Millət vəkili: \"Bizdə bir jurnalist həbs olunanda aləm qarışır bir-birinə...\"

Türkiyəni yeni həbslər dalğası bürüyüb. Fəthullah Gülənə aid media qrupunun bir neçə jurnalisti və onlarla əlaqəsi olan məmurlar həbs olunub.

Türkiyədə baş verən son olayları və onun Azərbaycana sıçrayıb-sıçramayacağını millət vəkili Fazil Mustafa Ölkə.az-a şərh edib.

- 17 dekabr yaxşınlaşdıqca Türkiyədə bu həbslərin baş verməsi gözlənilən idi, çünki Türkiyədə 17 dekabrda "yolsuzluq" və "korrupsiya" məsələləri ilə bağlı bəzi işlər görülürdü. Hökumət bunun qarşısını almaq üçün müəyyən tədbirlər görür.

Bu Türkiyənin daxili ilə bağlı məsələdir, baş verənlərin hüquqa əsaslanıb-əsaslanmadığını söyləmək çətindir. Son dövrlərdə Türkiyədə "Ergenekon", "Balyoz" və digər məsələlərdə hüquq adına görülən işlərin sonradan siyasi olduğu, hüquqi əsasının olmadığı üzə çıxdı.

İndi baş verənlər də siyasi xarakterli tədbirlər silsiləsindəndir. Ümüd edək ki, Türkiydə siyasi sabitlik və demokratiya prinsipləri pozulmasın. İndiki vəziyyətdə Türkiyənin sabitliyə daha çox ehtiyacı var. Ona görə ki, bölgədə baş verəcək müharibə təhlükəsi Türkiyə üçün müəyyən problemləri saxlamaqdadır. Daxildə gərginliyin olmaması Türkiyənin xeyrinədir.

Türkiyədə son zamanlar baş verənlərin hüquqla əlaqəsinin olmaması narahat edicidir. İstənilən həbsl hüquqa əsalanmalıdır ancaq bunun inandırıcılığı görünmür. Siyasi xarakterli qərarların hamısı 10-15 il sonra üzə çıxır.

Türkiyə bizim üçün də örnək, nümunəvi bir dövlətdir. Bizdə bir jurnalist həbs olunanda aləm qarışır bir-birinə. Türkiyədə 32 jurnalisti bir gündə, heç bir ciddi əsas olmadan həbs edirlər, qəzetə hücum olunur, televiziyaya hücum olunur, ancaq buna sadə bir məsələ kimi baxırlar. Türkiyədə media azadlığı bizdən daha da geridədir.

- Fazil bəy, bundan əvvəl Türkiyədə "fətuhullahçı"lara qarşı əməliyyat keçiriləndə bunun Azərbaycana da təsiri olmuşdu. Bəs indi də necə?

- İnanmıram Türkiyədə baş verənlərin bu dəfə Azərbaycana təsiri olsun. Ötən dəfə məktəblərlə bağlı Azərbaycana müəyyən təsiri olmuşdu, ancaq Azərbaycan prezidenti çox doğru addım atdı, məktəblərin sıradan çıxmasına yol vermədi. Yalnış bir qərar qəbul oluna bilərdi və məktəblərin ortadan qalxması Türkiyənin Azərbaycanda mövqeyini xeyli zəiflədərdi. İndiki şərtlədə o problem həll olunduğuna görə Azərbaycanla bağlı heç nə gözlənilmir. Bu məsələyə Türkiyənin daxili işi kimi baxılmalıdır.

Səxavət Məmməd
Ölkə.az