belə düşünmür. 

"Müsavat" partiyasının keçmiş başqanı İsa Qəmbərin keçmiş müşaviri Hüseyn Məlik açıqlamasında hazırkı başqan Arif Hacılının legitimliyini tanımadığını bəyan edib. Məsələ ilə bağlı Müsavat funksionerlərindən biri, İsa Qəmbərin keçmiş birinci müavini Vurğun Əyyubun fikirlərini öyrənməyə çalışdıq:

Vurğun Əyyub: "Üç gündən sonra partiyada toplantı olacaq. Bütün məsələləri orada müzakirə edəcəyik. Vəziyyətdən çıxış yolunu axaracağıq. Mənə gəldikdə isə, fikrimi yalnız və yalnız bu müzakirələrdən sonra deyəcəm"

- Bəs siz özünüz ayın 6-da keçiriləcək toplantıda iştirak edəcəksinizmi?

- Mütləq iştirak edəcəm

Xatırladırıq ki, otyabrın 6-da saat 15.00-da Müsavat Partiyasının mərkəzi qərargahında Qubad İbadoğlunun tərəfdarları ilə görüşü keçiriləcək.

Fatimə İbrahimli

Ölkə.az